Zelal Tûnç 

 

WAN - Dadîyanê Aştîye eşkera kerdî ke, ê duştê binpaykerdişê heqê hemverê tepişteyan de bêveng nêmanenê û bi hetkarîya merdimê tepişteyan ê Nobeta Edaletî de yê, do dewam bikerê. Dadîyan eşkera kerdî ke ganî Makbûle Ozere ya ke 80 serrî ya lezkî bêro veradayîş. 

 

Zîndanan de binpaykerdişê heqan domnenê û duştê binpaykerdişê heqan de vengî û malûmatî zî domnenê. Heto bîn ra zî Amed, Stenbol,  Îzmîr û Wanî de bi serekîya keyeyê nêweş û tepişteyê ke înfazê înan ameyê veşinayîş 'Nobetê Edaletî' ameyê destpêkerdiş zî dewam kenê. 

 

Nobeta Wanî de ame waştiş ke verê ATKyî de protesto bêrokerdiş Walîyî her reyî bi behaneyê qedexeyê çalakîyan manî kerd û keyeyan reaksîyon ramojnayî û vatî do çalakîya xo bidomnê. 

 

Endamê Meclîsê Dadîyanê Aştîye derheqê binpaykerdişê heqan ê hemverê tepişteyan de erjnayîş kerdî. 

 

'Wa kes bêveng nêmano' 

 

Dadîya Aştî Zekîye Kaya da zanayene ke di çarçewaya çalakîya Nobeta Edaletî de waştî verê awanîya ATKyî de çalakîya xo bîyarê ca, la Walîyî qedexe kerdo behane û wina vat: "Tutê ma zîndanan de binpaykerdişan dir yenê rî bi rî. Tepişteyê nêweşî nînê dermankerdiş. Ganî lezkî tepişteyê nêweşî bêrê veradayîş. Ganî îqtîdar dest polîtîkayê şerî ra verado û çareserî bîyaro ca. Bi mengano hemverê qîrrayîşê dadîyan de, otorîterî kerr û lal ê. No sîyaseto lîşin seba ke cayê înan destê înan ra nêşêro caanê. Wa vengê ma bieşnawê û bêveng nêmanê. Wa dadî dejê tutanê xo nêvînê. Wa no şer o lîşin vindero û sîlehî bêveng bê! Wa heme kesî destê xo dergê azadî û aştî bikerê. Merg çareserî nîyo. Yewin çareserî aştî ya." 

 

'Na bêedaletîyêke senîn a?' 

 

Dadîya Aştî Hatîce Akdogane zî dîyar kerd ke Tirkîya de edalet nêmendo û wina ci de şî: "Makbûle Ozere ya ke 80 serrî ya, 9ê Gulane de ameya tepiştiş rewşa aye yê weşîyî baş nîya. Rewşa aye her ke şina xerepêna. Gelo kesê ke 80 serre do talûkeyêke senîn awan bikero? Makbûleye 18 rojî yo tepişteya. Tepiştişê dadîya Makbûle rast nîyo. Na bêedaletîyêka pîl a. No nêbeno bêro qebûlkerdiş. Wa tepişteyî bêrê veradayîş. Wa no şer peynî bibo û peynî ro nê zilmî bêro." 

 

'Edalet werte de yo' 

 

Dadîya Aştî Besna Aydogan zî reaksîyon mojna binpaykerdişê zîndanan de yê û wina beyanat da: "Wa her kes bêro veradayîş. Wa dadî tutanê xo verare bikerê. Wa peynî ro nê zilmî bêro. Dadîya Makbûle ya 80 serrî û mêrdeyê aye Hadî ameyî tepiştiş. No nêbeno bêro qebûlkerdiş. Nê welatî de edalet û huqûq nêmendo. Roje ya ma di Meclîsa Dadîyê Aştî de yê heta nika derheqê ma de cipersayîşî yenê akerdiş. La ma vêşêrî aştî çîyêke nêwaşto. Ma nêwazenê zîndanan de kes ciwîya xo bibedelno. Kam fekê xo akeno, yeno tepiştiş. Edaletê nê welatî werte de yo." 

 

'Ganî lezkî Aysele bêro veradayîş' 

 

Besnaye sewbîna bale ante serê rewşa sîyasetmedara Kurde Leyla Guvene û tepişteya nêweşe ya û sîyasetmedara Kurde Aysel Tugluke û wina veng kerd: "Leyla Guvene merdimêka mîyanê ma ra ya, sewbîna Aysel Tugluke zî. Ma nê bi rayê xo weçînayê. Aysele nêweşe ya giran a. Ganî Aysele lezkî bêro veradayîş. Ma edalet û azadî wazenê."