Rabîa Onver

 

COLEMÊRG - Serê xeta sînorî de seba gulevaranê leşkeranê tirkî de her roje serebûtê kiştiş û birîndarî yenê ciwîyayîş û 6 serrê peyînan de netîceyê gulevarnayîşê TSKyî de 17 kesî dinyaya xo bedilnayê. Îdarekara ÎHDya Colemêrgî Sîbel Çapraz derheqê babete de qisey kerd û dîyar kerd ke amancê tîya oyo ke welatijan dewa înan ra vejê û bidê koçberkerdiş.

 

Qezaya Şemzînan û Derecîkî ya Colemêrgî de sînorê Mintiqaya Federe ya Kurdistanî de gêna, seba gulevarnayîşê leşkeranê tirkî her roje kesî yenê kiştiş û birîndar benê. Bi taybetî dimayê pêvînayîşê Rayberê PKKyî Abdullah Ocalan hetê AKPyî ra ame qedexekerdiş û dima serê sînorî de bi bahaneyê asayîşê sînorî bi desan cinî û tutî ameyî qetilkerdiş. Walîtî nê kiştişan zî bi pêroyî bi vatişê, ‘guleyê veradayîşê hewa’, ‘Gule bi xo teqiya’, ‘goreyê mevzuatî’ paweno û tehqîqatê yenê akerdişî zî xeylêk reyan bi qerarê nêtaqîbkerdişî netîce benê. Mabêne 2016 û 2022ine de goreyê ke zanayîşî çimeyê mintiqa ra ameyê girewtiş, Colemêrg de 3 ci ra tutî, 17 kesî netîceyê gulevaranê leşkeran de dinyaya xo bedilnayê û 17 kesî zî birîndar bîyê.

 

Îdarekara ÎHDyê Colemêrgî Sîbel Çapraz derheqê babete de erjnayîş kerd

 

Nêeşkenê heqê xo bixebitnê

 

Sîbele dîyar kerd ke 6 serrê peyîn de xeta sînorî de 13 kesî netîceyê gulevarnayîşê TSKyî de dinyaya xo bedilnayê û tena sînoran de ney, merkez û dewan de  zî yenê ciwîyayîş. Sîbele wina qal kerd: “Hemverê welatiyê mintiqa de tedayêk pîl esto. Mintiqaya Colemêrgî mabêne di sînoran de ya. Bi serran o welatiyê tîya ciwîyenê, bar ancenê. Xeylêk welatîyê sînorî citî yê û her di hetî zî heqê înan esto. La nêeşkenê heqê xo bixebitnê.”

 

‘Rewşa tacîzî esta’

 

Sîbelê vat, bi serran o yeno vatiş ke Derecîk berê sînorî bêro akerdiş û pêwa nê nêameyo akerdiş û wina vat: “Welatijî seba berê sînorî padaye yo nêeşkenê debara xo bikerê. Seba nê welatijê ke xeta sînorî ra şinê sînor û uca de yenê kiştiş. Seba her hetî ra tedayê leşkeranê tirkî esto. Roja ma şî uca her  10 deqeyî de top ameyîne eştiş. Amancê înan oyo ke dewan veng bikerê û koçber bikerê.”

 

Sîbele peynîya qiseykerdişê xo de diyar kerd ke welatiyê ke sînor de ciwîyenê tersêk pîl esto û seba nê zî êdî nêeşkenê debara xo bikerê. Sîbele vat, seba kes nêro kiştiş û vernîya kiştişî bêro padayîş, ganî tedbîrî bêrê girewtiş.