WAN - Dadîyê ke seba edalet bêro ca bi mengan  'Nobeta Edaletî' de yê û vatî: Seba ma Roja  Dadîyan rojêka ma tutanê xo dir bêrê têhetî ya. 

 

Xeylêk wareyê Tirkîya û Kurdistanî de na serre zî dadîyî Roja Dadîyan bi xemgînê la bi xoverdayîşî derbas kenê. Seba ke binpaykerdişê heqan ê zîndanan de bêrê peynîkerdiş û tepişteyê nêweşî bêrê veradayîş,  Amed, Wan, Stenbol û Îzmîrî de dadîyê ke dest bi 'Nobeta Edaletî' kerdî bi mengano  têkoşîna xo domnenê. Dadîyan ê Wanî ra ke 'Nobeta Edaletî' de yê Aslihan Tîmûre û Asîye Abî dîyar kerdî ke bê tutanê înan Roja Dadîyan seba înan bêmana ya. 

 

'Ma do verê zîndanan de pabeyê roja vînayîşê tutanê xo bê' 

 

Aslihane dîyar kerd ke, ê do na serre zî Roja Dadîyan verê Zîndanê Tîpê Fyî yê Wanî de bê lajê xo Botan Tîmûrî ke 6 serrî yo tepişteyo derbas kerdo û dewam kerd: "Bi serrano vera ke lajê mi, mi ra dûrî yo, nê roşanî, nê zî Roja Dadîyan seba mi tu manaya înan çinî ya. Xeylêk dadî do ewro tutanê xo ra yan dîyarî yan zî vilikan bigîrê.  La ma do reyna verê berê zîndanan de pabe bimanê ke ma tutanê xo dir 10 deqeyî bi telefon pêvînayîş bikerê. Ma destê xo dergê tutanê xo kenê la dêsî mabênê ma de manî yê. Destê ma tal manenê û zerra ma veşena."

 

'Ma pîya edalet biwazê'

 

Aslihane dîyar kerd ke hemverê bê edaletî ganî pîya têkoşîn bikerê û wina vat, "Bi mengan o ma Baroyê Wanî de seba edaletî nobete de yê. Ma seba edaletî têkoşîn bikerê. La selahîyetdarî tu cewab nêdanê waştişanê ma. La ma zanê ke edalet bi têkoşînê ke ma pîya danê do bi ca bêro. Seba nê ma veng danê heme dayikan kenê; bêrê ma pîya edalet biwazê.”

 

'Dîyarîya pîl seba mi rojêke lajê xo dir derbaz bikerî ya’

 

Asiye Abî ke nobeta edaletî de ya zî dîyar kerd ke lajê ci Emrah Abî vernîya bi 6 mengan Zîndanê Tîpê Fyê Wanî surgunê Zîndanê Tîpê Tyê Osmanîye kerdê û wina vat, "Lajê mi nêweşîya qelbî ci dir esta û verê ke bêro tepiştiş ameliyat bibi. Mi bi kedêke pîl ey ard na roje. Lajê mi zîndanê Tîpê HD yê Erziromî ra şawitî Zîndanê Muşî ya Tîpê E, uca ra zî şawitî Zîndanê Tîpê Fyê Wanî. Roja ke surgûnê Zîndanê Osmanîye kerdê, ez nêşîya serdayîşê ci. Roja Dayîkan seba mi bê mana ya.  Ez vilikan nêwazena, rojêke bi lajê xo dir derbaz bikerî wazena. Na seba mi dîyariya tewr pîl a.”

 

'Cigêrayîşê ma yê edaletî do rojêke netîce bibo’

 

Asiye vengdayîşê peynîkerdişê şerî û pêrodayîşan zî kerd û vat, "Do cigêrayîşê ma yê edaletî rojêke netîce bido. Ma do bi têkoşînê ke pîya bifê serbikewê. Rojê ke ma bêrê têhet nêzdî yê.”