Marta Somek 

 

STENBOL  - Leyla Akyildize ke 3 reyî înfazê aye ame veşnayîş û di 4ê Gulane de Zîndanê Cinîyan ê Bakirkoyî ra amî tehlîyekerdiş wina vat: "Tecrîd sûcê merdimî yo. Ez sey kesêke newe ameya tehlîyekerdiş, waştişê min ê komele ra no yo ke duştê tecrîdî de bibê wayîrê tevr û vindertişêke." 

 

Zîndanan de tecrîd roj bi roje giranêr beno û hemverê tepişteyê sîyasî de polîtîkayêke yenê ca resayê sewîyeyêke xedar. Her hewte tepişteyêke 'bişik' ciwîya xo bedilneno/a, û întîxar ro tepişteyan yeno ferzkerdiş. Pêwa her çîyî tepişteyî dest têkoşînê xo ra vera nêdanê. Yew ê tepişteyan ra ke 5 serrî bî di Zîndanê Cinîyan ê Bakirkoyî de tepiştîbî, Leyla Akyildize bî. Leyla 4ê Gulane de Lorîn Înançe dir amî tehlîyekerdiş û bi coşêke pîl amî pêşwazîkerdiş. 

 

Leyla ajansê ma rê erjnayîş kerd. 

 

'Hîrê reyî înfazê mi ame veşnayîş' 

 

Leyla ke 5 serrî di Zîndanê Cinîyan ê Bakirkoyî de menda, verîyê ci zî prosesêke tepiştişî yê 5 serran ciwîyaya û wina vat: "Di serrî verê Heyetê Teqîbkerdişî û Îdareyî ame awankerdiş. No Heyet tehlîyeyê ma biameyêne zî di rewşa cade nêvînayêne tehlîye nêkerdêne. Hîrê reyî înfazê mi ame veşinayîş. 9 mengî ceza amî dergkerdiş. Çîyêke somut yê veşinayîşê înfazan çinî bî. Yew behaneyan ra ke tu asasê ci çinî yo 'Pêro unîversîteyî ra mezun bîyê muracatê KPSS û ALESî nêkerdê, no tesbît negatîf kerdo', yan zî 'Xizmetê manewîyê rehberî ra feyde nêgirewto' bî. La wexto ma waştêne ma vejîyê meydanê sporî, ma nêvetêne. Di pandemîyî de xora  bi tu tewirêke ma nêvetêne." 

 

'Qawuşê organîzekerdeyî behaneyê asasî bî' 

 

Leyla wina dergî da qiseyeyanê xo: "Yew behaneyo bîn ra zî no bî ke awe û ceryan zêde ameya şuxulnayîş bî. Heyetî, no negatîf erjna. Sewbîna vatî di cigêrayîşan de hetkarîya gardîyanan û personelan nêkerdê bî. Qawuşa ma qawuşêke organîzekerde ameyêne naskerdene û vera ke qawuşa ma de ciwîyêke kolektîfe asase bî, no bî behaneyê tehlîyenêkerdişê mi.  Şîyayîşê nê qawuşan manî kerdêne. Verê merdiman dayêne qawuşê xoser yan zî îtîrafkerdoxî. Wexto ma duştê nê de reaksîyon ramojnayêne na nizdîyîya negatîfî ameyêne vînayîş." 

 

'Mantiqê zîndanî bi xo tecrîd o' 

 

Leyla dîyar kerd ke, tu hetê qanûnî û huqûqî yê veşnayîşê înfazan çinî bî û wina qal kerd: "Heyetê Teqîbkerdişî gardîyanan û muduran ra ameyêne ca, tu hetê înan ê qanûnî û perwerdeyê huqûqî çinîbî. Gelo no senîn beno ke nêverdenê ma vejîyê teber. Bi rastî merdim hetê famkerdişî de zametîyan anceno. Nê merdimî  wayîrê xusûsîyêke qerarê nê bidê, nîyê. No heyet bi pêroyî seba veşinayîşê înfazan ameyo awankerdiş. Mantiqê zîndanan bi xo mantiqê tecrîdî yo. Dimayê OHALî caardişê tecrîdî û îşkenceyî vejîya sewîyeyo tewr cor. Her çî ameyêne qedexekerdiş, deyîrî zî sey sûcî yenê vînayîş." 

 

'Deyîrê Kurdkî vatî înfaz ame veşnayîş' 

 

Leyla dîyar kerd ke di 15ê Tebaxe de seba ke embazanê xo dir deyîrê Kurdkî vatê û govende çarnayê derheqê înan de cipersayîş ameyo destpêkerdiş û wina vat: "Seba Deyîra Kurdkî vatê ‘rewşa başe nîya' ra: 2-3 hewteyî tehlîyeyê ma rê mendbî, la tehlîye veşnayî. Xeylêk cipersayîşî akerdî. Bi behaneyê pandemî, xeynê kesê ke yenê serdayîşî seki bîn nêeşkayêne kesê ke dir qiseykerdiş bêro kerdiş, 25 deqeyî pêvînayîşî estê û no bi xo tecrîdbî. Pêroyê tepişteyê edlî bi pêvînayîşê telefonî yê dîyayîşkîyî ra feyde gênê, la tepişteyê sîyasî feyde nêgînê. Goreyê pozîsyonê muhakemekerdişî nizdîyî yenê ramojnayîş. Ma heme vera ke cinîyê û nasnameyê ma zî Kurd o, ma yenê cezakerdiş." 

 

'Polîtîkaya heyfgirewtişî' 

 

Leyla qal kerd ke di nê nuqteyî de hêsgirîya komele qels manena û wina beyanat kerd: "Bakirkoy cayêke merkezî de yo. Seba embazê ma tena nêmanê û ma ro înan wayîr vejîyê ganî ma hewl bidê. Ma eşkenê hêsgirî awan bikerê. Ganî ma wayîr ro tepişteyan vejîyê. Embazê ke 30 serrî yo tepişteyê û çend mengî tehlîyeyê înan ra mendo yenê înfazkerdiş. Ma xeylêke tesîr de manenê. Nê girêdayeyê polîtîkayê îqtîdarî yê. Coka ke nê bi rastî polîtîkayê heyfgirewtişî yê. Embazê ke tena di hucreyî de manenê ciwîya înan zaf giran a. Hetê psîkolojîkî ra şertê giranî yenê ciwîyayîş. Tepişteyî  şîdetê psîkolojîkî dir yenê rî bi rî. Ez wexto şîya dadgehe û ameya di hucre de menda. Hetê alerjîyî ra her cayê mi weremîya. Seba ê mi berê dixtorî, mi xeylêk hewl da. Ez şîya dixtorî, dixtorî mi ra vat no çîyêke talûke yo. Zindan de padayîşê awe zî hîrê rojê merdiman gêno. Înfazê tepişteyê ke di hucre de manenê zî bişik ê. Tecrîd giranêr bîyo. Dewlete qestê ganê merdiman kena. Ma na nizdîyî zî nizdî ra vîna." 

 

'Ganî duştê tecrîdî de merdimî wayîrê tevrî bê' 

 

Leyla di peynîyê qiseyanê xo de qal kerd ke tecrîd sûcê merdimîyî yo û wina peynî ro ci ard: "Tecrîdo ke bi serran o domneno esto û komele bandêrê nê beno. No şermê ma heminan o. Ganî komele bandêrê nê nêbo. Ez seke kesêke newe ameya tehlîyekerdiş waştişê mi no yo ke,  wa ma bandêrê na rewşe nêbê û duştê nê de bibê wayîrê tevrî."