ANQARA  - Tepişteyê Zîndanê Cinîyan ê Sîncanî duştê binpaykerdişê heqê zîndanan, tedawînêkerdişê tepişteyê nêweşî, manîkerdişê tehlîyekerdişê xeylêk tepişteyan de dest bi grevê vêşanî kerdî. Tepişteyan ra Selver Îspîr vat: "Serewedaritiş Ciwîyayîş o." 

 

Zilm, tehda, binpaykerdişê heqanê ke ro tepişteyan her ke şino zêdeyêr beno. Tepişteyê ke Zindanê Cinîyan ê Sîncanî de yê duştê binpaykerdişê heqê zîndanan, tedawînêkerdişê tepişteyê nêweşî, manîkerdişê tehlîyekerdişê xeylêk tepişteyan de dest bi grevê vêşanbîyayîş ê 3 rojan kerdî. 

 

Goreyê doneyê Dadgehe ya Heqê Merdiman(ÎHD) di Zîndanê Cinîyan ê Sîncanî de tewr kemî 16 tepişteyê nêweşî estê. Reyna qerarê Heyetî yê Muşahîdî û Îdareyî yê bi nîzamnameyî, di 1ê Çeleyî yê 2021î de kewtbi vîyartbarîyî, tehlîyekerdişê rojnamegere Dîlan Oynaşe û 5 tepişteyê sîyasîyî yenê manîkerdiş. Tepişteyan pêvînayîşê keyeyê  xo dir kerdî malûmat dayî ke, vera tevrê  kêfî yê îdareyî înan dest bi grevê vêşanbîyayîşê 3 rojan kerdê. 

 

‘Serewedaritiş ciwîyayîş o’

 

Tepişteyan ra Selver Îspîre bi rayîrê pêvînayîşê telefonî yê keyeyê xo dir bale ante serê tehdayê di zîndanî de û wina vat: "Her kes zaneno ke di wextêke derg û dila yo, zîndanan de hêriş û îşkenceyê pîlî estê. Tîya de ro ma îşkence yeno kerdiş. Tehdayê serê ma de yê tecrîd û îşkence yê. Ma sere wedarenê û ma veng a rayaumûmî kenê ke paştdayîş bidê ma. Wa şar veng vejo! Ma şarî bi heskerdiş silam kenê û ma vanê wa na rewşe rê bêveng nêmanê. Serewedaritiş Ciwîyayîş o!"