ŞIRNEX - Şarê Cîzîre bale antî serê rewşa zîndanan û dîyar kerdî ke Şarê Kurdî tu wext sereyê xo zulmî rê nêtewêna yo û hema zî hemverê heme hêrişan xover danê. Sewbîna ardî ziwan ke ganî vengê tepişteyan bidê eşnawitiş û hemverê îşkence bikewê meydanan.

 

Hetêk ra binpaykerdişê heqan ê zîndanan hetêk ra zî hêrişê vera deskewtişê kurdan germbîyayîşê xo rojeva Şarê Kurdî de cayê xo gêno. Pêwa nê serebûtan ke qewimyenê, welatijan vengdayîşê wayîrvejîyayîşê, aştî û azadîye kenê. Ma verê xo da kuçeyanê Cîzîre û şarê Cîzîre fikrê xo ardî ziwan.

 

‘Serê kurdan de zulm û îşkenceyêk pîl esto’ 

 

Bedrîye Agman, dîyar kerd ke bi kiştiş û tepiştişî wazenê kurdan biqedênê û dîyar kerd ke serê kurdan de zilm û îşkenceyêk pîl esto. Bedrîye, vat: “Zilmo ke  kurdan rê ameyo kerdiş tu şarî rê nêameyo kerdiş û no zilm hema zî dewam keno. Ma kişenê, destbend kenê, kenê zindanan û danê surgunkerdiş. Ma nêwazenê kezeba tu kesî biveşo. Ma nêwazenê tepişteyî zîndanan de dinyaya xo bi bedelnê û gonî birijîyo. Heta peynî ma do wayîrê şarê xo vejîyê.”

 

‘Ganî wayîrê tepişteyan bêro vejîyayîş’

 

Hedîye Dasil zî bale ant serê rewşa tepişteyan û vat: “Zerrîya ma dayîkan xeylêk veşa ya. Ma wazenê aştîyêk mende bi ca bêro û tepişteyî zîndanan ra serbest bêrê veradayîş. Wa tu kes nêro kiştiş. Bi hezaran kurdî bêsûc û bîlasebep zîndanan de yê. Wa peynîya nê zilmî bêro dayîş û berê heps û zîndanan bêro akerdiş. Heqê tepişteyan yeno binpaykerdiş. Yê ke îşkence û zilm tepişteyan rê kenê wa Homayî ra bivînê. Tutê ma emrê xo zîndanan de derbaz kerdî. Kurdî zîndanan de pûyay. Ganî ma bibê vengê tepişteyan û heta peynî xoverdayîşê înan rê wayîr vejîyê. Ma azadîya tutanê xo wazenê.”

 

‘Tepişteyanê ma kişenê’

 

Medîne Gezmez zî wina vat: “Cuye ma rê kerdî zîndan. Yê ke dewaya azadîye kenê û hemverê zilmî de xover danê yê. Seba ke bêveng nêmanê, yenê tepiştiş. La yê ke dizdî kenê, tacîz û desteştiş kenê yenê veradayîş. La tutê ma mîyanê çar dêsan de yenê verdayîş. Tepişteyî bi serran o zîndanan de heqê înan yeno binpaykerdiş û seba nê sebeban xeylêk tepişteyî nêweş kewtî. Tepişteyê nêweşî nînê tedawîkerdiş. Zîndanan de dinyaya xo bedilnenê. Vanê tepişteyî întîhar kenê. Ma bawer nêkenê ke tepişteyê ma xo bikişê. Ê kişenê. Ma do heta peynî tepişteyanê xo rê wayîr vejîyê.”

 

‘Ma cuyêka azad û têduşt wazenê’

 

Hedîye Ay zî vat hêrişan qebûl nêkenê û wina qal kerd: “Bi tepiştiş û kiştiş wazenê ma çin bikerê. Zilm û zordestî bi ma kenê. Ma nêwazenê tepişteyê ma zîndanan de dinyaya xo bibedelnê. Ê seba azadiya ma bi serran o mîyanê çar dêsan de xover danê. Hemverê nê zulmî de ganî ma wurzê serê lingan. Bibi vengê înan. Kênaya birayê mi, kênaya mi û waya mi tepişte yê. Seba ke kurd ê ameyî tepiştiş. Yê ke vanê ma kurdê yenê îşkencekerdiş. Ê ziwanê xo rê wayîr vejîyayî û dewaya heqê ma kerdî. Wazenê kurdan biqedênê la kurdî nê qebûl nêkenê. Kurdî heqê xo yê bingehîn wazenê. Ma cuyêka azad û têduşt wazenê.”

 

‘Hemverê îşkence vejîyê wareyan’

 

Heybet Uniştu zî wina qal kerd: “Kurdan zindanan de emrê xo xelas kerd. Yê ke tutîya xo de ameyê tepiştiş zî hema zî zindanan de yê. Ma îşkence û zilmê serê tepişteyan qebûl nêkenê. Wa no zilm werte ra wurzo. Zerrîya dayikan û keyeyan veşena. Ganî ma tepişteyanê xo rê wayîr vejîyê û hemverê nê îşkenceyî vejîyê meydanan. Gama ke ma ewnîyenê zîndanan ra heme kurd ê. Wa çareseriyek bêro kerdiş û zulmê serê tepişteyan bêro peynîkerdiş. Ganî ma vengê înan bidê eşnawitiş. Wa tepişteyanê ma vera bidê û wa şarê ma azad bibo.”