Şîrîn Çinar 

 

ÊLIH  - Îdarekara HDPyî ya Êlihî Gîzem Ûgûrlû, tecrîdê serê Rayberê PKKyî Abdullah Ocalanî de erjna û da zanayene ke seba qaxûyê komele werte ra wedarîyo ganî tecrîd bêro şiknayîş. 

 

Rayberê PKKyî Abdullah Ocalan, 23 serrî yo girawa Îmrali de binê tecrîdêko giran de yo. Avûkatanê ey bi serrêke zêdeyêrî yo muwekîlê xo ra malûmat nêgînê û seba pêvînayîşî muracatê ke yenê kerdiş zî, yenê redkerdiş. 

 

Gîzem Ûgûrlû ya ke Îdarekarîya HDPyê Êlihî de ca gêna, polîtîkayê tecrîdî yê bi tesîr serê her hetê komele de kerdo, erjna. 

 

'Beno sebebê qaxûyan’ 

 

Gîzeme da zanayene ke Rayberê PKKyî Abdullah Ocalan, serra 1999î ra ke ardê Tirkîya di binê tecrîdêke giran de yo û tecrîdo ke yeno caardiş, caardişêke sûcê merdimîyî yo. Gîzeme bale ante serê prosesê pêvînayîşê di Nîsane ya 2015î de ameyo kerdiş û wina dergî da qiseyanê xo: "Di Nîsane ya 2015î de, bi destpêkerdişê prosesê çareserîyî dir tecrîd kemî bo zî hinî şenik bîbî. Nê dir zî aramîyêke di komele de ame ca. La xerepnayîşê prosesî dir tecrîdo giran ame ca.  Nê zî rayîr ro verê qaxûyan akerd. No serrêke zêdeyêrî yo Birêz Ocalanî ra malûmat nîno girewtiş.  Serê nê de qaxûyî reyna zêde bîyî." 

 

'Tecrîd bî semedê problemêke cidî' 

 

Gîzeme sewbîna beyanat kerd ke seba qaxûyê komele werte ra wedarîyê û ciwîyayîşêke demokratîk bêro awankerdiş ganî tecrîdê serê Birêz Abdullah Ocalanî de yo wedarîyo û nê çî ardî ziwan: "Tecrîdê serê Birêz Ocalanî fotografo tewr pîl o ke caardişê polîtîkayê tecrîdî yê. Bêşik fotografê bînî zî xo serê şaran de danê ramojnayîş, zîndanan de dano ramojnayîş. Tepişteyê nêweşî para xo nê ra gênê. Zîndanan ra cenazeyî vejênê. Zindanê ke binê kontrolê dewlete de yê, cînan ra vejîyayîşê cenazeyan înfal o. Tecrîdî dir binpaykerdişê heqî yenê ciwîyayîş." 

 

'Hêrişî vera tecrîdê yenê ca' 

 

Gîzeme dîyar kerd ke tecrîdî tesîr serê her hetê komele de kerdo û wina qal kerd: "Polîtîkayê şerî zî tecrîdî ra xoser nîyê. Prosesê pandemîyî dir polîtîkayê şerî û tecrîdî xo bi tewirêke cîya da rayîrşîyayîş. Ewro malûmatê çapemenî zî yenê manîkerdiş. No tecrîd o. Pandemî de cinîyî hepsê keyeyî ameyî kerdiş, krîzê ekonomî vejîya sewîyeyo tewr cor. Nê heme girêdayeyê tecrîdî yê. Hêrişê Vaşur de domnenê zî, nê heme vera tecrîdî yenê ca. Mintiqa de polîtîkayê şerî yê xusûsî yenê kerdiş, serê ciwanan û cinîyan de polîtîkayê fuhûşî, zêhnbirnayîşî û ajanîyî yenê caardiş. Nê zî girêdayeyê tecrîdî yê. Kiştişê cinîyan zî girêdayeyê tecrîdî yê." 

 

'Ganî vindertişêke bi organîzekerde bêro ramojnayîş' 

 

Gîzeme di peynîyê qiseyanê xo de duştê tecrîdî û polîtîkayê şerê xusûsî de venga organîzebîyayîşî kerd û wina vat: "Tecrîd ancax bi ameyîşê verê yewbînan ê komele beno bêro şiknayîş. Ganî cinîyî bêrê têhet û têkoşîn pîl bikerê. Ganî seba şiknayîşê tecrîdî vindertişêke organîzekerde bêro ramojnayîş."