Oznur Deger

 

ANQARA - Sîyasetmedara Kurde Cîhan Sîncare reaksîyon mojna şero ke bi hetkarîya AKP-MHPyî û PDKyî hemverê Mintiqaya Federe ya Kurdistanî de yeno kerdiş û vat: "Bi seserrano o polîtîkayê şerî yenê kerdiş la ma hema estê û tîya de yê. Bi şer Şarê Kurdî nêeşkenê çinî bikerê. Ma do heta peynî zî duştê merdimê ke şer kenê de xo ver bidê. Ganî ma duştê şerî de vengêke muşterek vejê." 

 

Hêrişê bi hetkarîya AKP-MHPyî Partîya Demokratîke ya Kurdistanî (PDK) hemverê Zap,  Avaşîn û Metînayî yê Mintiqaya Federe ya Kurdistanî de ameyo destpêkerdiş, bi mengêke yo domneno û duştê şerî de her hetî ra reaksîyonî yenê mojnayîş. Cinîyê sîyasetmedarî reaksîyon mojnenê hêrişan û veng kerdî ke ganî duştê şerî de bibê yew û veng vejê. 

 

'AKP sûcê merdimayî keno' 

 

Parlementera Partîya Demokratîke ya Şaran (HDP)ê Agirî Dîlan Dîrayet Taşdemîre bale ante serê SÎHAyî ke hemverê Mexmûrî de yenê ca û vat, Kurdê vera tehdayê Tirkîya, Mexmûr de ca bîyê û binê tehda û hêrişan de yê û wina ci de şî: "Rojanê vîyarteyî de bi SÎHAyan hêrişê Mexmûrî kerdê û 5 kesî ciwîya xo bedilnayê. AKP sûcê merdimîyî keno. Qampa Mexmûrî binê muşahîdîya NYyî de ya. Şarê Mexmûrî bi serran o zor û zametîyan ancenê. Tîya de çîyo tewr ma dejneno rolê PDKyî yo. PDK nêverdeno  şarê Mexmûrî şêrê Hewlêr,  nêverdeno bixebetîyê û karêke dir mijûl bibê. Ambargoyî nêwedareno. Qampa Mexmûrî binê hedefî de ya. Binê talûkeyêke pîl de ya. Pêro verê çimanê dinya de no hêriş yeno ca û tu kes veng nêkeno. NY veng nêkeno. NY bêvengîya xo paweno. Na bêvengî hêrişan hema zafêr zêde kena." 

 

'Polîtîkayê xo yê lêşin nimnenê' 

 

Dîlane dîyar kerd ke hêrişê hemverê Vakur û Rojhelatê Sûrîyeyî de û sewbina hêrişê hemverê Mintiqaya Federe ya Kurdistanî de tesaduf nîyê û wina ci de şî: "Hemverê Şarê Kurdî de hêrişê tehdayî yenê kerdiş. AKP zere de vindîkerdişêk pîl ciwîyeno û coka verê xo dano hêrişan. Polîtîkayê înan ê lêşinî teşhîr bîyê. Tu vatişêke înan ê şarê Tirkîya ra û Kurdî ra vajê nêmendo. Yewin çîyo ke bikero zî çimsûrîyî yo. No zî ano ca. Wazeno nîjadperestîyî ya bi neyarîyî hemverê Kurdan de aver bifîno. Polîtîkayê xo yê lêşinî bi neyarîya hemverê Kurdan de nimneno." 

 

'Ganî vindertişêko zelal bêro ramojnayîş' 

 

Dîlane da zanayene ke hêrişan de rolê PDKyî pîl o û qiseyê xo wina peynî kerd: "PDK sey hacetêke xo dano şuxulnayîş. Netîceyê rolê PDKyî Şarê Kurdî yeno qetilkerdiş. Ganî duştê nê hêrişan de vindertişêke zelal bêro ramojnayîş. Ganî êdî ma xo bi behaneyî nêpawê. Ganî ma vindertişêke xurt ramojnê û hêrişan tal vejê!" 

 

'Hêzê globalî bi destê îqtîdarî şer anê ca' 

 

Endama Heyetê Îdarekarîya Kongreya Demokratîke ya Şaran(HDK)î Belgîn Koçe zî dîyar kerd ke, ê duştê şero ke yeno kerdiş de yê û nê hêrişan şermezar kenê û wina bale ante serê hêrişan: "Nê hêrişî bi îqtîdarîyê AKP-MHPyî sînordar nîyê. No hêrişêko mîyanneteweyî yo. Bi destê NATOyî AKP-MHP hemverê Kurdan de metodêke hêrişê duştmerdimayî ano ca. Hem hemverê merdiman de hem hemverê xozayî de talanêke pîl yeno ca. Ma duştê nê hêrişan de yê. Netîce de ma zanenê ke no şero lêşin bazarê hêzê mîyanneteweyî yo. Hêzê muxalîfî ke na rewşe ra hayîdarê şer nêanê ziwan. Hetkarîyêke babeta vatişîyê û welatê endamê NATOyî zî coka goreyê menfîetê înan ê vengê xo nêkenê. Ma baş zanenê ke, ê sîlehan Tirkîya rê temîn kenê. NY zî bêveng o." 

 

'Herd, ciwîye û xozaya ma yena perçekerdiş' 

 

Sîyasetmedara Kurde Cîhan Sîncare zî derheqê babete de qisey kerd û ard ziwan ke şer tesîr ro serê her kesî keno û wina dergî da qiseyanê xo: "60î ser emrê mi derbas bî û tîya ra pey zî ez şahidîya xoverdayîşî û têkoşînê Şarê Kurdî kena. Ez di têkoşîn de ameya dinya û pîl bîya. Ez Sûrîye de ameya dinya uca ra keyeyê mi koçê Iraqî kerd. Ma her tim mexdûrê şerî bî. Ma her şerî de wareyê xo ra bîyî. Coka nê, şer tesîrêke pîl serê şaran de keno. Di şer de tena ma nê, herd, xoza û ciwîya ma zî perçe bîyî." 

 

'Ma do heta peynî xo ver bidê' 

 

Cîhane peynîyê qiseyanê xo de veng kerd ke ganî lezkî şer vindero û vat, o yo ke tewr zêde şerî ra zirar vîneno şar o û wina peynî ro ci ard: "Dewan de şarê ke bi zor ciwîya xo domnenê yenê bombevarankerdiş. Ma, kesêke nê şerî caanê şermezar kenê. Tarîx do şerwaştoxan vîrîra nêkero. Ganî her kes dustê nê şerî de sere wedaro û bêveng nêmano. Şer ganê ma sojîneno, la ê do bi şer ma nêqedênê. Bi seserran o şer domneno. La ma estê tîya de yê. Ma do xoverdayîşê xo bidomnê. Ganî her kes fam bikero ke Kurdî bi şer çinî nêbenê. Ma dîyalogî rê akerdeyê. Ma do heta peynî duştê kesêke şer de israr kenê, xo ver bidê."