ANQARA  - Yew avûkatanê Dewaya Garî ra Îlke Işik bale ante serê cinîyê DAÎŞî yê leza lez ameyê tehlîyekerdiş û beratkerdiş û vat: "Wextê destpêkerdişê muhakemekerdişî ra heta nika seba vergumanan nêrê tepiştiş verpersîyarê somutî estê. DAÎŞ bedilîyayo rêxistinêke merdiman ê seke keyeyî. Valentina Merve Dundar,  Demet Taşar, Ayşenûr Încî vera bombeyê ganî bî bi qodê sûrî cigêrayîşê înan bîbî. Ulker Mamedova cinîya Mustafa Dokûmaci bî û kesêke di pozisyonê pîlî de bî. Nê ekîbî Semsûrî de bombayê ganî resinayê. Bi eşkera fealîyetê DAÎŞî kerdê. Cinîyî eşkerayê, bombayê ganîyê yenê beratkerdiş. Nê cinî tever de gêrenê û seba her kesî talûkeyêke pîl ê." 

 

DAÎŞ 10ê Teşrîna Verîne ya 2015î de Garê Anqarayî de  qirkerdiş ard ca û serê nê qirkerdişî ra 6 serrî derbas bîyî. La hema vergumanê asasî nêameyê muhakemekerdiş. 15in roniştişê vergumanê qirkerdişî û Erman Ekîcî yo sûcê duştê merdimîyî ra ameyêne muhakemekerdiş 12ê Gulane de di 4in Dadgehe ya Cezaya Girane ya Anqarayî de amî vînayîş. 

 

Di roniştişî de malûmatê neweyî vejîyayî werte û îhmalê dewlete ya di qirkerdişî de reyêke bîn vejîya werte. Xeylêke vergumanê dosyayî nika firarê û cinîyê DAÎŞî yê Sûrîye ra ameyê Tirkîya zî tena sey 'cinîyê DAÎŞîyan' yenê pênaskerdiş û hetê dadgehan ra wextêk kilm de ameyê beratkerdiş. 

 

Yew avûkateya dewa ra Îlke Işik derheqê dewa û rolê cinîyê DAÎŞî de erjnayîş kerd. 

 

'Rojêke verîyê qirkerdişî qerarê cigêrayîşî ameyo girewtiş' 

 

Îlkeye da zanayene ke 6 serrî serê qirkerdişî ra derbas bîyo, pêwa nê di roniştena 12ê Gulane de malûmatê ke merdiman matmende verdeno vejîya werte û wina vat: "Dosya hema di sewîyeyê arêdayîşê delîlan de ya, la dewaya ke tepişteyî ci ra ameyê muhakemekerdiş bi lezkî padayê. Nika seba firaran muhakemekerdiş domneno û her tim çîyê neweyî vejênê. Ma zî bêçare manenê ke waştişê newe bîyarê ziwan. Na dewa dewayêka ganî hema zaf aver bikewo ya. Di roniştişê 12ê Gulane de dosyayê neweyî ameyî. Derheqê vergumanê firarî Hasan Huseyîn Ûgûrî de malûmatê newe ameyî. Ma derheqê ey de malûmatê kemî zanayêne. No vergumanêke muhîm o. Dosyaya ke ameya zaf baleante ya. Îxbar esto ke Hasan Huseyîn Ûgûrî di Tebaxe ya 2015î de do bibo bombeyo ganî. Îxbar reseno Emnîyetê Dîlokî. Emnîyet tena ewneno keyeyê ey ra. Persêr qerarê tepiştişî nêdano. Qerarê tepiştişî, rojêke vernîyê Qirkerdişê Garî, di 9ê Teşrîna Verîne ya 2015î de vejenê." 

 

'Verguman Îlhamî Balî Konya de ameyo dermankerdiş' 

 

Îlkeye dîyar kerd ke eynî çîyî seba verguman Îlhamî Balî zî vîyartbaro. Verguman di xeylêk dosyayê DAÎŞî de seke 'DAÎŞî yo asasî' ameyo nuştiş. Îlkeye da zanayene ke Îlhamî sey 'Emîrê Tirkîyayî'  û  'DAÎŞî yo sereyîn' ameyo îlankerdiş û di netîceyê hewldayîşê înan de pozîsyonê ey yê rastî vejênê werte û vat wexto ke qerarê ey yê tepiştişî bîyo, o Konya de ameyo dermankerdiş."

 

'Verpersîyarê şênberî estê' 

 

Îlkeye nê çîyî ardî ziwan: "Roje ya muhakemekerdiş ameya destpêkerdişî ra heta nika seba vergumanî nêrê tepiştiş verpersîyarê şênberî estê. Nê heme zî çîyêke seba vergumanî nêrê muhakemekerdişî yê. Gelo hende firarî senîn benê? Cayêke ê kesî ci de gêrenê eşkera yê. Dîlok û Semsûr o. Senîn beno hema nêtepiştê? Ma zanenê ke hinî kampan de yê û cigêrayîşêk nîno kerdiş. " 

 

'Seba cinîyê DAÎŞî qerarê beratî' 

 

Îlkeye bale ante serê pozîsyonê cinîyê DAÎŞî û vat cinîyê DAÎŞî bi sifatê şehîdî dadgehe de ameyê goştaritiş û wina reaksîyon ramojna: "Di roniştişê 12ê Gulane de cinîya DAÎŞî Ulker Mamedova ke demêke derg cigêrayîşê aye bîbî amî goştaritiş. DAÎŞ rêxistinêke keyeyî yo. Rêxistinêke merdimî kewta, têmîyan a. Her ke dosyayî yenê ma bandêr benê: Xezûr, xesû, dadî, babî, dat heme merdimê bi ekîbêke pîl xebetênê û derbasê Sûrîyeyî bîyê. Weyra de nê karî domnenê. Mêrdeyê vergumanê Omer Denîz Dundar, Valentîna yan zî Merve Dundar, Demet Taşar, Ayşenûr Încî coka bombeyê ganî yê, bi qodê sûrî cigêrayîşê înan estê. Nê ameyê tehlîyekerdiş. Îfadeyê înan ê ke, wexto ameyê Tirkîya kewtê dosyaya ma. Qiseyan de hele bi hele vanê. Merdim keweno xofî. Ulker Mamedova di îfadeyê xo de vana 'Xîlafetî ra vejîyayo, xusûsîyê dewletbîyayîşî vindî kerdo û vera nê ma vejîyayî'. Bi rehetî yenê Tirkîya. Zanenê ke bikewê Tirkîya çîyêke nîno sereyê înan. Vatişê heminan şibîyeno yewbînan. Pere danê qaçaxçîyan û bi tewirêke yenê. Mengêke di mengî zîndan de manenê û dima ra yenê veradayîş." 

 

'Tever de gêrenê' 

 

Îlkeye dîyar kerd ke Ulker Mamedova di reyî Sûrîye ra kewena Tirkîya, raya ewilî demêke kilm manena, reya diyîn de zî derg nêmanena û a zî hîkayeyê cuya xo vana û nê çîyî ana ziwan: "Vana ke a seba hetkarîyî şîya uca û dima ra  agêraya. Reyêk bîn şîya û heta ke DAÎŞî bi pêroyî vindî kena uca de manena. Ulker Mamedova û cinîyê  bînî yê ekîbê Semsûrî de, yanê di ekîbê Mustafa Dokûmaci yo ke kesêke muhîm ê DAÎŞî de yo. Ê ke bombeyê ganî resinenê nê yê. Cinîyê ke eşkera yê ke fealîyetê DAÎŞî kerdê û bombeyê ganî yê ameyê tehlîyekerdiş û beratkerdiş. Vera nê zî talûkeyêke pîl ê. Bîyayîşê înan ê teverî de seba her kesî, seba Tirkîya talûkeyêke pîl o."