Melîke Aydin

 

ÎZMÎR - Zozan Onere ke şî Zîndanê Şakranî waya xo Cîhan Onere dir pêvînayîş kerd, dîyar kerd ke tehtayê zîndanî sîstematîk bîyê, seba caardişê xirabî û tehdayan ekîbêke xusûsî ameyo awankerdiş. 

 

Tecrîdo girano ke serê Rayberê PKKyî Abdullah Ocalanî de yo, tesîr serê heme zîndanan de kerdo. Yew zîndanî ra ke tehdayê giranî ci de yenê ciwîyayîş zî Zîndanê Cinîyan ê Şakranî yo. Zozan Onere dîyar kerd ke, 6ê Gulane de şîya pêvînayîşê waya xo Cîhan Onere ke 7 serrî yo tepişte ya û çîyê ke waya ci ciwîyena û nîyadîyayîşê xo ajansê ma rê vatî. 

 

'5 gardîyanî seba tumanê mi têkoşîn kerdî' 

 

Zozane vat, cikewtişê zîndanî de 2 reyî pêwa hacetê X-ray sînyal nêdayo zî cikewtişê odeyê pêvînayîşî de hacetê X-ray bi behaneyê asin esto sînyal dayo û wina vat: "Gardîyanan vatî 'tumanê xo veje'. Mi se kerd ez nêeşkawa  bikewa odeya pêvînayîşî. Serê mi de asin çinî bî. Tumanê gardîyanê mêrdeyan dayî mi. Tumanêke lîşin ke ê gardîyanan bi. Mi vat 'Ez na tumane senîn xo pay bikera'? Cêban de bizmikê lîşinî bîbî. Gardîyanan vat  'Ma terzî nîyê'. Tumane pîle bi. Perênê mi kincê min ê binî asayêne. Dima ra vînayî ke problemêke tumane de esto, destûr dayî ez tumana xo, xo pay bikera. 5 gardîyanî seba nê, duştê mi de têkoşîn kerdî." 

 

'Heqê pêvînayîşî xesp kerdî' 

 

Zozane dîyar kerd ke qestî sînyal ameyê dayîş û wina ci de şî: "Tumana ke dayî mi zaf pîl bi. Gardîyanan ez îqaz kerdêne, vatêne cilê to yê binî asayenê. Çîyêke ez bikera çinîbî. Kamerayan vînayêne. Pêvînayîş 45 deqe bi la 15 deqeyê mi bi nê gelemşeyî derbas bî. Înan zî nêzanabî problem çi ra qewimîyeno. Xo ra verê mi de tutê mi zî bîbî. 15-20 deqeyî ma pêvînayîş kerd." 

 

'Xida nêdanê û tepişteyî serê betanîyan de rakewenê' 

 

Zozane sewbîna bale ante serê problemanê tepişteyan û vat qawuşa ke 32 tepişteyî manenê de werdo seba 15 kesî danê û wina ci de şî: "Problemo tewr pîl werd o. Gelo no yeno çi manayî? Bi vêşanbîyayîşî terbîye kenê. Livînî çinî yê. 17 ranzayî estê û  2ten-2ten rakewenê. Ê bînî zî serê betanîyan de rakewenê. No caardişêk eksê merdimî yo. Her tim waştişê tepişteyan red kenê. Seetê hewadarkerdişî kemî yê. Hewadarkerdişî leze padanê. La seetê bi tewirêke normal 18:00î de yenê padayîş. Tewirêke bê hewa de manenê." 

 

'Gardîyane, Kebîre Keleke bi ekîbo xusûsî tehdayê sîstematîkî kena' 

 

Zozane qal kerd ke, yeno hedefkerdiş ke tepişteyî qawuşê yewbînan ra dûrî yê bêrê padayîş û têkilîyê înan bêrê birnayîş û wina peynî ro ci ard: "No tecrîd o. Tepişteyî wazenê têreyde bimanê. Ganî gardîyanî bi toleransî bê! Her hewte cigêrayîşan kenê. Sereka gardiyanan Kebîre Keleke sey neyarî ya. Ekîbêke xusûsî awan kerdo û ro tepişteyan tehdayê sîstematîkî kena. Ez her reyî ke şina zîndanî probleman ciwîyena. Waya mi zere de probleman ciwîyena.  Heme tepişteyî û keyeyê tepişteyan nînan ciwîyenê. Hacetê şexsî destî ra nêgînê. No zî beno semedê şawitişê bi kargoyan. Ez veng a rayaumûmî kena, wa vengê tepişteyan bişinawê. Tepişteyî di şertê eksê merdimî de ciwîyenê."