Medya Uren 

 

AMED - Muşer Ulkere ya ke cuya xo bi têkoşînê azadîya nasnameyê Kurdî neqişnayo vêşêrî tehdîd û hêrişan meydanan de ya, wina vat: "Ez û dadîya xo têreyde şîyêne partî, şîyêne çalakîyan û xebatan. Vera nê zî ker tim hêriş ro ma ameyêne kerdiş û tehdîd ro ma ameyêne kerdiş. Tutê mi bi nê rengî pîl bîyî. Yê ke ro dadîya mi û ro mi ameyêne kerdiş, ro tutanê mi zî yêno kerdiş. Senîn ke mi dimayê dadîya xo fek têkoşînî ra vera nêda, do tutê mi zî fek têkoşînî ra vera nêdê. Ma Kurdê û tîya de yê." 

 

Awanbîyayîşê Komare ya Tirkîya ra rastîya Kurdî û Kurdistanî yenê înkarkerdiş û bikarardişê nê vatişan zî ameyê qedexekerdiş. Duştê pawitişê nasnameyê Kurdîyî de qirkerdişê pîlî ameyê ca. Kurdî ameyê qetilkerdiş, koçkerdiş, sirgûnkerdiş, kultur û ziwanê înan ameyo qirkerdiş. Bi serran o têkoşînê Şarê Kurdî dewam keno. Xeylêke cinîyê Kurdî zî bi nê têkoşînî dir çimê xo dinya rê akerdî û bi aye dir kokim benê. Her ke têkoşînê Kurdan pîl bîyê, hêrişê faşîzaneyî yê îqtîdaran zî zêdeyêrî bîyê. Dadîya têkoşêra azadî Muşer Ulkere ya ke timî mîyanê têkoşînî de ca girewta zî seba têkoşînê bi serran o domnena, nimûne ya. 

 

Muşer Ulkere kam a? 

 

Muşer Ulker, qezaya Pasûrê Amedî de dadî ra bena. A 12 serrî ya xo de bi zorîyî yena zewejnayîş. Hema tutîyîya xo de bi zorîyê cuye dir rî bi rî manena. A bena dadîya 7 tutan. Hetêke de bi hişmendîyê komele dir têkoşîn kena, pêwa ci zî bi hişmendîyê nîjadperestîyê dewlete dir zî têkoşîn kena. Ciwanîya xo ra di xeylêk caameyan, sazgeyê sivîlî  û sîyasî yê Kurdî de ca gêna. Heya roja ewro zî di her çalakîyî de bi vengê xo, deyîrê xo û bi têkoşînê xo, xo ver dana. 

 

'Ala ke dadîya xo ra girewta  berz kena' 

 

Muşere wina vana: "Mi xeylêk tehdîd û hêrişî werdê, ez ameya destbendkerdîş, tehda ro mi ame kerdiş, labelê bi israr mi heskerdişê xo yê Kurd û Kurdistanî berd sere. Dadîya mi senîn heya nefesê xo yê peynî têkoşîn kerd, ez zî têkoşîya wa. Mi tutê xo zî wina pîl kerdê. Tutê mi zî vêşêrî heme tehdîdan fek têkoşînê xo ra vera nêdanê."  Nê prosesî de xebatan de polîsan xeylêk reyî serê keyeyê aye de girewtê. Tutê aye zî di binê nê psîkolojîyî de pîl bîyê. Polîsan hêrişî û vatişê xirabî ro înan kerdê. Tutêke Muşere zî duştê nê hêrişan de sere wedareno û tewirê mîyanê refê gerîlayî beno. Tutêke aye yo bîn zî mîyanê xebatan de ca gêno. 

 

'Dadîyê Kurdî nê dejî vînenê' 

 

Muşere di qiseyanê xo de wina qalê tesîrîya polîsan ê serê tutanê xo de kena: "Tever ra vengê têlsizê polîsan biameyêne tutê mi qîrrayêne. Mi ra vatêne xo binimne hunê ameyê to benê. Tutî mi bekçîyê mektebî ra zî tersayêne. Lajê min o pîl Remezan vera ke bekçî verê berê mektebî de vînabî nêşî mekteb. Ameyê vatê polîsî verê berî de yê. Coka ke ma nasnameyê xo pawitêne, înan fek ma ra vera nêdayêne. Înan tim hêriş kerdêne û ma zî verê ci de xo ver dayêne. Xeylêk dadîyê Kurdî nê dejî vînenê." 

 

'Tehdîdî ro tutanê mi yenê kerdiş' 

 

Muşere dewamîya qiseyanê xo de zî bale ante serê tehdîdê ro tutanê aye yenê kerdiş û wina vat: "Xeylêk reyan di rayîran de polîsan tehdîd ro min û embazê mi kerdê. Seba ke mi bitersinê ez girewtêne û tehda ro mi kerdêne.  Nika zî bi tewirêke tûjêr serê tutanê mi de yenê. Kênaya mi Çîmen Ulkere di Meclîsa Ciwanan ê HDPyî de ca girewt, seba xebate kerda, ceza ro ci amî birnayîş û xeylêk reyan amî destbendkerdiş. Mazlûm Ulker zî mîyanê xebatan de ca girewt û 18 serrî yê xo de ciwîya xo bedilna. Rey-rey lajê mi Remezan Ulker û Osman Ulker zî hetê polîsan ra ameyî remnayîş. Reyêke Osman remna ez şîya verê berê qereqole, polîsî uca de mi ra vat 'Meterse terorîstan lajê to nêremnayo'. Mi vat 'Xo ra terorîstê pîlî şima yê ke wina tutanê ma remnenê'." 

 

'Ez o tim dimayê na dewa bî' 

 

Muşere dîyar kerd ke nê tehdîdî ro tutanê aye yenê kerdiş û heta nika dewam kerdê û wina vat: "Seba ke hêrişî kerdêne, tutê mi xeylêk ci ra nêeşkayêne biwanê. Seba di mîyanê sîyasetê Kurdî de ca girewtî ameyê destbendkerdiş, tehdîd ro înan ameyê kerdiş. Ê ke wendişê xo qedênayê zî nêeşkenê bixebetîyê. Lajê mi Remezan tena verê mi de mendbî, la hizûr nêdayî ey zî. Ma dest dergîya kesî û malê kesî nêkerdo, ma dizdîya kesî nêkerda, ma hêrişê kesî zî nêkerdo. O ke ro ma yeno kerdiş zilm o. Şima çi bikerê zî ez fek na têkoşînî ra vera nêdana. Heya ez bibî, ez o dimayê na dewa de bî." 

 

'Ma Kurd ê û heskerdoxê azadîye yê' 

 

Muşere tewr peynî wina vat: "Verîyê nika Kongreya TUHAD-DERî virazîya û hewêna mi mîyan de ca girewt. Rewşe ya  mi ya weşîyî xirab a. Bi serran o ez xebetêna, ganî mi karêke asankerde de wezîfe bigirewtêne. Labelê hêrişê ke serê ma de kenê zî benê sebeb ez hêrsêr bibî. Kamco kar bibo ez o bikerî. Seba êdî nêeşkê serê kesî de nê tehdîdan bikerê û nê hêrişan bikerê. Ez Kurd a, ziwanê mi, kulturê mi no wo. Ez o tim tîya der bî û têkoşîn bikerî. Ez Kurd a û heskerdoxê azadîye ya."