RIHA - Çalakîya "Nobeta Edaletî" ya keyeyê Şenyaşarî roja 448ine de dewam kerd. Keyeyî çalakîya xo ya ewro de nê mesajî pare kerd: “Tu astengî nêeşkenê xo vernîya îradeyê xurt bigîrê.” 

 

Merdim û pawitoxê parlamenterê AKPyî Îbrahîm Halîl Yildiz 14ê hezîrana serra 2018ine de qezaya Pirsûsî ya Rihayî de hêrişê dikanê keyeyê Şenyaşarî kerd. Hêriş de mêrde û 2 lajê dayîka Emîne Şenyaşar ameyî qetilkerdiş û lajê ci Ferît Şenyaşar zî bi birîndarî xelas bi. Seba tepiştiş û muhakemekerdişê kiştoxan, Emîne û Ferît Şenyaşar 9ê adara serra 2021ine de vernîya Edliyeyê Rihayî dest bi çalakiya Nobeta Edaletî kerdî. Çalakîya keyeyî roja 448ine de zî dewam kerd. Dayîka Emîne seba ke nêweş bî, nêeşka beşdarê nobete bibo la Ferît Şenyaşar ame verê berê edlîye û “Quncikê edaletî yê keyeyê Şenyaşarî” dest bi çalakîya xo kerd.

 

Keyeyî derheqê babete de serê hesaba xo yê medyaya dîjîtalî de nê mesajî pare kerd: “Tu astengî nêeşkenê xo vernîya îradeyê xurtî bigîrê. Têkoşînê ma yê seba ya ‘Cuyêka Adilane, Ameyoxêke Birûmet’ verê edlîye de roja 448ine de dewam keno…”