AMED - Leyla Guvene bi wesîleyê Roja Dayîkan mektuba ke şawit de wina vat: “Dayîka Uveyşe heta Dayîka Taybete, Dayîka Berfo heta Dayîka Hatune, sozê ma seba heme dayîkanê Aştîye, Dayîkê Şemeyî û dayîkê tepişteyan rê; demêk derg de ney, demêk kilm de ma do şima dir Wareyê Amedî yê Şêx Saîdî de bêrê têhet.”

 

Hemsereka KCDyî Leyla Guvene zîndanê Cinîyan ê Xarpêtî de bi wesîleyê Roja Dayîkan, dayîkê ke tutê xo vînî kerdê û têkoşîn kenê mektubêke şawit. Leyla mektuba ke şawit de Dayîkê Aştîye, Dayîkê Şemeyî, Dayîkê Plaza De Mayo û heme dayîkanê têkoşer rê mesaj şawit.

 

Leyla mektuba xo de wina vat:

 

“Seba dayîkanê ma yê rêzdar ke her het ra newe ra huyayîş ma rê musnayî, dimayê her qirkerdişî newe ra musnayî ma û dimayê her bêhuqûqî îrade newe ra ma rê musnayî…

 

Ez zîndanê Xarpêtî ra silam û rêzdarîyê xo şawena,  destê şima yê pîroz maçî kena. Ez bawer kena ke şima Dayîkê Aştîye sey her tim rincan ê. Seba şima her tim bêhuqûqî, bêhukmî, bêtêduştî têkoşîn bikerê. Çayê dinya de pêrodayîş û şer bibo kezeba dayîkan veşena. Dayikê Plaza De Mayo heta Dayikê Şemîye û şima Dayikê Aştîye, bi xoverdayîşê xo yê ke sînor  derbaz kerdê, seba komelî her tim bî hêvî. Şima bi kezeba xo ya veşaye seba azadî û aştîye welat bi welat gêrayî. Şima polîsê ke bi copan hêrişê şima kerd, hukmê bêhuqûqî şima muhakeme kerdî û leşkerê ke berê şima şiknayî û kewtî zerre,  gardiyanê ke cigêrayîşê viranî şima rê ferfz kerd ra vat, ma aştîye wazenê. Bi ziwanê ke şima nêzanê belkî zî yewin vatişê ke musayî ‘Aştîye’ yo.

 

Bêsamîmîyetî hêrsê şima zêde keno

 

Şima dayîkê fedakarî, seba dej û elemê şerî baş zanê her tim aştîye de israr kenê. Her şert û mercî de şima tutanê xo û waştişê înan wayîr vejîyayî. Israr û xoverdayîşê şima yê wareyan û seba aştîye sey kulmêke rîyê kesê ke vatêne, ‘Wa Kurdî dayikanê xo nêvînê’ kewt. Yê ke şer de israr kenê, yê ke masaya çareserî qelibnayî, nê rojan reyna vera ke şerm bikerê, do roja dayîkan pîroz bikerê. Roja Dayikan ke awankerdişê modernîteyê kapîtalîstî ya, esas de birînê şima tewr giran kena. Nê eşkerayîyê sexte û bê samimîyet hêrsê şima tewr zêde kena. Seba ke şima zanê siyasetmedarê ke tutê xo Amerîkayan de danê wendiş, ê şima zî şawenê leşkerî.

 

Gelo no fehm eşkeno senîn bêro îfadekerdiş?

 

Yê ke şima tutanê xo bi delalî wey kerdê, terorîst îlan kenê, tu wext dejê şima fam nêkenê. Esmer Tunç dayîkêka û di lajê xo bodrumanê Cizîre de cenazeyê înan teşhîs kerd. Sewbîna esteyê lajê dayika Halîse bi kolî, bi kargo ameyî şawitiş. Dayîka, Cemîle Çagirka cenazeya kênaya xo dolaba qeşayî de nimna. Dayika Emîne cigêrayîşê xo yê edeletî dewam kena û çîyê ke nê dayîkî ciwîyenê tu wext ê nêzanê. Welatê ke se ra 99 musluman ê, dayîkî seba gorê tutê înan nêrê şikitiş nobete gênê. Tepişteyî bi îşkence yenê qetilkerdiş û seba cenaze wesayîtê cenaze nînê dayîş. Heta hetê îmaman ra cenazeyî nînê şutiş. Nêverdenê dayîkî şînê xo bigîrê. Hêrişê keyeyê sersaxî kenê. Gelo no fehm do senîn bêro  îfadekerdiş…

 

Mehkumê çadiran kenê û ser de sîyaset kenê

 

Dayîkanê ma persenê, ‘No rewşa ruhêke senîn o? No  hêrsêk senîn o? No dişminêk senîn o?’ Eke ma nê fehmî bi vatişê dayîkanê xo îfade bikerê, ‘Wa Homa çîyê ke bi ma kerdê, hezar rey bido înan.’ Rojanê vîyarte de menga Remezanî de dayîkêke 67 serrî ke zerrî bi kul a û bi rojî bî, zîndanê muşî ra surgunê zîndanê Xerpêtî ameye kerdiş û 14 rojan karantîna de mende. Gelo nê bi kam ci erjê Îslamî bêrê vatiş?Dayîka Besna lajê xo qirkerdişê Pirsûsî de şehîd daya û seba vatişê serê cenazeya lajê xo vata, ameya tepiştiş. No sîstem dişminê heme kesê ke hetê înan de nîyo yo. Ma bi îqtîdarê ke dejê dayîkan ra fam nêkeno rî bi rî yê. Xerabîyê tewr pîl zî dayîkê  bi dej yê verê HDPyî de Amede kerdê, dejê înan xebitnenê, hedefê qelibnenê û bi serran o mahkumê çadiran kerdê û serê înan de sîyaset kenê.

 

Do agêrê keyeyê xo  

 

No projeyêk taybet yê wezîrê karê zerî yo. Esas de seba cayê xo bipawo û seba biko çimê di lîderan nê metodî keno. Ma bawer kenê ke do dayîkê ke uca de nişnenê ro demêk nêzdî de agêrê keyeyê xo û verê dayîkan de ca bigîrê. Do sîstem nêeşko zêde bikewo mabêne dayîkan. Dejê heme dayîkan dejê ma yo.

 

Ma tevgerê cinîyan ê dinya de cayêk girîng girewt

 

Dayîkê Aştiyê yê bierj; Ma cinîyê kurdî îmza eşt serkewtişê xeylêk girîng. Rojawan û heme parçeyê bîn cinîyê kurdî tevgerê cinîyanê dinya de cayêk  girîng girewt. Rastî, duristî û pakitîya ke ma şima ra musayê, ma hewl da ma tewrê siyasetî bikerê. Vatişê, ‘wa sereyê şima tira kerde bêro la tewênaye nêro’ ke musnayo ma rê her tim esas bi. Ma cinîyê tepişteyî heme dayîkanê xo ra vanê; Qet seba ma xemgîn mebê. Ma her tim baş ê û bi moral ê. Ma moralê xo laçikanê xo yê sipî ra gênê. Ma zîndanan de zî bi ziwanê xo yê qedexekerde deyîran vanê û govende kenê. Wa zerrîya şima û şarê ma rehet bo.

 

Hêvî serkewtişî ra bierjaye ya

 

Rojê ke heme dayîkî tutanê xo ko bikerê, rojê ke do aştî û hizur serê cografyaya ma serdest bo, nêzdî yo. Dayika Uveyşe heta Dayika Taybete, Dayika Berfoye heta Dayika Hatune, soza ma seba heme dayîkanê Aştîye, Dayikanê Şemeyî û dayîkanê tepişteyan o; Demêk derg ney, ma do demêk kilm de şima dir Wareyê Amedî yê Şêx Saîdî de bêrê têhet. Heta a roje baş biewnê xo ra. Şima xora zanê, hêvî serkewtişî ra erjîyaye ya. Silam û rêz…”

 

Leyla Guven û tepişteyê cinî yê verê ci de…