AMED - Rojnamegerê kurdî 4 rojî yo destbendkerde yê û bi rayîrê avûkatan mesaj şawitî. Edîtora ma Gulşen Koçuk, vat: "Ma rastiyan ra hêz gênê." Hemserekê DFGyî Serdar Altan zî dîyar kerd ke îqtîdar wazeno rastiyan şarî rê binimino û seba nê dezgehê çapemenîye hedef yenê girewtiş.

 

21 kesê ke 20 ci ra rojnameger ê di çarçewaya operasyonê Serdozgerîya Komare ya Amedî dabi destpêkerdiş de 8ê hezîrane de amebî destbendkerdiş, hema zî destbendkerde yê. Serê dosyaya rojnamegerê ke Mudurîyê Polîsan ê Amedî de yenê tepiştiş, qerarê sînorkerde esto. Sewbîna  rojnamegerî hema zî hucreyê yew kesî de yenê tepiştiş. Sewbîna vizêr 2 rojî bîn zî demê destbendkerdişî ame dergkerdiş.

 

Eynî wextî de pêwa keyeyê rojnamegeran eşt serê Produksiyonê Pelî, Produksiyonê Pîya, Produksiyonê Arî û ajansê JINNEWSî yê Amedî. Sereştiş de xeylêk hacetê rojnamegeran ameyî desteserkerdiş. 

 

Mudura ajansê ma Safiye Alagaş, edîtora ma Gulşen Koçuk, Hemserekê Komeleya Rojnamegeranê Dîcle Firatî (DFG) Serdar Altan, Mudûrê Karê Nuşteyê ê Rojnameyê Xwebûnî Mehmet Alî Ertaş, edîtorê Ajansê Mezopotamyayî (MA) Azîz Orûç û Omer Çelîk, muxabirê Xwebûnî Zeynel Abîdîn Bûlût û rojnameger Lezgîn Akdenîz, Mehmet Şahîn, Suat Dogûhan, Ramazan Gecîken, Esmer Tûnç, Neşe Toprak, Mazlûm Dogan Guler, Elîf Ungur, Îbrahîm Koyuncû, Remziye Temel, Mehmet Yalçin, Abdurrahman Oncu, Kadîr Bayram û Feynaz Koçûk amebî destbendkerdiş.

 

Edîtora ma Gulşen Koçûk û hemserekê DFGyî Serdar Altan bi rayîrê avûkatanê xo mesajêk şawitî.

 

‘Rayîrê ma rast o ma nê ra bawer ê’

 

Gulşene, dîyar kerd ke tedayê serê xebatkarê çapemenîya azade dir xerîb nîyê û vat: “Îqtîdar û hukm her çiqas bi ser adetê çapemenîya azade de bêrê zî wazena vajî ke ma serê lingan de yê. Ma rastîyan ra hêz gênê. Îqtîdarê AKPyî û MHPyî bi hukmê xo, bi helwest û caardişê xo nêeşkeno karê ma rê bibo asteng. Ma rojnameger ê. Îqtîdar û hukm nêeşkeno karê ma dîyar bikero. Nêeşkenê qerar bidê ma rojnameger ê yan ney. Bi vatişê înan ê ‘rojnameger nîyê’ ma rojnamegerî ra nêvejênê. Rojnamegerîya cinîyan ê kurdî gamêke newe dîyar kerd. JINNEWS ajansêke ke Tirkîya û Rojhelatê Mîyanên rojnamegerîya cinî bi tesîr keno yo. Roja ke rojnamegerîya cinîyan ê kurdî xo birêxistin kena, îqtîdar teda rojnamegeranê cinîyan keno. Yew zî sebebê nê operasyonan zî o yo. Ez wazena reyke bîn zî dîyar bikerî, karê ke na kenê rayîrêko rast o û ma nê ra bawer ê.”

 

‘Rojnamegerî suc nîya’

 

Serdarî zî mesajê xo de dîyar kerd ke hêrişê çapemenîya azad ameyo kerdiş, îqtîdar wazeno rastiyan şarî ra binimno û wina vat: “Îqtîdar bîyayîşê xo binimitişê rastiyan ê şarî ra dewam keno. Seba nê dezgehê çapemenîye hedef yenê girewtiş. Îqtîdarê AKPyî û MHPyî bi nê operasyonan hewl dano bêhuqûqîyê xo, caardişê teberê merdimayî şarî ra nimnenê. Bi destbendkerdiş û tepiştişê rojnamegeran neqlkerdişê rastiyan ê şarî dir nêeşkeno bêro astengkerdiş. Adetê çapemenîya azade bi nê caardişê teberê huqûqî nêeşkenê bêrê bêvengkerdiş. Adetê çapemenîya azade her tim rastî vatî û do tîya ra tepya rastiyan dewam bikero. Rojnamegerî suc nîya.”