STENBOL  - Dadîyê Şemeyî reaksîyon vera destbendkerdişê Dadîya Şemeyî Henîfe Yildize û tehdayê hemverê têkoşînê înan de yê, ramojnayî û eşkera kerdî ke têkoşînê înan tu reyî nêqedîya yo û do nêqedîyo. 

 

Şubeyê ÎHDyê Stenbolî, Dadîyê Şemeyî û Weqfê Heqê Merdiman ê Tirkîya (TÎHV) bi malûmatê verê Edlîyeyê Stenbolî de dest bi programê 'Hewteyê Têkoşînê Duştê Vinîkerdişî yê Mîyanneteweyî' yê 17 û 31ê Gulane kerdî. Xeylêk merdimê vindîyîyan, avûkatê heqê merdiman, sîyasetmedarî û huqûqnasî tewirê malûmatî bîyî. Dimayê malûmatî dadîya Mûrat Yildizî ke 27 serrî verî seba îfadeyî şi emnîyet û uca de ame vindîkerdiş, Hanîfe Yildiz seba reaksîyon ramojnabî Wezaretê Karê Zerî Suleyman Soylûyî rê, herdî ra amîbî kaşkerdiş, bi îşkence amîbî destbendkerdiş û dimayê îfadeyî amî veradayîş. 

 

Hemsereka ÎHDyê Stenbolî Gulseren Yolerî û waya Hasan Ocakî yo ke 1995î de ame vindîkerdiş Masîde Ocake derheqê tehdan de qisey kerdî û reaksîyon mojnayî binpaykerdişê heqan. 

 

'Duştê merdimîyî de sûc' 

 

Gulseren Yolerî dîyar kerd ke nezaret de vindîkerdiş sûcê duştê merdimîyî yo û wina vat: "No sûc tena Tirkîya de ney,  heme dinya de yeno kerdiş û hetê ci yo bêro pawitiş çinî yo. Hewldayîşê dewlete no yo ke sûc binimno û reaksîyonê neteweyî û mîyanneteweyî binimno, vernî ro reaksîyonan pado. Eke no sûc bêro nimitiş ganî vernî ro edaletî bêro padayîş.  Ganî o sûc bêceza bêro verdayîş. Dewlete hetêke sûc duştê merdimîyî de kena, heto bîn de zî nimnena. Hem komele hem zî muxalefetî bi destbendkerdişî tehdîd kena." 

 

'Qaxû esto' 

 

Gulseren dîyar kerd ke îqtîdar bi qaxûyo ke rastî vejîyê werte wazeno vernî ro Dadîyê Şemeyî pado û Meydanê Galatasarayî bido vîrîrakerdiş û nê çîyî beyanat kerd: "Ê ke wazenê edalet û heqîqetî manî bikerê, nêwazenê şar xo biresno heqîqetî û di hişan de ca bigîro. Wazenê Dadîyê Şemeyî bêveng bikerê. Ma baş nînan zanenê, qaxûyê înan estê û coka nê hêriş û manîyan anê ca." 

 

'Wazenê bipelçeqnê' 

 

Gulseren qiseyanê xo de bale ante serê 'Hewteyê Têkoşînê Duştê Vindîkerdişî' û wina vat: "Dadîya Şemeyî Henîfe Yildize bi îşkence amî destbendkerdiş. Ma beyanat da, la nêeşkayî hêrişê beyanatî bikerê û manî bikerê. Dejê nê zî bi pelçiqnayîşê komele kerdî. Vera vatişê dadîya Hanîfe yê derheqê Suleyman Soylû de, a destbendkerdî. Eke huqûq destûr bido belgeyêke bibo merdimî şinê îfade danê. Usûl no wo. Bizor destbendkerdiş mimkun nîyo.  La wazenê bi tehda komele bipelçeqnê. Dadîya Hanîfe ra persenê vanê 'Ti poşman a?' A zî vana 'Mi sûc nêkerdo, ma heqdar ê. Şima her tim hesabê çîyê fekê ma ra vejênê kenê. Ma hesabê çîyê ma ra ameyê girewtiş kenê. Dewlete zî bêçareya ma fam bikero, verpersîyar a'. Verpersê nê xeylêk zelal ê. Pêwa tehdayan do têkoşîn dewam bikero. " 

 

'Têkoşîn tu reyî nêqedîya'

 

Masîde Ocake zî da zanayene ke, ê bi saîkê polîtîkî hereket nêkenê, ê seba dejê antişî û seba xo biresnê heskerdoxanê xo, têkoşîn kenê û bi qerarê. Masîdeye reaksîyon mot hêriş û tehdayan û wina vat: "Hêzê sîyasî heta eşkenê wa hetê hemverê ma bê. La tu hêz nêeşkeno vernîyê ma de vindero. Ma Tebaxe ya 1998î ra heta Adare ya 1999î, 30 hewteyê xo nezaret de derbas kerdbî. Galatasaray reyna ma rê amîbî qedexekerdiş. Dimayê serran pey ra bo zî ma şîyî meydan û ma fotografê vindîyîyanê xo aliqnayî. Na têkoşîne tu reyî nêqedîya do nêqedîyo zî!  Ma soz da yo heskerdoxanê xo, ma dewam kerd û ma do dewam bikerê!" 

 

'Ma efû nêkenê' 

 

Masîdeye bale ante serê duşthuqûqîyê hemverê dadîya Hanîfe de û qal kerd ke ganî her kes duştê nê duşthuqûqîyî de vindero û têkoşînê xo bikerê. Masîdeye wina peynî ro ci ard: "Ma veng ro heme kesan kenê ke dimayê waştişê ma de vinderê. Têkoşînê vindîyîyan tena têkoşînp merdimanê vindîyîyan nîyo. Vindîyê ma her meslekî ra bî, her komele ra û her fikrê sîyasî ra bîyê. Coka nê ma heme bibê yew. Ma tu reyî dest têkoşîn ra vera nêdanê! Ma efû nêkenê! Ganî her kes bibo veng ê têkoşînê ma."