Rojda Aydin

 

ŞIRNEX - Ayşete Atabay 6 serrî yo ro cenazeya lajê xo yo ke Nisêbîn de wextê qedexeyê tebervejîyayîşê kuçeyan de dinyaya xo bedilnayo gêrena. Ayşete wina vana: "Seki mi xeylêk dadî estê Botan de cenazeyê tutanê xo hema zî nêvînayê. Ez 6 serrî yo ro kezeba vindîbîyayî gêrena. Ro ma zilm kenê. Heta ke ez saxebî ez o ro cenazeyê lajê xo bigêra." 

 

Dimayê qedexeyê vetişê kuçeyan peynî bîyî, xeylêk keyeyî dimayê aqûbetê tutanê xo kewtî û hema zî bi desan keyeyî estê ke hema zî cenazeya tutanê xo nêvînayê. Ê keyeyan ra yew ci zî keyeyê Nesîm Atabayî yo 22 serre yo. Nesîm Nisêbîn de dinya xo bedilna. Dadîya Nesîmî, Ayşete Atabay ajansê ma rê behsê prosesê cigêrayîşê  cenazeyê lajê xo yo, nê 6 serran de kerd. 

 

'Ez o avûkatî şarê xo rê bikerî' 

 

Nesîm Atabay Unîversîteyê Çanakaleyî de qismê avûkatî wendêne û di eynî wextî de  zî mîyanê xebatê ciwanan de ca girewtêne. Ayşete wina qalê lajê xo kerd: "Lajê mi hem wendêne û hem zî mîyanê xebatanê ciwanan de ca girewtêne. Ma ra her tim vatêne 'Ez o avûkatîya şarê xo bikerî'. Wexto ke Cizîrî de qedexeyî ameyî îlankerdiş, lajê mi 4 serrî bî wendê. Wexto qedexe ame îlankerdiş babê xo rê telefon kerd û vat 'Nisêbîn de karêke mi esto, ez o şêrî Nisêbînî'. Wexto şî zî heme kesî ra xatir waşt û vat 'Wa kes persê mi nêkero'. Telefonê xo pada û êdî ma xo nêresna ey." 

 

'Ez ro cenazeyê lajê xo gêrena' 

 

14ê Adare ya 2016î de Nisêbîn ê Mêrdînî de qedexeyê vetişê kuçeyan ame îlankerdiş.  Ayşete wina qalê ê rojan kerd: "Dimayê 18 rojan mi televîzyon de şinawit ke lajê mi dinyaya xo bedilnayo. Vera qedexeyan ma nêeşkayî şêrê Nisêbîn.  Ma bi rayîrê telefonan pers kerd la ma nêresayî tu malûmatan. Ma nêeşkayî xo biresnê cenazeya ey. Dimayê ke qedexe wedarîya ma verê xo da Nisêbînî. Pêwa cigêrayîşê ma, ma xo nêresna cenazeyê ey. Dimayê demêke malûmatêk ame û vatî '3 cenazeyê û yê ey zî mîyan de yo banêke xerepnaye de, Nisêbîn de yê'. Dimayê nê malûmatan ma muracatê mekanîzmayê dewlete dayî. La heta ewro zî verpersêke nêdayî ma. Ez 9 reyan şîya Nisêbîn, 2 reyan şîya Amed, 3 reyan şîya Mêrdîn û 2 reyan zî şîya Rihayî. La mi cenazeyê lajê xo nêvîna." 

 

'Xelîl 6 aşmî verîyê Nesîmî şehîd kewt' 

 

Xelîl 6 aşmî verîyê Nesîmî Kobanî de şehîd kewt. Dadîya wirdînan Ayşete wina bale ante serê wirdî lajanê xo: "Ez 6 serrî yo cenazeyê Nesîmî gêrena. Heta nika ma tu verpersêk nêgirewt. Ma nêzanê, ê cenazeyî se kerdî? Dima ke lajê mi şehîd kewt xeylêk reyan polîsan serê keyeyê ma de girewt. Derheqê rewşe de ma xeylêk reyan sere ro rayîrê huqûqî dayî. Tena seba Nesîmî ney, seba lajê mi Xelîlî ke Rojawan de şehîd kewt zî polîsan serê keyeyê ma de girewt. Wexto ke DAÎŞî hêrişê Kobanî kerd Xelîl şi. 4 serrî weyra de mend û Kobanî de şehîd kewt. Ma cenazeyê Xelîlî ard Sêrtî û uca de defin kerd. Xelîl 6 aşmî verîyê Nesîmî ra şehîd kewt." 

 

'Ez 6 serrî yo kezeba xo ya vindîbîyaye gêrena' 

 

Ayşete ke bêmabên cenazeyê lajê xo gêrena wina nîyadîyayîşê xo ardî ziwan: "Kezeba mi vêşena û ez wazena gorê lajê mi bibo. Perçeyêk cenazeya ey ra bibo zî wa bidê mi. No 6 serrî yo zerra mi vêşena. Seki mi xeylêke dadîyî estê Botan de cenazeyê tutanê xo hema zî nêvînayê. Ez 6 serrî yo ro kezeba vindîbîyayî gêrena. Nê zilmî ro ma kenê. Ez heta saxebî, ez o ro cenazeyê lajê xo bigêra. Ez tu reyî fek nê cigêrayîşî ra vera nêdana."