RIHA - "Nobeta Edaletî" ya keyeyê Şenyaşarî 452 rojî yo dewam kena. Keyeyî diyar kerd ke hêzê serdest yê dewaya înan de pêwa ke temamê hêzê dewlete bi kar ardî zî la bi tena mendî. 

 

Merdim û pawitoxê parlamenterê AKPyî Îbrahîm Halîl Yildizî 14ê hezîrana serra 2018ine de qezaya Pirsûsî ya Rihayî de hêrişê dikanê keyeyê Şenyaşarî kerd. Hêriş de mêrde û 2 lajê dadîya Emîne Şenyaşar ameyî qetilkerdiş û lajê ci Ferît Şenyaşar zî bi birîndarî xelas bi. Seba tepiştiş û muhakemekerdişê kiştoxan, Emîne û Ferît Şenyaşar 9ê adara serra 2021ine de vernîya Edliyeya Rihayî de dest bi çalaîya Nobeta Edaletî kerdî. Çalakîya keyeyî roja 452ine de dewam kerd. Keye saetê serê sibayî de Pirsûs ra ameyî verê berê Edliyeyê Rihayî û dest bi çalakiya xo kerdî. Keyeyî, wextê ameyîş û şîyayîşê welatijan de derheqê dewa de zanayîş da înan.

 

Derheqê babete de keyeyî serê hesabê xo yê medyaya dîjîtalî de Wezaretê Edaletî etîket kerd û nê mesajî pare kerd: “Serdestê dewa ma de pêwa ke heme hêzê dewlete bi kar ardî zî tena mendî. Her zûrêk beno deyndarê rastî û rastiyê de no deynê xo girewto. Yê ke wazenê hetê şarê Rihayî ra bêrê qebûlkerdiş, ganî vernîya Edliyeyê Rihayî de bê…”