STENBOL  - Sîyasetmedaran duştê şero ke bi hetkarîya AKP-MHP û PDKyî hemverê Mintiqaya Federalî ya Kurdistanî de dewam keno, venga têkoşînê muştereke kerdî û dîyar kerdî ke otorîterkewtişê şerî ra awankerdişê paradîgmaya ekolojîkî de û azadîwaştoxî ya cinîya demokratîkî de yê. 

 

Hêrişê bi hetkarîya AKP-MHPyî  û PDKyî yê hemverê wareyê Zap, Metîna û Avaşînî yê Mintiqaya Federalî ya Kurdistanî de 17ê Nîsane ra domneno. Goreyê çimeyê mintiqa ra yeno ke TSK bi tewirêke xedar sîlehê kîmyewî xebetneno. Hêrişê hemverê mintiqa de, di rojeve ya rayaumûmîya dinya de ca gêna û aktivîstî, rojnamegêrî, kaykerdoxî(hunermendî) û pawitoxê heqê merdiman reaksîyon hêrişan rê ramojnabî. 

 

Sîyasetmedaran  bale ante serê hêrişan û eşkera kerdî ke yeno amanckerdiş ke Şarê Kurdî bêro qirkerdiş derheqê babete de ajansê ma rê erjnayîş kerdî. 

 

'Serdestî hêrişan seyr kenê' 

Hemsereka HDPyî ya Maltepeyê Stenbolî Muge Canere da zanayene ke hêrişê şerê îstîlayî yê û vat pêwa Mexmûr binê banê NYyî de yo zî yeno bombevarankerdiş û wina vat: "Bombevarankerdişê Mexmûrî goreyê karê serdestan o  û coka nê zî heme dinya seyr kena. O wext zî heme pêkerdişê heqê merdiman û mîyanneteweyî yenê wêrankerdiş. Babeta vatişî ya ke Şarê Kurdî ciwîyêka seyyewbînî, adilane, azade û demokratîke awan bikerê. La hêrişê nê destqezencîyan kenê. Rojawan û Şengal fînakê. Pêwa ke Şengal hende rastê fermanan ame zî bi cinîyî û mêrdeyî pawitişê xo awan kerdî. Nika wazenê nê îradeyî bişkinê. La nêeşkenê nê bi şertê demokratîkî bikerê. Seba nê şîdet anê ca. Têkoşîna ma hetê şaran ra heqdar yena vînayîş û ma do têkoşînî bidomnê." 

 

'Wazenê xetê Rojawanî bixetemnê' 

 

Endama Heyetê Îdarekara Merkezî ya HDPyî  Sûltan Ozcane zî reaksîyonî motî ra beyanat kerd ke AKP-MHP ke di sîyasetê zerrî de rewşêke kaotîk ciwîyenê, wazenê bi şerî û lejkerdişan sîyaset bikerê û xo wina bixelesnê. Sûltane wina dergî da qiseyanê xo: "Şerê Rusya û Ûkraynayî de Erdogan bi kewa aştî, la wexto babete bena Kurdî her çî vurîyenê. Rejîmê yew mêrdeyî Vaşurê Kurdistanî, Şengal û Avaşînî de konseptê şerî newe ra visto dewre û wazeno waştişê aştî û heqê merdiman bipelçeqno. Heto bîn ra zî wazeno xeta Rojawanî ya ekolojîk, azadîwaştox û seyyewbîn bixetemno. Sewbîna wazeno Tirkîya de zî HDPyî apey bero. Vera ke hêzê xo faşîzmî, tehdayî û çimsûrîyî ra gêno. Asasî de AKP demê xo yo peynî ciwîyeno." 

 

'Xîyanetê PDKyî' 

 

Sûltane bale ante serê hetkarîya PDKyî û wina vat: "Gelo no tevrê hetkarîya çendinan ê PDKyî yo? Di herinda verê Kurdan de ca bîyaro, di xetê hetkarîya muxalîfî de ca gêno. Vera  nê zî ma vanê ke ganî PDK dest nê xetî xayînî ra verado." 

 

'Multecîyan kenê babete' 

 

Vervatoxa Komîsyonê Multecî û Koçkerdeyan ê HDPyî Gulsum Agaoglû zî dîyar kerd ke paştdayîşê partîyê sîyasî yê seba hêrişan yenê manaya sûrkerdişê şerî û eksê merdimî û wina qal kerd: "Hêrişî hemverê destqezencîyê Kurdan de yê. Hêrişî nika Vakur û Rojhelatê Sûrîye de zî domnenê. Rojawan bi serran o seba Dewleta Tirkî dejê pîzî yo. Coka ke Rojawan de sîstemêke ke tu cayê dinya de nêameyo vînayîş, ame awankerdiş. Nêwazeno no sîstem bikewo vîyartbarî û bibo fînak. Vera nê zî bi serran o rastê hêrişan yeno. Seba hêrişê Zap, Avaşîn û Metîna de nêrê vînayîş û merdişê eskeran bêrê nimitiş babeta multecîyan kenê rojeve. Ganî şarê Tirkîyayî duştê nînan de bêveng nêmano." 

 

'No şerê Erdoganî yo' 

 

Endama Partîya Xelesnayîşê Neweyê Sosyalîstî (SYKP) ra Yazgul Yildirime zî eşkera kerd ke hêrişî bi mintiqayêke sînordar nêmanenê û hêrişêke topyekun ê û wina peynî ro ci ard: "Erdogan ameyo peynî. Welat hetê sîyasî û ekonomî de verbi hezazî ra şîyo. Ma heme mehkûmê vêşanîyî kerdo. Dîktatorî wexto fam kenê ke vindî kenê şer vejenê. Erdogan zî wina keno. No şerê Erdoganî yo. Seba bîyayîşê xo bidomno hêrişan keno. Kurdî her cayî de têkoşînêko cidî kenê. Vera nê zî hêrişê Kurdan keno, wazeno qir bikero. No qirkerdiş tu reyî nêbeno bêro qebûlkerdiş. Ma do têkoşînê xo yê duştê nê hêrişan de bidomnê."