RIHA - Nobeta Edaletî ya Keyeyê Şenyaşarî vernîya Edliyeyê Rihayî daya destpêkerdiş, roja 436ine de dewam kena.

 

Nobeta Edaletî ya Emîne Şenyaşar ke di laj û mêrdeyê ci 14ê Hezîrana 2018 de hetê pawitox  û merdimanê Parlamenterê AKPyî yê Rihayî Îbrahîm Halîl Yildiz ra ameyî kiştiş bi lajê xo Ferît Şenyaşarî dir 9'ê adara 2021 de verê Edliyeyê Rihayî de da destpêkerdiş û roja 436ine de dewam kena. Emîne Şenyaşar û lajê xo Ferît Şenyaşar ewro keyeyê xo yê qezaya Pirsûsî ra ameyî verê edliye û "quncika nobeta edaletî ya keyeyê Şenyaşarî" dest bi nobeta xo kerdî.

 

Keyeyî, serê hesabê xo yê medyaya dîjîtalî de hesabê fermî yê Wezaretê Hukmî, Wezîrê Edaletî Bekîr Bozdag û Serekkomar Tayyîp Erdogan etîket kerd û mesaj pare kerd: "Kesa ke zêdeyêrî serrêke ya dayîke verê edliye de danê vindarnayîş do tarîx de bi  nelet bêrê vîrardiş.”