ŞIRNEX - Mintiqa de talankerdişê xoza û operasyonê ke ameyê destpêkerdiş dewam kenê. Welatijê Şirnexî, reaksîyon nîşanê rewşe dayî û dîyar kerdî ke vera nê hêrişan ganî tu kes bêveng nêmano û vatî: “Serranê 90î de dewê ma ameyî veşnayîş û wêrankerdiş, Ewro zî dar û daristanê ma yenê birnayîş û talankerdiş. Hemverê talankerdiş û operasyonê ke koyanê ma de yê tu kes bêveng nêmano.”

 

Çarçewaya hêrişê eskerî de birnayîşê daran ke mintiqayê Besta, Koyê Cûdî û Gabarî dest pêkerdo, bêmabên dewam keno. Qorîcîyê ke bajarokê Sêgirkî û Hîlalî yê qezaya Qilebanî ra yenê şawitiş, Cûdî, Gabar û Besta de qirkerdişê xoza kenê. Sewbîna 30ê Nîsane de netîceyê operasyonê Koyê Cûdî de amebi kerdiş 8 eskerî amebî kiştiş. Operasyonê ke amebi destpêkerdiş, bi hawayêk xidar bêmabên dewam keno. Dimayê operasyonî ameyî destpêkerdiş 11ê Gulane de dewanê Avgamasiya, Serêdehlê û Şilerît yê Şirnexî ke kilê Koyê Cûdî de yê dekewtiş û vejîyayîşê înan ame qedexekerdiş û hema dewam keno.

 

Cinîyê Şirnexijî, reaksîyon vera talankerdişê xoza û operasyonê ke mintiqa de ameyê destpêkerdiş û vatî wa tu kes bêveng nêmano.

 

‘Dewa ke ma ci ra ameyî vetiş yena talankerdiş’

 

Fatma Kabul ke dewa Avyane ra ya û mintiqaya Bestayî ra ya, serra 92ine de seba polîtîkayê qorîcî û vengkerdişê dewan bi keyeyê xo mecbûr menda Şirnex de ca bibo. Fatma, wina vat: “Demo ke ma ameyî tîya ma xo rê heywanî wey kerdî û keye viraşt. Ma wazenê  agêrê dewa xo û uca de biciwîyê. Ewro çîyê ke ma rê yeno kerdiş îşkence yo. Ma xeylêk bêrîye cuya xo ya dewe kerda.  La ma vînenê ke daristanê ke koyî de yê û dewa ma heme yenê birnayîş. Ma nêwazenê daristanê ma bêrê birnayîş û xozaya ma bêro talankerdiş. Qorîcî şinê û heme darê ma birnenê. Hetêk qorîcî darê ma birnenê, hetêk ra zî koyê ma de operasyon estê. Seba nê darî birnayî û operasyonan ra zî kes nêeşkeno kom bikero. Gama ma şinê qorîcî ma asteng kenê. Qorîcî zî merdimê na herre yê. Labelê seba çend qirûşan xo roşenê û daranê ma heme birnenê. Ma venga qorîcîyan kenê; fek birnayîşê daranê ma ra vera bidê. Ma dişminî nêwazenê. Ma nêwazenê gonî birijîyo. Wa no operasyon û birnayîşê daran peynî bibo. Ma weşî û têduştî wazenê. Wa no şer êdî vindero. Dewa ma wêran kerdî, ewro zî xozaya ma talan kenê û koyanê ma gulevaran kenê.”

 

‘Hetêk ra darî yenê birnayîş, hetêk ra zî operasyon esto’ 

 

Derya Kabul ke dewa Avyane ra ya vat, hêvî kena rojêke agêro dewa xo û wina vat: “Ma xeylêk vîrîya dewa xo kerda. Ma zî wazenê rojêke agêrê dewa xo. Verê dewa ma ameye xirakerdiş, ewro zî xozaya ma yena çinkerdiş. Qorîcî heme darê ma yê dewan û koyan birnayî. Xoza seba ma nêverdayî. Darê dewa ma zî par ameyî birnayîş, emsar zî hema destpê nêkerdê. Nika Besta de heme cayan darî yenê birnayîş. Ma nêwazenê herre û welatê ma talan bikerê. Heto bîn ra zî koyanê ma de operasyonî estê. Seba nê operayonan ma nêeşkenê şêrê koyanê xo de pincar kom bikerê. Wa destê xo xoza û daranê ma ra biancê. Seba nê operasyonan her roj koyanê ma gulevaran kenê. Cûdî verê ma de yo û wexto ke ma vînenê zerrîya ma veşena. Vera nê talan û operayonan wa tu kes bêveng nêmano.”

 

'Ganî ma bibê yew' 

 

Besna Aslane zî dîyar kerd ke bi serran o herd û welatê Kurdan yeno talankerdiş û îşxalkerdiş û êdî ciwîyêke azade û arame wazenê. Besna nê çîyî vatî : "No bi serran o şer yeno rayrayîş û xozayê ma yeno talankerdiş. Ma operasyon û şer nêwazenê. Ma kiştiş nêwazenê. Ma nêwazenê wurdî hetan ra zî kesêke ciwîya xo bibedelno. Ma her roje duayan kenê ke  seba no şer vindero û weşîyêke bikewo nê welatî. Hemverê heme hêrişan de ganî ma bibê yew." 

 

'Polîtîkayê serrê 90yî ewro bi tewirêke cîyayî yenê rayrayîş' 

 

Aysel Akdemîre zî reaksîyon mojna talankerdişê xozayî û operasyonan de û waşt ke peynî ro nê caardişan bêro. Aysele wina dewam kerd: "Qurûcî seba cend quruşî peran şinê daranê ma birnenê. Seba çend quruşan wa welatê xo nêroşê!  Him dewî û koyê ma qesexe kerdê û him zî heme daranê ma ewro birnenê. Her cayê welatê ma îşxal kerdê. Bi birnayîşê daran wazenê welatê ma çinî bikerê û ma reyêke bîn anêgêrê serê herdê xo. Di serranê 90yî de senîn dewê ma xerepnayî û verê ma da şaristanan, nika zî seba ma anêgêrê dewanê xo nê çîyî kenê. Roj roje ya wayîrvejîyayîşî ya koyî û daristananê ma ya. Eke ma ewro wayîr ro ci nêjejîyê ke ma do meşte de xeylêk erey bikewê. Qurûcîyêke seba çend quruşan daran birnenê, çîyêke ne ehlaqî yê û nê zî komelkî yê. Ma nê tu reyî qebûl nêkenê. Ganî komele zî hemverê nê talankerdişî de bêveng nêmano û wurzo serê payan.  Ma çim û goşê xo panêdanê. Polîtîkayê serrê 90yî ewro bi tewirêke cîya serê koyanê ma de danê rayrayîş.  Seba ke ma anêgêrê herdê xo ewro ê darî yenê birnayîş. 

 

'Şer çareserî nîyo' 

 

Aysele bale ante serê hêrişê hemverê Başurî de ke hetkarîya Tirkîya, Berzanî û wina pêl da qiseyanê xo: "Ma Berzanî zî şermezar kenê. Herinda ke Kurdî heme bibê yew, o şino neyarîya Şarê Kurdî keno. Ganî seyyewbînî û yewîyî di mîyanê ma de bibîyêne. La çi heyf ke neyaranê  Kurdan dir bîyo yew,  duştê ma de şer keno. Hetêke nê ra zî koyanê Cûdî, Gebar û Bestayî de operasyonî yenê rayrayîş. Hemverê nê hêrişan de ganî ma bibê yew. Ganî seyyewbînî û yewiyî bibo. Wa nê operasyonî peynî bibê! No bi serran o şer yeno rayrayîş. Şer çareserî nîyo. Ganî ewro yewîyîya Kurdan bibo. Welat de hetê ke operasyonî yenê kerdiş, hetêke ra  zî darî yenê birnayîş. Ewro her cayê Kurdistanî de şer esto.  Bi  nê hêrişan wazenê ma Kurdan çinî bikerê. Nêwazenê pero-pîyayî ya ma Kurdan bibo. Seba ke no şer hel bibo ganî Kurdî bibê yew. Eke ma ewro vengê xo berz nêkerê ke do meşte xeylêk erey bo." 

 

'Ma tu reyî herd û welatê xo ra fek vera nêdanê' 

 

Gulla Çevîke zî da zanayene ke, ê nêwazenê darî û daristanê înan bêrê birnayîş û veşinayîş û wina qal kerd: "Dewlete ya Tirkî dest dayo serê dararanê ma. Hetêke ra darê ma yenê birnayîş, hetêke bîn ra zî koyê ma yenê gulevarankerdiş. Verê çimanê ma de darî yenê birnayîş, koyî yenê gulevarankerdiş. Zerrîya ma vêşena. Bi tonan darê ma ameyî birnayîş û her kes bêveng o. Kesêke duştê nê de vengê xo berz nêkeno. Hemverê nê talan û operasyonan de ganî ma vengê xo berz bikerê. Ganî şarî weçînayîşî de vengê xo seba merdimê rastî bixebetnê û vernîyê nê îşxalkerdişî de vinderê. Ê çi daran û daristananê ma ra wazenê? Coka nê birnayîşê daran û îşxalkerdişî ma nêeşkenê şêrê koyan xo rê tarûtûr arê bidê û bîyarê. Heme ro ma ameyê qedexekerdiş. Vergan verê xo dayo daristanan û şaristananê ma. Rusya hêrişê Ukraynayî kerd, heme dewletê dinyayî wariştî serê payan.  Di mîyanê nê dewletan de Erdogan zî bîbî. Kesêke duştê  şerê weyrayî de vindeno çirê şaristanê Kurdan xerepneno? Erdoganî bi şer; Cizîr, Şirnex,  Silopî,  Nêsêbîn û Sûrê Amedî xerepna. Ewro zî bi talankerdiş û operasyonan xerepneno. La ma tu reyî fek herd û welatê xo ra vera nêdanê."