ANQARA - Hemsereka HDPyî ya Anqarayî Pakîze Sînemîllîogulari reaksîyonî mojna destbendkerdişê hemverê HDK, HDP û GOÇ-ÎZDERî  û vat: "AKP û MHP hêrsê vindîkerdişî, cinîyan ra, bindestan ra gênê. Her ke di operasyonê hemverê Vaşurî de vindî kenê, hêrişê ma kenê." 

 

AKP û MHP konseptê şerî û tehdayan giran kenê û hemverê Partîya Demokratîke ya Şaran(HDP)î de zî tehdayê xo domnenê. Di 3yê Hezîrane ya serê sibayî de Merkezê Pêroyî yê Kongreya Demokratîke ya Şaran(HDK)ê Beyoglûyê Stenbolî, hetê polîsan ra di çarçewaya cipersayîşê Serdozgerîya Komare ya Tekîrdagî ra amebi kerdiş de, sereştiş ame kerdiş. Sewbîna di xeylêk merkezê bîn de zî sereştişî ameyî ca û xeylêk merdimî ameyî destbendkerdiş. Sîyasetmedarê cinîyî yê Anqarayî reaksîyon ramojnayî hêrişan. 

 

'Hendê ke quwet vindî kenê hêriş kenê' 

 

Hemsereka HDPyê Anqarayî Pakîze Sînemîllîogulari da zanayene ke her roje bi tehda û serdegirewtişê neweyî aya benê û vat: "Di nê welatî de HDPbîyayîş zî sûc yeno hesebnayîş. Bi xusûsî tehda hemverê cinîyan de yenê ca. Êlih de cinîyî ameyî destbendkerdiş û tepiştiş. Xeylêk çîyî bêrê vatiş estê. AKP û hetkarê xo MHP her roje hêzê xo vindî kenê û bedelê ci zî cinî û bindestan ra vejenê. Vaşur de operasyonêke dewam keno, esto. Hendê ke quwetê xo vindî kenê hêrişê ma kenê. Heme dinya zanena ke cinîyî duştê DAÎŞî de xo ver danê, estê. La AKP-MHP nê qebûl nêkenê û bi xusûsî serê  cinîyan û Şarê Kurdî de zilm anê ca." 

 

'Bedelê waştişê aştî giran o' 

 

Pakîzeye eşkera kerd ke, ê nê welatî de aştî wazenê, şer nêwazenê û wina derg kerd: "Bi xusûsî cinîyî aştî wazenê. Bedelê nê zî zamet o. Ma HDPyîjî û HDKyîjî bedelê nê danê. Duştê apeyşîyayîşê xo de verê xo danê ma. La çi bikerê zî ma do qezenc bikerê. Ma aştîyêke bi rûmete wazenê. Ma nêwazenê eskerî û gerîllayî ciwîya xo bibedelnê. Pereyê ma danê tanq û topan. Bedelê netîceyê ci zî ma ra gênê. Nê hewldayîşê înan ê peynî yê."

 

'Bîyayîşê fikrî,  îqtîdarî tersneno' 

 

Endama Meclîsî ya Pêroyî yê HDKyî Fatma Koçyîgît zî reaksîyonî ramojnayî hêrişan û wina qal kerd: "HDP de fikrê kongreyêke heme bawerîyê cîyayî hewêneno, esto. Di proseso ke hukmat nêeşkeno xo îdare bikero, verê xo dano HDP, HDK û caardişê înan. HDK fikrêke heme merdimê ke xo ci de îfade kenê, esto. No zî îqtîdarî tersneno. Vera nê hemverê HDP, HDK û caardişê cînan de operasyonan keno. Xeynê hayîdarî bidê vervatoxanê ma, kewenê HDKyî, cigêrayîş kenê û raporan gênê. Dest da serê kompîtoran, belgeyê dîjîtalî destser kerdî. Nê eksê huqûqî yê. Serê dosya de qerarê nimitişî estê. Embazê ma eksê huqûqî de ameyî destbendkerdiş. La ma vanê komele bi nê caardişan bêveng nêmaneno. Ma bi tewirêke benê verpersê înan." 

 

'Ganî têkoşînê demokrasîyî bêro dayîş' 

 

Sereka Partîya Şorişgêrî ya Anqarayî Ezgî Eylem Dagdevîren zî dîyar kerd ke sebebê hêrişan krîzê îdarenêkerdişê îqtîdarî yo û wina peynî ro ci ard: "AKP-MHP kewtê pozîsyonêke hêrişkerdoxîyî. Serranê 90yî ra heta nika hêrişî domnenê. Serê Abdullah Ocalanî de tecrîdêke giran esto û hêrişê zîndanan zêde bîyê. Sîstem nêeşkeno xo îdame bikero kayê xo yê peynî kay keno. HDP û HDK bi xeylêk caameyê xo dir hêzê têkoşînî pîl kenê. Coka nê her tim ma hedef ramojnenê. Di nê rojan de vêşêrî yewiyî ra altefnatîfê ma çinî yo. Duştê polîtîkayê şerî de ganî têkoşînê demokrasîyî bêro dayîş."