RIHA - Çalakîya "Nobeta Edaletî" ya Keyeyê Şenyaşarî 415 rojî yo dewam kena. Emîne Şenyaşare, çalakîya ewro de vat: "Ma do Roşanê Remezanî de zî tîya de bê. Heta ke lajê mi nêro veradayîş, ez o vernîya edlîye ra nêşî. Bînaya edlîye bîya keyeyê mi."

 

Çalakîya keyeyê Şenyaşarî ya vernîya Edlîyeyê Rihayî roja 415ine de dewam kena. Emîne û Ferît Şenyaşar yê ke saetê serê siba de keyeyê xo yê qezaya Pirsûsî ra ameyî vernîya Edlîyeyê Rihayî, çalakîya xo ya nobetî dayî destpêkerdiş.

 

Keye, mîyanê saetê mesaiyî de avûkat û welatîyê ke verê înan keweno edlîye, derheqê têkoşînê xo yê edaletî xeberdar kenê. Emîne Şenyaşar ke pêwa problemê xo yê weşîye Nobeta xo ya Edaletî dewam kena, dîyar kerd ke Roşanê Remezanî rê çend roj mendo û wina vat: "Ma do Roşanê Remezanî de zî tîya de bê. Heta ke lajê mi nêro veradayîş, ez o vernîya edlîye re nêşî. Bîna edlîye bîya keyeyê mi.  Ez do roşan de verê tutanê xo û tornê xo de nêbî, tîya de bî. Wa qeydê nêweşxaneyî bêrê vînayîş û kesê qirkerdiş kerdê bêrê tepiştiş. Keyeyê mi tena yew, di kesî nêkişt, xeylêk kesî bî. Bi zilmêk pîl kiştî. Wa cezayê xo biancê. Çira yenê veradayîş. Heta ke Fadilê mi nêro, ez nêeşkena keye de roşî. Roniştiş mi rê qedexe yo. Dimayê roşanî ez o şandînan nêşêrî keye. Ez o şan de zî tîya verê edlîye de rakoyî. Êdî bes o. Wa lajê mi vera bidê. Înan dir wijdan çin o?"

 

Keyeyî hesabê xo yê medya dîjîtalî de nê pare kerd: "Ma nîm edalet nêwazenê, edaleto tam wazenê. Îdir ra heta Edîrneyî, Îzmîr ra heta Şirnex her kes heqîqet musa. Nêweşxaneyê dewlete de qirkerdişêk organîzekerde esto. Dîmenê kamerayê asayîşî yê nêweşxaneyî çira ma ra û rayaumumî ra yenê nimitiş."