ANQARA - Tulay Hatîmogûllari ya HDPyî dîyar kerd ke bi hêrişê hemverê Mintiqayê Federalî yê Kurdistanî dir wazenê îrade û organîzebîyayîşê Kurdan bişiknê û vat, Kurdî do tu reyî PDKyî efû nêkerê. Tulaye malûmatî dayî ke heme hêzê tasfîyeyê rejîmî wazenê heme cîyabîyayîşan bidê hetêke û têkoşîn bikerê.

 

AKP bi hetkarîya Partîya Demokratîke ya Kurdistanî(PDK) duştê Mintiqayê Federalî yê Kurdistanî de, 17ê Nîsane de hêrişê dayî destpêkerdiş û hêrişî roja 13ine de dewam de yê. Lejê ke mintiqayê Zap, Avaşîn, Metîna û Kurojahroyî de dewam kenê, hetê Şarê Kurdî ra û dostê Kurdan ra reaksîyonê pîlî yenê motiş.

 

Parlementere ya HDPyî ya Adanayî Tulay Hatîmogûllari derheqê hêrişê hemverê Mintiqayê Federe yê Kurdistanî de erjnayîş kerd.

 

'Wazenê serdestîye awan bikerê'

 

Tulaye ramojnayîş kerd ke hêrişê duştê mintiqayê Federe yê Kurdistanî de zaf hetî yê û dimayê Mûtabakatê Dolmabahçeyî ameyo înkarkerdiş, herinde de hêrişê hemverê Kurdan zêdeyêr bîyê û planêke bêtesîrkerdişî kewto dore. Tulaye wina dergî dayî qiseyê xo: "Planê bêtesîrkerdişî hema di dore de yê. Şerê Rusya û Ûkraynayî de bale ya her kesî weyra de ya. Tirkîya mudaxaleyê hemerê Sûrîyeyî û Vaşurî Kurdistanî de zêde kerd. Sîyasetê teverî yê Tirkîyayî bi neyarîya duştê Kurdan de caano. Tirkîya wazena rayaumûmî wina îqna bikero. Heto ke nîno vînayîş zî polîtîkayê Neo-Osmanî yo. Yew xeyalêk tewr pîl ê AKPyî no yo ke bi sînorê Mîsakî Mîlî nêmano û Tirkîya boverî serê Iraqî, Musûl û Kerkukî de serdestîyî bikero û sînorê Vakurî û Rojhelatê Sûrîyeyî hîra bikero

 

‘AKP bi kaos hewl dano ke hêz bigîro'

 

Tulaye hêrişê hemverê herêma Federe ya Kurdistanî sey xeyalê Osmanî şîrove kerd û wina vat: “Îqtîdar seba nê operasyonan meşrû bikero sere dano kilifê têkoşînê bi terorî. La no çîyêk newe nîyo. Îqtîdar seba bîyayîşê xo mende bikero gaman erzeno û no zî hetê her kesî ra yeno vînayîş. Senîn na rewşe sîyasetê teber de xebitneno, zere de zî xebitneno. AKP hêzê xo vînî keno. Bi kaos hewl dano hêzê xo newe ra top bikero.”

 

‘Êdî tu kes PDK efû nêkeno'

 

Tulaye dewam de wina vat: “Hedef wedaritişê îradeyê sîyasî yê kurdan o. PDK zî polîtîkayê ‘parçe bike, rayîra bibe' yê emperyalîstan keno. Vernîya averşîyayîşê Kurdan PDK asteng o. Helwestê PDKyî yê hemverê hêrişan qelsiyan vejeno werte. Şarê Kurdî reaksîyonê cidî nîşan danê. Do kes PDKyî efû nêkero. Ne Tirkîya û ne zî hêzêk bîn do nêeşko hemverê kurdan bi serkewo. Amancê înan oyo ke ê îradeyê rêxistinkerde yê Şarê Kurdî bişikinê. Nê hêrişan de tena AKP çin o. No sey adet yeno kerdiş. La her kes zano ke do nêeşkê hêzê rêxistinkerde yê Şarê Kurdî biqedênê."

 

‘AKP her ke şino vînî keno'

 

Tulaye dîyar kerd ke Tirkîya prosesêk giran ra derbaz bena û îqtîdar hewl dano bi operasyonan proses sererast bikero û wina vat: "Merdimî ameyê sewîyeyêka nêeşkenê fatureyan bidê. Heme çimeyê welat pêşkêşê hetkeran ameyê kerdiş û seba şer zî pere yenê xerckerdiş. Welatîyê Tirkîya hemverê vêşanî têkoşîn kenê. AKP her ke şino hêzê xo vînî keno û qels beno. AKP bi zor hewl dano ke reaksîyonan bipelçiqno. Ganî ewro heme hêzê ke wazenê, no rejîm tasfiye bibo, her çî bidê hetêke û pîya têkoşîn bikerê."