Medya Uren-Derya Ren

 

AMED - Derheqê hêrişê TSKyî yê serê Başûrê Kurdistanî de ameyê destpêkerdiş, ma mîkrafon dergê cinîyanê Amedî kerd. Cinîyê Amedî hêriş şermezar kerdî û wina veng dayî: "Ganî kurdî wurzê serê xo. Ganî kurdî wayîrê Başûrê Kurdistanî vejîyê. No şerê dişminî yo."

 

Dewleta tirkî bi desan operesyonê leşkerî yê teberê sînorî heta nika dayo destpêkerdiş. Dimayê pêvînayîşê bi PDKyî dir ameyî kerdiş dima zî, 14ê Nîsane ra zî herêma Zap, Metîna û Avaşîn de hêrişê hewa û bejayî dest pêkerdî. Derheqê hêrişanê ke Tirkîya dayê destpêkerdiş, ma zî mîkrofon dergê cinîyan ê Amedî kerd. Cinîyê Amedî vatî, ganî kurdî wurzê serê lingan.

 

'Berzanî bi şîrîkê qirkerdişî'

 

Delal Aktaş dîyar kerd ke Berzanî beno şirîkê qirkerdişî û vat: "Keyeyê mi verê alayê leşkerî de yo. Vizêr heta serê siba teyareyê şerî wuştî. Xora qet nêvindertê, la no hewteyêk o bêmabên wurzenê. Ma serê şamî de, serê nimajî de ne eşkenê biwerê, ne zî eşkenê nimaj bikerê. Nêrehetîyê ma veng ra nîyo. Ma zanê ke nê teyareyî hêrişê kam cayî kenê. Verê zî hêrişê Rojawan kerdî û xora bi taybetî giranî dayê Başûr. Ê hêrişê ke yenê kerdiş, yê her wextî yê. Na dewlete ma tepişnena, ma kişena, ma kena zîndan. Ma kerdişanê keyeyê Barzanî zî şermezar kenê. Ma nêwazenê uslubê xo zî xira bikerê labelê o bi şîrîkê nê qirkerdişî. Ganî kurdî nêbê qatilê yewbînan û nêbê qatilê herra xo. Bi seyan ciwanê Başûr tewrê refê gerîla bîyê û mil bi mil înan dir xover danê. Ma gonî rijna û tu xîyanet sere de ê ciwanan rê kenê."

 

'Zirar danê her cayê Kurdistanî'

 

Delale wina qedêna: "Nê hêrişî tena vera cemaetêk nîyê. Bi nê bombevaranan dir çol û koyan talan kenê. Zirar danê xoza, heywanan û heme çîyê Kurdistanî. Heta çekê kîmyewî zî xebitnenê. Verê heme çî vengdayîşê ma Berzanî rê yo. Ganî êdî xîyanet nêkero. Her roje yeno bi Tirkîya dir pêvînayîş keno. Bi neyarê kurdan dir serê eynî masa de ronişneno. Wa hişê xo bîyarê sereyê xo. Ma êdî şerm kenê, nameyê ci bîyarê serê ziwan. Înan xo rê tu rûmet nêverdayo. Kurdistan bi xîyanetê xo dir lêşin kerdî. Lazim o ma zî wurzê. Her ca de ganî kurdî bibê yew û hemverê nê hêrişî helwestê xo nîşan bidê. Na bêvengîye tehlukeyêk pîl a. Dewlete eynî dewlet a, ma ameyê vurnayîş. Verê rexmê pêrodayîşan ma vejîyayîne kuçeyan û ma  helwestê xo nîşan dayîne."

 

'Ganî kurdî wayîrê Başûrê Kurdistanî vejîyê'

 

Serê persa ma ya dewleta tirkî heme hêzê xo yê ekonomîye daya şerî dir Ayşe Demîr wina vana: "Ma qebûl nêkenê. Înan rê helal nêbo. Homa heqê ma zî înan rê nêverdo. Ganî şer bêro vindarnayîş. Bi nê bahaneyê şerî dir zirar danê canê ma, danê keyeyê ma, xozaya ma. Ma wazenê aştî bi ca bêro. Ganî şarê kurdî zî bibê yew û nê şerî bidê vindarnayîş. Şarê kurdî wayîrê  Başûrê Kurdistanî vejîyo."

 

'Yê ke ray dayê ci do cehenem de biveşê'

 

Muhsîne Gumuş bale ant serê krîzê ekonomî û vat: "Krîzê ekonomî hende ma peyser berdo, êdî ma vanê hema pîzeyê ma mird bo. Çîyêk bîn endîşeyê ma nêmendo. Êdî raya xo medê înan ke nêkewê serê sereyê ma. Koşkan de werdê fitarî dano, tîya nan çin o ma fitara xo abikerê. Ganî êdî şar wurzo serê lingan. Eke kurdî bibê yew do na rewşe de nêbîne. Eke Amed de tena kurdî rawuştêne do Amed bilerznayîne labelê çi heyf. Êdî vanê, marê ke nêzdîyê mi nêbo, wa hezar serran biciwîyo. Nika her ca de bombevaran keno. Yê ke ray danê înan wa nika hesab bidê. Do yê ke ray dayê dinya bîne de biveşê."

 

'Wa Erdogan bi aqil bo'

 

Fatma Ateş zî wina vat: "Ma nêwazenê şer û pêrodayîş virazyo. Ganî êdî herdi hetê zî serê masa de roşê. Ganî misilmanî yewbînan qetil nêkerê. Serê xatirê menga remezanî ma hêvî kenê ke şer bêro vindarnayîş û aştî dinya de bi ca bigîro. No şerê dişminî yo. Wazenê ma bişkênê, ma rodê, la ê do zî bikewê. Ganî Erdogan bi aqil bo."

 

'Ma nêwazenê şer û pêrodayîşî bibê'

 

Semra Deren vat, ê nêwazenê rewşe bi no hewa dewam bikero û vat: "Ma nêwazenê şer û pêrodayîşî virazyê. Zerrîya ma dejena. Hende zerrîya dayîkan veşena, ma êdî nêwazenê na rewşe dewam bikero. Homa berêk xeyrî ma rê abikero û awêke nê adirî rê bikero."

 

Cinîya ke nêwaşt nameyê xo vaja wina vat: "Heta ke merdimî nêşêrê serê eslê xo do no şer û qirkerdiş dewam bikero. Hîn kesî nê şerî ra rant qezenç kenê û hîn zî uca de yenê qetilkerdiş."