Melîke Aydin 

 

ÎZMÎR  - Rojnamegerî, sîyasetmedarî û aktivîstê Îzmîrî reaksîyon ramojnayî destbendkerdişê xebatkarê çapemenîya azade û vatî ganî lezkî xebatkarê çapemenîye serbest bêrê veradayîş. 

 

21 merdimî ke 20 ci ra rojnamegerê di çarçewayê operasyonê Serdozgerîya Komare ya Amedî de dabî destpêkerdiş de 8ê Hezîrane de ameybî destbendkerdiş hema zî nezaret de yê, serê dosyaya rojnamegerî di Mudurîyetê Polîsan ê Amedî de yenê vindarnayîş de qerarê sînordarkerdişî esto. Sewbîna rojnamegerî hema zî  di hucreyê yew kesîyî de yenê vindarnayîş. Sewbîna 2 rojê bînî zî wextê nezaretî ame dergkerdiş. 

 

Di eynî wextî de pêwa keyeyê rojnamegeran serê Produksîyonê Pel, Produksîyonê Pîya, Produksîyonê Arî û Ajansê JINNEWSî yê Amedî de girewtî. Di sergirewtişî de xeylêk hacetê rojnamegeran ameyî destserkerdiş. 

 

Derheqê destbendkerdişî û destserkerdişê hacetan de reaksîyonî û razînêbîyayîşê rayaumûmîyî domnenê. Sîyasetmedarî, Aktivîstî û rojnamegerî reaksîyon ramojnayî destbendkerdişan û vatî ganî lezkî rojnamegerî bêrê veradayîş. 

 

'Ma do pêwa heme tehdayan binusnê' 

 

Xabatkara rojnameyê Evrenselî Dîlek Omaklilar, da zanayene ke hêrişê hemverê rojnamegeran de yê her roja ke derbas beno zêde bîyo û vat do destûr  nêdê ke na rewşe wina normal bêro vînayîş. Dîleke wina dewam kerd: "Ma zanenê ke rojnamegerî sûc nîya. Embazê ma bi serran na rojnamegêrî kenê. Meslekdarê ma qeyûman ra heta nêmunasîbîyê xeberê muhîmî viraştêne. Heto bîn ra di prosesê weçînayîşî de tehdan zêde kenê. Ma bi vengê ke berz vanê êdî bes o. Pêwa heme tehdayan ma do binusnê. Ganî her kes rojnamegêran dir di mîyanê hetkarîyî de bo." 

 

'Wazenê xebatan krîmînalîze bikerê' 

 

Hemsereka HDPyî ya Îzmîrî Berna Çelîk zî dîyar kerd ke nê hêrişî, hêrişê ewilî nîyê û yê peynî zî nîyê û vat: "No operasyon, di prosesêke hêrişê hemverê Mintiqaya Federe ya Kurdistanî de û Sûrîyeyî de vernîyê rayîr ra şîyayîşê Gemlîkî ameyo ca tesaduf nîyo. No hêriş bi amancê vernî ro padayîşê azadîya girewtişê xeberan o. Ê zî baş zanenê ke Şarê Kurdî bi çapemenîya hetkerdoxe bawer nîyê. No bi amancê krîmînalîzekerdişê xebatê çapemenîya azade ameyê kerdiş." 

 

'Ma do reaksîyonê xo pîl bikerê' 

 

Rojnameyê Mucadele Bîrlîgîyî ra Lutfîye Bûrcû Kara, dîyar kerd ke hêrişê Sûrîyeyî de û mintiqayê cîyayî yê Kurdistanî de hemverê Kurdan de zêde bîyê û nê hêrişî hemverê çapemenîya azade de zî nê prosesî ra xoser nîyê û vat: "Rojnamegerê Kurdî vengê Şarê Kurdî yê û coka nê destbendkerdişî virazîyayî. Nê asasî de tena hemverê rojnamegerê Kurdî de nîyê, nê hêrişî do pîl bibê. Seba vengê Şarê Kurdî bibirnê wina kenê. Pêwa heme hêrişan ma do vengê xo berz bikerê." 

 

'Ewilî hêrişê kedkarê çapemenîye kenê' 

 

Tora Pawitişê Cinîyan ra Gîzem Coşkûn zî reaksîyon ramojna hêrişan û qal kerd ke di têkoşînê cinîyan de cayê çapemenîye xeylêk muhîm o û wina peynî ro qiseyanê xo ard: "Kedkarê çapemenîye yê cinî zî di hereketê cinîyan de kerdox ê. Dinya û Tirkîya de serdestîya faşîzmî dir hemverê hereketê cinîyan de hêrişê cidî yenê ca. Wexto hêrişê cidî yenê ca, ewilî hêrişê kedkarê çapemenîye kenê. Ma hêrişê hemverê JINNEWSî de wina vînenê û erjinenê û ma qebûl nêkenê. Têkoşînê înan têkoşînê ma yo."