Medya Uren

 

AMED - HDPyî ra Handan Çelîke û EMEPî ra Nûrgul Denîze têkilîyê hêrişê serê awanîyê HDPyî de û serê parlamentere Ayşe Acar Başarane de seke provakasyonêke polîtîkî erjnayî û vatî: "Ziwanê îqtîdarî hêrişê nîjadperestî û cînsperestî rê esasan awan keno. Ma do duştê a hişmendîyî de organîzeyê xo pîl bikerê." 

 

Reaksîyonê duştê provakasyonan de hemverê Merkezê Pêroyî yê Partîya Demokratîke ya Şaran(HDP) û Vervatoxe ya Meclîsa Cinîyanê HDPyî Ayşe Acar Başarane de domnenê. Xeylêk cinî û caardişê cinîyan zî duştê provakasyonê duştê HDPyî de reaksîyonî motî ra. Cinîyan eşkera kerdî ke no hêriş hişmendîyê seserran ê dewlete ya Tirkî eşkera kena. 

 

Derheqê hêrişan de, îdarekarîya HDPyî ya merkezê Amedî ra Handan Çelîke û Baskê Ciwananê Partîya Kede(EMEP)ra Nûrgul Denîze erjnayîşê xo kerdî. 

 

'Netîceyê provakasyonan do giranêr bibê' 

 

Nûrgule destpêkerdişê qiseyanê xo de bale ante serê hişmendîyê îqtîdarî û wina vat: "Îqtîdaro bîyaye bi ziwanê xo yo nîjadperestî û tehdayî dir esasan awan keno. No ziwan di eynî wextî de zî ziwanê cînsperestî yo ke beno sebebê zêdebîyayîşê tehdayê serê cinîyan. Tirkîya de qanûn û edalet zî destê îqtîdaro ke bi hişmendîyê mêrdeyî de yo. No zî beno sebebê vilabîyayîşê problemê komelkî. Hêrişê serê HDPyî de û serê cinîyê sîyasetmedarê HDPyî de yenê ca zî motişê hişmendîyê înan ê. Coka nê hêrişê serê awanîya HDPyî yê Anqarayî û serê parlamentere Ayşe Acar Başarane de ameyê ca newe nîyê û bi hezaran fînakê ci estê. Verîyê nika zî cinîyêke HDPyî Denîz Poyraze awanîya HDPyê Îzmîrî de amî qetilkerdiş. Provakasyonê bi nê rengî do netîceyê gîranêrî xo dir bîyarê." 

 

'Wazenê ma manî bikerê' 

 

Nûrgule dewamîya qiseyanê xo de bale ante serê nêseyyewbînîya ke yena rayrayîş û manîyê serê cinîyan. Nûrgule wina dîyar kerd: "Kamcîn ca de cinî bibo îqtîdar uca de heme hêzê xo xebetneno û wazeno weyra talan bikero. Cinî kamcîn cayî de biwazo heqê xo bipawo yan zî seba destqezencîyê xo bipawo weyra de hêrişê înan yenê kerdiş. Wazenê ma manî bikerê. Ma na nizdîyîya înan ra şaş nêmanenê.  Coka ganî ma hemverê nizdîyîya înan de vinderê û bimojnê înan ke ma cinîyî tê dir ê û bi hêzê." 

 

'Do cinî bieşkê bibedelnê' 

 

Nûrgule bi nê vatişan peynî ro qiseyanê xo ardî: "Seba xelesnayîşî ganî ma pabeyê kesêke nêbê! Bêşik zî do cinî bieşkê a hişmendîya cînsperestîyî û nîjadperestîyî bibedelnê. No zî do bi têkoşînêke organîzekerde mimkun bo. Kar de, wendegeyan de, wareyan de, cîrananê xo dir, dormeyê xo dir ganî ma tore ya xo pîl bikerê! Eynî demî de xeylêk caameyê cinîyan estê, ganî nê têreyde mîyanê xebate de bê! Netîceyê organîzeyî de ma xeylêk netîceyî bi dest fînayî. Ganî seba pawitişê ê destqezencîyan û seba bidestgirewtişê heqê xo ma hêzêrî hereket bikerê! Ganî cinî sîyasetê kuçeyan ra heta temamê wareyî tal nêverdê! Ganî cinî her cayî de bê û a hişmendî bibedelnê!"

 

'Ma hemverê ê zordestan de sere nêtewênenê' 

 

Handan Çelîke zî da zanayene ke serê cinîya Kurde de tehdayan zêdeyêr kenê û wina ro ci zêde kerd: "Serê cinîya Kurde de her ke şino polîtîkayê pelçiqnayîşî, tehdayî û tersnayîşî zêdeyêr benê. Ma kewtê çaxê zordestîyêke wina ke bi heme hêzê xo wazenê ma bifînê mîyanê qilifan. Ma hemverê ê zordestan de sere nêtewênê. Ma tim vanê duştê înan de ma bi israr vanê:Azadî, demokrasî, ciwîyêke merdimî ma wazenê. Nê heqê ma yê ciwîyayîşî yê û ma pawenê." 

 

'Hêrişî duştê îradeyê Şarê Kurdî yê' 

 

Handane bi nê vatişan peynî ro qiseyanê xo ardî: "Ma her roje benê şahidê hêrişê nîjadperestîyê serê awanîyê ma de yenê kerdiş. Yew ê hêrişan ra zî di wextêke nizdî de serê awanîya ma ya HDPyî yê Îzmîrî de ame ca û Denîz Poyraze amî qetilkerdiş. Tewr peynî zî Anqara de serê awanîya ma de hêrişêke ame ca û polîsan tehdîd ro parlamentera ma Ayşe Acar Başarane kerd. Ganî nê hêrişî bi asanî nêrê destgirewtişî! Parlamentere îradeyê şarêke ya û o tehdîd tena ro aye nêmayo kerdiş, no hêriş duştê îradeyê Şarê Kurdî de ameyo kerdiş. No hêrişêke yo polîtîk o. Ganî serê tehdîdo ke ameyo kerdiş de dewa bêro akerdiş û o/a kes/e karî ra bêro dûrîvistiş!  Ganî êdî ziwandergî duştê cinîya Kurde de û sîyasetê Kurdî de nêro kerdiş!  Ma do di heme şert û mercan de zî têkoşîna xo bidê dewamkerdiş. Ma hêrişanê înan û tehdîdanê înan ra nêtersenê."