MERKEZÊ XEBERAN - Peşmergeya Dêrîn Dayê Gelawêja vat ke tarîxê PDKyî tim mîyanê xîyanetî de dekerde yo û vat: “Ganî pêro Kurdî vera îşxalkerdişî vejîyê. Her ca biaçarnê cayê têkoşîn û xoverdayîşî. Vera xîyanetî do têkoşîn û xoverdayîş qezenç bikero.”

 

Tirkîya 17ê nîsane emserrî ra nata bi ortaxîya Partîya Demokratîke ya Kurdistanî (PDK) hêrîşê herêmê Zap, Metîna û Avaşînî ke mîyanê sînoranê Herêma Federal ya Kurdsitanî de yî, kena. Ortaxîya PDKyî ke AKP-MHPyî reyde kena, rayaumumî ya kurdan ra reaksîyonê girdî yenê mojnayîş. Înan ra yew zî Peşmergeya Dêrîn Dayê Gelawêja 75 serre ke 20 serrîya xo de bîye peşmerge ya. Gelawêje vana ke tarîxê PDKyî bi xîyanetan dekerde yo û ganî kurdî vera xîyanet de vejîyê raşteyan.

 

‘50 serrî yo seba Kurdistanî têkoşîn kena’

 

Dayê Gelawêje destpêkê qiseykerdişê xo de qala peşmergebîyayîşê xo kerde û vat: “No 50 serrî yo ke ez seba Kurdistanî têkoşena. Ez keyeyêko kurd ra ya û ma di waye tena yî. Ma hetêk ra têkoşîyayî û hetêk ra zî ma bi rihê neteweyî pîl bîyî. Mi 20 serrîya xo de tifing wedarna û seba şarê xo kewta şer. Amacê mi o bî ke ez herra welatê xo, hukmatanê dîktatoran ra bipawa. Aye wext çîyêko zehmet bî ke cinî tifing wedarna. La bawerîya mi bi mi estbî û coka ra ez têkoşîndayîşî de xeylê serkewte bîyene.”

 

‘Ma cinîyê pêşmergeyî seba xoverdayîşî tim amedî bî’

 

Gelawêje vist vîrî ke Ofîsê Peşmergeyanê Cinîyan yê Dêrînî serra 2011î de hetê peşmergeyanê cinîyan ra ameye awankerdiş û wina vat: “Pêşmergeyê cinî gureyê xo binê banê na sazîye de rayra benê. Peşmergeyê cinî timî hadrebî ke şer bikerî. Bado ke cinî komeleya ma de ameyî pêser, bala xo dayî azadîya cinî û rêxistinê azadîye yê sîyasî.”

 

‘PDK 75 serrî yo mîyanê xîyanetî de yo’

 

Gelawêje dewamê qiseykerdişê xo de PDK tarîxê xîyanetî yo û vat: “Çi heyfo ke PDK 75 serrî yo ke xîyanetê kurdan keno. Şerê Iraq û Îranî de xîyanetêko gird bi kurdan kerd. No şer 1980î de destpêkerd û 8 serran domna. PDK kurdan teslîmê Îranî kerd. Kurd tena serê xo mendî. Başûr de rijnayîş û qirkerdiş virazîya. Çeke kîmyewî ameyî şixulnayîş û dewê kurdan ameyî vêşnayîş. Kurd mecbur mendî koç bikerî. Eke ma tena serê xo nêameyêne veradayîş, ma do komelêko xurt bibayêne û do dewletêka ma ya xoser bibayêne. PDK partîyêka kehen û xîyanetî ya.”

 

‘Ganî Kurdî vera xîyanetî vejîyê’

 

Gelawêje tewr peynî daye zanayene ke ganî pêşmerge paştî nêdî îxanetê PDKyî û wina peynî kerde: “Têkoşînê azadîye yê şarî kurdî timî dewam bikero. Ganî pêro kesî vera xîyanetî PDKyî de vertek nîşan bidî û destur nêdî. Zaf heyfo ke welatê ma ewro bi hetkarîya xayînan yeno dagirkerdiş. Pêro destkewteyê kurdan tehluke de yî. Bi trîlyaran dînar yenê xerckerdiş. Tena PKKyî rê xîyanet nîno kerdiş, eynî wext de herr û erce neteweyêk rê zî yeno kerdiş. PDK destur da no xîyanetî rê. Vengdayîşê mi oyo ke wa şarê kurd vera xîyanetî PDKyî û Tirkîya de vejîyo raşteyan. Çar parçeyê Kurdistanî rê serkewtiş wazena. Vera xîyanetî de xo xoverdayîş bibo.”