ANQARA - Vervatoxa HDPyî Ebru Gunay bale ante hêrişanê Tirkîya yê vera Başûrî ser û vat: “Tewirê PDKyî kurdan dejneno. Me venga şarê kurdî, partîyan, rêxistinan, roşnvîran û pêro selahîyetdaranê Başûrî danê ke vera şerî vengê xo berz bikerê.”

 

Vervatoxa HDPyî Ebruye Gunay merkezê partîya xo de kombîyayîşê çapemenîye kerd û babetê rojdemî ercnayî. 

 

Leyla Qasim ameye yadkerdiş

 

Ebru Gunay, yadkerdişê Leyla Qasim ke vernîya 48 serran 12ê Gulana 1974 de pêwa 4 embazanê xo seba têkoşînê xo yê hemverê rejîmê Iraqî ameye daliqnayîş, dest bi qiseykerdişê xo kerd û wina vat: “Ez verî Leyla Qasim yad kena ke 12ê gulana 1948î de çar embazanê xo reyde hetê rejîmê Iraqî ra amebî dardekerdene.”

 

‘15ê Gulane roşanê neteweyî yo’

 

Ebruye bale ant serê 15ê Gulane Roja Ziwanê Kurdkî û vat: “15ê Gulane Roşanê Ziwanê Kurdkî yo. 90 serrî verî Celadet Alî Bedirxanî bi kedêka pîle Kovara Hawarî vete ke no tarîx seba averşîyayîşê ziwanê kurdkî rojêka tarîxî ya. 15ê Gulane seba ma roşnêko neteweyî yo. Serrgêra 90. ya kovara Hawarî de ma Celadet Alî Bedirxan û pêro embazanê ey bi rêzdarî yad kenê û verê xebatanê înan ê qîmetînan de sereyê xo anê war.”

 

‘Tedayê serê ziwanê Kurdkî kêmî nêbîyê’

 

Ebruye vat ke hema zî tedayî serê ziwanî de dewam kenê û vat: “Tarîxê kurdan de se serrî yo vera kurdkî teda û asîmîlasyonî nêqedîyayî. Nê 7 serranê peyênan de zî teda û zorbazîye zêdîyayî. Polîtîkayê yewperestî yê Tirkîya ma rê hişmendîya yewziwanî ferz kenê. Ma nê kerdişan şermezar kenê û nê sîstemî qebul nêkenê. Heta ziwanê kurdkî bibo ziwanêko fermî ma do têkoşînê xo xurtêr bikerê.”

 

‘Hêrişî vera deskewtişê kurdan ê’

 

Ebruye bale ant serê hêrişanê Tirkîya û wina dewam kerd: “17ê nîsane de îqtîdarê AKP-MHPyî hêrişê Başûrî kerd. Armancê nê operasyonan no yo ke kurdî cayê xo ra bêrê vetene, Başûr û Rojawan de destkewteyê kurdan bêrê çinkerdene. Hêrişê vera destkewteyanê kurdan de ganî partîyê kurdan hemkarî mekerê. Wazenê Başûrî zî sey Efrînî talan bikerê. Bi nê operasyonî eşkera bi ke hukmatê Tirkîya îradeyê Başûr û Iraqî nêşinasneno. Tewirê PDKyî kurdan dejneno. Me venga şarê kurdî, partîyan, rêxistinan, roşnvîran û pêro selahîyetdaranê Başûrî danê ke vra şerî vengê xo berz bikerê.”

 

‘Her lebatêke ma rê girîng a’

 

Ebruye vat, pêro xebate înan seba çareserî û aştîye yo û vat: Pêro xîretê ma seba aştîye yo. Derheqê aştîye û çareserîye de çi bikewo ma milî ma do bikerê. Verê ma de kongreya ma ya pîle est a û aye ra ver zî konferansê ma est ê. Ma konferansan reyde amadekarîya kongre kenê.”