Marta Somek 

 

STENBOL - Endama Heyetê Îdarekarîya DÎSK Basin Îşî Elîf Akgul reaksîyon ramojna destbendkerdişê 21 rojnamegêrê ke mîyanê înan de mudur û edîtorê ajansê ma zî ci de yê û vat: "Di tarîxê çapemenîya azade de xeylêk fînakê nê û sewbîna xoverdayîşê duştê tehdan de pirr ê." 

 

Avûkata MLSAyî Merve Kûrhan zî da zanayene ke bi manîkerdişê çapemenîya azade dir wazenê vernîyê verê heqîqetî padê. 

 

Vizêrî serê sibayî di çerçewayê cipersayîşê Serdozgerîya Komare ya Amedî de polîsan eşt serê keyeyê xeylêk rojnamegêran, di netîceyê sereştişê keyeyan de mudura ajansê ma Safîye Alagaş, edîtora ma Gulşen Koçûk, Hemserekê Komeleya Rojnamegêrê Dicle Firatî(DFG) Serdar Altan, edîtorê Ajansê  Mezopotamyayî(MA) Azîz Orûç,  rojnamegêrî Omer Çelîk, Sûat Doguhan, Ramazan Gecîken, Esmer Tûnç,  Neşe Toprak, Zeynel Abîdîn Bûlût, Dogan Guler, Mehmet Şahîn, Elîf Ungur, Îbrahîm Koyûncû, Remzîye Temel û Mehmet Yalçin ameyî destbendkerdiş, Feynaz Koçûk zî di çerçewayê eynî cipersayîşî de Stenbol de ameya destbendkerdiş. 

 

Rojnamegêrî, di Mudurîyetê Ewleyîyê Amedî de girewtê û heta nika derheqê dosyayî de malûmat nêdayê avûkatan û her hetî ra reaksîyonî ameyî ramojnayîş. 

 

'Xeylêk çîyêke çapemenîya azade ra fam bikerê, estê' 

 

Endama Heyetê Îdarekarîya DÎSK Basin Îşî Elîf Akgul eşkera kerd ke AKP her ke ver bi peynîyê xo yeno tehda û şîdet zêde keno û wina vat: "Yew hetêke ra bi tewirêke tehda verê xo dayo rojnamegêrê ke Kurd ê. Çend rojî verî Hemsereka Komeleya Rojnamegêrê Dîcle Firatî(DFG) Dîcle Muftuoglû amî destbendkerdiş, bi sûcdarîya pereyî şawitê meslekdara xo rê amî rî bi rî. Amancê AKPyî tena fealîyetê çapemenîyî bikero binê tehdayî nîyo. Di eynî demî wazeno rojnamegêran tena verdo û hetkarî bişikno. Na tehda seba çapemenîya Kurdî newe nîya. Tarîxê çapemenîya Kurdî bi xoverdayîşî û sewbîna tehdayê hemverê înan de pirr ê. Ma ewro vînenê şîdet serê rojnamegêr û çapemenîya muxalîfî de zî estê. Di nê hetî de xeylêk çîyî ganî toreyê çapemenîya azade ra bêro banderbîyayîş, esto. Ma sey DÎSK Basin Îşî hetkarîyî embazanê xo rê domnenê. Vêşêrî hetkarî û organîzeyî çareyêke bîn çini yo." 

 

'Amanc no yo ke vengê çapemenî bibirno' 

 

Avûkatê Cigêrayîşê Çapemenî û Huqûqî(MLSA)yî ra Merve Kûrhan zî tehdayê hemverê rojnamegêran de seke hadreyîya weçînayîşî şîrove kerd û da zanayene ke her ke weçînayîş nizdî bibo îqtîdar tehdayê xo zêde keno û wina qal kerd: "Tirkîya di krîzêke giranî yê sîyasî û ekonomî de ya. Di prosesêk winayîn de girewtişê malûmatê rastî muhîmêr bîyê. Coka nê zî çapemenî rolê xo kay kena û rastê tehdayan yena. Amanc manîkerdişê heqîqetî yo. Destbendkerdişê rojnamegêran û destserkerdişê hacetan zî bi nê amancî ameyo kerdiş. Nê binpaykerdişê giranî yê heqê azadîya fikr û fehmî yê." 

 

'JINNEWS xebatêke muhîm û bi erj a' 

 

Merveye dîyar kerd ke hemverê çapemenîya Kurdî de tehdayî zêde bîyê û rojnamegêrê Kurdî di binê şertê giranî de xebetênê û no reaksîyon ramojna: "Rojnamegêrîya cinî zî bîya hedef. JINNEWS xebatêke muhîm û bi erj a. Destbendkerdişê xebatkaranê înan zirar dano nasname û heqê cinîyan. Netîce de tehdayê hemverê rojnamegêrîya cinîyan de, îşaretê ewnayîşê îqtîdarîya mêrdeyî yê hemverê cinîyan de yo." 

 

'Ganî çapemenî tena nêro verdayîş' 

 

Merveye peynîyê qiseyanê xo de wina qal kerd: "Di no proseso ke çapemenî azade nîya de, bi tehda û şîdetî hewl yeno dayîş bêro bêvengkerdiş, averkewtişê merdiman zî  babete ya vatişî nîya. Seba ke şar xo biresno heqîqetî ganî çapemenî bi tewirêke azad binusno. Pêwa heme polîtîkayê tehdayî û pelçiqnayîşî, Tirkîya de çapemenîya azade girêdayeyê etîkê meslekî fealîyet caanê. Ganî her kes bi îmkanê xo wayîr ro çapemenîyî vejîyo, reaksîyonê xo ramojno û bikewo hetkarîyî. Ganî heme rojnamegêrî  serbest bêrê veradayîş."