Medya Uren 

 

MÊRDÎN - Citêrê qezaya Sewre dayî zanayene ke vewr û varano ke no dimayî de ameyo, ê krîz ra nêxelesnayê û wina vatî: "Problem tena ameyîşê teyrrike û seqemî ra vêşinayîşê daran nîyo. Çi heyf ke ma nêeşkenê şitlan zî biherênê yan zî toxim biherênê. Ê ke ma ramitê zî teyrrike çinî kerdê. Varano ke ameyo zî erey vara. Zad wuşk bîyo herinde de vara. Emser berardiş çinî yo. Ma zî betalê, keye de yê. Sebebê krîzî dewlete ya." 

 

Nê çend serrê peynî de krîzo bîyaye bi pêlêke pîl berz bî. Vaybîyayîşê mazot, gubre û toximê xidayî seba citkaran bî sebebê problemê pîlî. Varanê emserî yo ameyo tayê seba citkaran bibo umîd zî teyrrika ke amî umîdo bîyaye zî vindî kerd. Welatijê qezaya Sewre ya girêdayeya Mêrdînî vanê emsar rewşa înan her serre ra xirabêr ra û çêrazî, gozî û engurî hema vajê zergûn nêbîyî. Derheqê babete ma mîkrofonê xo dergê cinîyê kedkarê ramitişî kerdî. 

 

'Ma do nêeşkê emsar bastêq û sincûqan virazê' 

 

Cemîle Erdeme sere ra qalê dewe kerd û vat: "Ma debara xo bi çînayîşî kenê. Bi xusûsî zî bi gozan, engure û çêrazan. Hinî keyfê ma ame, ma vat varan ame, do berardiş zî zêde bo. Labelê çi heyf ke varanî dir teyrrike zî amî. Çîyê ke sereyê xo wedarito zî pelexîya. Vera serdî zergûnîya ma vêşaya. Emsar gozî, engure û çêrazê ma çinî yê. Do tayê engure bigîro la a zî qîm nêkena. Ma do nêeşkê emsar bastêq û sincûqan virazê. Ancax bes ê dimsê ma bikero. Sewbîna seba çînayîşê herdî zî xeylêk îmkanê ma çinî yê. Gubreyî ra heta mazotî û toximê fîkîyan her çî vay bîyê. Ma do zî emsar hewl bidê debara xo bi firingî û îsotî bikerê." 

 

'Ma nêeşkenê nanê xo vejê' 

 

Nazîme Tanike zî dîyar kerd ke no problemê berardişî demêke derg o dewam keno û wina vat: "Di çend serrê dimayî de hetêke zuwabîyayîşî awe û hetêke ra  zî krîzê ekonomî rewşa ma fîna talûkeyî. Vera ke ma nê dewan de ekonomîya xo tena bi çînayîşî kenê. Bi xusûsî zî bi çêrazan, gozan û engure ma serra xo vîyarinenê. Labelê çi heyf ke emsar ê çinî yê. Seba cite zî motore lazim a û seba ci zî mazot tewr kemî do 5 hezar şêro. Ez tena herdê xo rê bidî xebetnayîş zî 10 hezarî ra kemêrî nêbeno. Mazotê ci yo, gubreyê ci yo û sewbîna xebata ci ya heme zî vay bîyê. Ma do nêeşkê nanê xo vejê." 

 

'Verpersîyarê krîzî dewlete ya' 

 

Nûrê Aydine ya ke vana verpersê krîzî dewlete ya zî wina ci de şî: "Problem tena ameyîşê teyrrike û seqemî ra veşinayîşê daran nîyo. Çi heyf ke ma nêeşkenê şitlan zî biherênê yan zî toximî biherênê. Ê ke ma ramitê zî teyrrike çinî kerd. Varano ameyo zî erey vara. Zad wuşk bîyo herinde de varan vara. Emsar berardiş çinî yo. Ma zî betal ê, keye de yê. Sebebê krîzî dewlete ya. Varan û vewre ma çinîbîyayîşî ra nêxelesna."