STENBOL- Huqûqnasî, sîyasetmedarî û temsîlkarê rêxistinê cinîyan bale ante serê rewşa sîyasetmedare ya Kurde huqûqnase û tepişteya nêweşe Aysel Tugluke û dîyar kerdî ke îşkenceyî û binpaykerdişê xirabî resayê sewîyeyê ke xidarî û veng a berzkerdişê edaletî kerdî. 

 

Tecrîdê giranî yê îmralî de yê tesîrê serê heme zîndanan kenê û tepişteyê nêweşî rewşa înan her ke şina giran bena, binpaykerdişî û îşkenceyî, tepişteyan ver bi întîxarî ra benê. Yew tepişteyanê nêweşanê  giranan ra sîyasetmedare ya Kurde Aysel Tugluke ya. Aysele nêweşa Demansî ya nêeşkena tena ciwîya xo bidomno û êdî rayşîyayîşî de probleman ciwîyena, her çîyî vîrê xo ra kena. Vera raporê ATKyî yê 'Eşkena tepişte bimano' nîna tehlîyekerdiş û her cayê dinya ra seba Aysele têkoşînî û hetkarîyê pîlî kenê. 

 

Huqûqnasî, sîyasetmedarî û temsîlkarê rêxistinê cinîyan derheqê rewşe ya Aysele de ajansê ma rê qisey kerdî û dîyar kerdî ke îşkenceyî û binpaykerdişê heqan resayê sewîyeyê tewr corî. 

 

'Prosesê Huqûqî hema dewam keno' 

 

Endame ya Weqfî ya Cigêrayîşê Huqûqî yê Komele(TOHAV), avûkate Esma Yaşare derheqê babete de wina vat: "Birêz Aysele wextêke derg o problemê weşîyî yê cidî ciwîyena. Derheqê nê de Nêweşxaneyê Dewlete ya Sekayî yê Kocaelîyî teşîs dayî bî. Sazgehe ya Tîpê Edlî yê Kocaelîyî derheqo ke Aysele 'Nêeşkena tepişte bimano' de rapor da. Aysele sewqê ATKyî amîbî kerdiş. Tîya de binê kontrolî de amîbî girewtiş. La derheqê Aysel Tugluke de 'Ehlîyetê cezayî tam o û eşkena tepişte bimano' rapor da.  Prosesê huqûqî yê ke avûkatê endamê  weqfê ma zî tewir bîyê domnenê." 

 

'Wexto babete cinîya Kurde bo' 

 

Esma dewamîye de wina qal kerd: "Aysele cinîya, sîyasetmedarêke muxalîfa û Elewî ya. Wexto babete bena cinîya Kurde qerarî zî sîyasî yê. No qerar hetê huqûqî de rast nîyo. Duştê huqûqî yê heqê merdimanê ewrenselî û sîstemê huqûqî yo. Pêwa problemê weşîyî yê cidî Aysele nêameya veradayîş û binpaykerdişî resayê sewîyeyêke xidarî. Çi heyf ke do netîceyê negatîfî  vejîyê meydan. Ma nê hetî ra qaxû de yê. Nê hetî de wezîfeyêke muhîm keweno serê kiftanê huqûqnasan. Aysele seba bi seyan tepişteyê nêweşan bîya sembole. No wexto peyîn de ma malûmatê mergê tepişteyan gênê. Na rewşêka ke nêbeno bêro qebûlkerdiş. Nê reyna girêdayeyê raporê ATKyî yê. Raporê Tîpê Edlî yê Kocaelîyî û yê Tîpê Edlî yê Stenbolî yewbînan ra cîya yê. Seke Pisporê Tîpê Edlî û mamosteyê TÎHVî cigêrayîş kerdê û eşkera kerdê ke problemî estê. Tepiştişê Aysele resayo sewîyeyêke îşkenceyî." 

 

'Zîndan de mendişê aye rîskêke yo pîl o' 

 

Esma dewamîye de wina qal kerd: "Pêvînayîşo peyîn de Aysele dir problemê cidî yê hişî  ameyê vînayîş. Aysele cinîyêke bi serrano ke sîyaset kerdo, avûkata û wayîrê zanayîşêke pîl û entelektuel a. Pêwa nê çîyê asasî  nînê hişê aye, nîno vîrê aye. Coka nê, no tesîrê serê aye de keno. Ganî Aysele lezkî bêro veradayîş! Tepiştişê aye rayîr verê rîskî pîl keno. Ma derheqê huqûqî de proses caanê. Tîya de nuqteyo ke ganî ma ser o vinderê awankerdişê rayaumûmî yo. Bar keweno serê kiftanê huqûqnasan, cinîyan û muxalîfan. Aysele avûkatêke Baroyê Stenbolî de qeydkerdeya. Baroyê Stenbolî hemverê endama xo de xeylêk bêveng o. Sere ra organîzeyê huqûqî, heme kesî dustê rewşa Aysele  bikewê hereket. Ma hewêna dorkerde kenê ke ganî Birêz Aysel Tugluke lezkî bêro veradayîş!" 

'Aysele yew kese ra muhîme ya têkoşînê cinîyan a' 

 

Hemsereka HDPyê Stenbolî Îlknûr Bîrole zî wina bale ante serê rewşa Aysel Tugluke: "Ganî şert û mercê tepişteyanê nêweşan bêrê awankerdiş û heqê înan ê dermankerdişî bêrê teslîmkerdiş. Aysele yew kesan ra  muhîme ya sîyasetê demokratîke  ya. Yew kesan ra muhîme ya têkoşînê cinîyan û Şarê Kurdî  ya. A huqûqnasêka û pawitoxe ya heqê merdiman a. Vera nê prosesê ke hemverê aye de yê rewşêke duşthuqûqî yê: Ne goreyê huqûqê ewrenselî yê,  ne goreyê qanûnî yê, ne goreyê prensîbê tibî yê û ne zî goreyê ehlaqî yê!" 

 

'ATK binê talîmatê sîyasetî de yo' 

 

Îlknûre ramojnayîş kerd ke pêwa ke rewşa Aysele werte de yo ATKyî raporo ke 'Eşkena tepişte bimano' dano û wina peynî ro ci ard: "ATK  binê talîmatê sîyasetî de hereket keno. Aysele nêweşa Demansî ya. Vera nê zî hişê xo vindî kerdo û nêeşkena tena ciwîya xo bidomno. Waştişê ma no yo ke, ma reyêna dorkerde kenê ke wa Aysele lezkî  bêro veradayîş." 

 

'Ma seba Aysele waştişê edaletî berz nikerê' 

 

Endame ya Hetkarîya Cinîyan ê Kirkyamayî Tulay Korkute zî bale ante serê rewşa bi hezaran tepişteyê nêweşî  û dîyar kerd ke heqê înan ê ciwîyayîşî û dermankerdişî yenê manîkerdiş û wina vat: "Aysel Tugluke têkoşîna cinîyan de, têkoşîna azadîya Kurdan de sîyasetmedarêka cinî ya ke têkoşîne kerda. Aysele nika nêweşîyî dir rî bi rî ameya verdayîş.  Tewr peynî ATKyî reyna goreyê waştişê dewlete rapor da û no goreyê etîkê tibbî nîyo. Ma sey cinîyan veng kenê ke ganî seba Aysele û tepişteyê nêweşî veng bêro berzkerdiş! Ma zanenê ke paştdayîşê cinî dêso ke nêrijno çinî yo. Ez veng ro heme kesî kena seba tepişteyê nêweşan û seba Aysel Tugluke waştişê edaletî wa bêro berzkerdiş."