Marta Somek 

 

STENBOL - Temsîlkara Sereka Pêroyî ya Partîya Şorişgêr Bûrcûgul Çûbûk seba Organîzeyê Gemlîkî yo ke do 12ê Hezîrane de bêro ca venga wayîrvejîyayîşî kerd û wina vat: "Ganî pêroyê Tirkîya wayîr ro nê rayîr ra şîyayîşî vejî yo, vajo û derheqê şiknayîşê tecrîdê serê Ocalanî de xebatan bikero." 

 

Rayberê PKKyî Abdullah Ocalan 23 serrî yo Îmrali de binê tecrîdê giranî de yo û tecrîd her ke şino ro pêroyê Tirkîya vila beno. No serrêke yo nê keyeyê xo dir nê zî avûkatanê xo dir pêvînayîş nêkerdo û bi behaneyê cîyayî muracatî yenê redkerdiş. Bi serekîya Kongreya Demokratîke ya Şaran(HDK), Kongreya Komeleya Demokratîke(KCD), Partîya Mintiqayê Demokratîkî(DBP), Federasyona Komeleyê Hetkarîya Huqûqî yê Keyeyê Tepişteyan(MED-TUHAD-FED), Hereketê Cinîyan ê Azadan (TJA) duştê tecrîdî de di 12ê Hezîrane de bi sloganê  'Duştê tecrîdî de seba azadî bêro pawitiş ma şinê Gemlîk' rayîrşîyayîşêke yeno plankerdiş. 

 

'Do bi hezaran şêrê Gemlîk' 

 

Hadrekarîyê rayîr ra şîyayîşî bêmabên yenê kerdiş û bi xusûsî semtê Stenbolî de bêmabên yenê kerdiş. Bi serekîya TJAyî zî cinîyan dir civatî yenê kerdiş û seba rayîr ra şîyayîş xurt bêro ca veng ro cinîyan yeno kerdiş. Yeno pawitiş ke bi hezaran merdimî biherekîyê Gemlîkî. 

 

Temsîlkara Sereka Pêroyî ya Partîya Şorişgêr Bûrcûgul Çûbûk derheqê rayîrşîyayîşî de ajansê ma rê erjnayîş kerd. 

 

'Birêz Ocalan binê tecrîdî de yo' 

 

Bûrcûgule da zanayene ke Rayberê PKKyî bi komployî ardo Tirkîya û no 23 serrî yo yeno tecrîdkerdiş û wina vat: "Welatê ke tewirê nê komployî bîyî bi mesajan û qanûnê xo bi metodêke meşrû nîyo kerdî zîndan. Eşkera yo ke çareserî bi hêzê mîyanneteweyî û kapîtalîstî nînê ca. Birêz Ocalan roja ke ameyo tepiştişî ra heta nika yeno tecrîdkerdiş." 

 

'Behaneyê cezayê disîplînî vatişê ke di prosesê çareserîyî de kerdê' 

 

Bûrcûgule dîyar kerd ke di prosesê çareserîyî de Abdullah Ocalan, kemî bo zî keyeyê xo dir pirr û pak pêvînayîş kerdênê û wina dergî da qiseyanê xo: "Pêvînayîşê avûkatan ameyêne kerdiş la ma zanenê ke roja ke ameyo tepiştişî ra yeno tecrîdkerdiş. Her tim vanê koster xerepîyaye yo. Nika cezayê disîplînî danê pêser û kenê behane.  Behane zî yê ke wextê prosesê çareserîyî de ameyê kerdiş. Ê demî de wezîrî vatişê ey bi lezkî berdêne Erdoganî rê. La ewro bîyê behaneyê şerî." 

 

'Bi tecrîd wazenê Şarê Kurdî bipelçiqnê' 

 

Bûrcûgule bale ante serê tesîrê tecrîdî yê serê Şarê Kurdî de zî û wina erjnayîş kerd: "Ewro bi polîtîkayê binpaykerdişî yê di her çar perçeyê Kurdistanî de û Ocalan binê tecrîdî de gênê û bi nê tecrîdî zî wazenê Şarê Kurdî bipelçiqnê.  Ocalan di pêvînayîşê telefonî yê keyeyî dir vatbî  'Ez pêvînayîşê keyeyî nêwazena, eke avûkatî bêrê eke muxatabî bibê ez pêvînayîş kena'. Birêz Ocalan zî polîtîkayê serê xo de zaneno. Tecrîd nêbeno bi tu tewirêke bêro qebûlkerdiş. Hemverê Mintiqaya Federe ya Kurdistanî de hêrişî yenê kerdiş. Hemverê Avaşîn û Rojawanî de zî hêrişî yenê kerdiş. Zîndanan de binpaykerdişê heqan resayê sewîyeyê tewr corî. Serê Şarê Kurdî de nê polîtîkayî yenê kerdiş." 

 

'Ganî Şarê Kurdî na rastîye bivîno' 

 

Bûrcûgule qiseyê xo wina domnayî: "Tepişteyî seba polîtîkayê tecrîdî, bi mengan o di cayêke ke de roj nêvînenê, yenê tepiştiş. Heqê înan çinî kerdê. Ma sere ra vat tecrîdê Îmraliyî zîndanan de  zî yeno asayene. Eke ma biwazê tecrîdî bişiknê ganî ma rastîyan bivînê. Ewleyîya ma na ya ke hema têkoşînê Şarê Kurdî domnena. Ewro serê waştişê Sarê Kurdî de ver bi Gemlîkî ra rayîrşîyayîşêke yeno ca. Pêwa heme tehdayan rayîrşîyayîş do bêro ca. Xeylêke muhîm o  ke ma dest ci ra vera nêdanê. Ganî binpaykerdişî bêrê rijnayîşî!  Ganî ma tecrîdê Îmralî bişiknê û têkoşînê xo bidomnê!"