AGIRÎ - Cinîyan seba versûcê Fatma Altinmakas bêrê muhakemekerdiş û ceza  bigîrê veng dayî û vatî: "Seba ma destekêk raşt nîşan bidê û hemverê nê zîhnîyetî şer bikerê, ganî ma eywanê rûniştişî de bê."

 

Qezaya Milazgirtî ya Mûşî de Fatma Altinmakas seba tecawuzê Sînan Altinmakaso sîstematîk kerdêne, gerre bikera şibî qereqole labelê îfadeyê bi kurdî yê Fatma zabitnameyan de ca nêgirewtib. Fatma dima ra hetê Kazim Altinmakasî ra amebî kiştiş. Vizêr versûc Kazim reya heştêne vejîya vernîya dadgehe û vatişê cînayetê cinîyan meşru keno kerd. Sewbîna avûkata dosya Rûken Guven dîyar kerd ke ganî Sînan Altinmakas ke bîyo sebebê kiştişî bêro tepiştiş. Rûkene dîyar kerd ke qeydê telefonî yê ke Sînan dimayê tecawuzî izê Kazimî gêrayo û seba Kazim, Fatma bikişo teda kerdo. Sewbîna Rûkene dîyar kerd ke Fatma bi qerarê mîyanê keyeyî ameya qetilkerdiş û vat, ganî cinî na dewa rê wayîr vejîyê.

 

Kam ci hêzê tarî Sînan Altinmakasî paweno?

 

Femînîsta azad Firdevs Hoşer ke tewrê roniştişî bîbî wina vat: "Ma wazenê Sînan Altinmakas ke verpirsîyarê esil nê cînayetî yo bikewo mîyanê dosya. Ma qebûl nêkenê ke tecawuzker kuçe de bo. Meseleya esil tepiştiş û muhakemekerdiş Sînan Altinmakasî yo. Bi di serrî yo hetê  serdozgerîya Milazgirtî ra dewa ameya akerdiş la hema zî tu averşîyayîş çin o. Ma sey femînîstan pers kena: Kam ci hêzê tarî Sînan Altinmakasî pawenê?"

 

'Dadgehe bî hemkarê nê zîhnîyetî

 

Hemsereka Şubeyê Komeleya Huqûqnasê Seba Azadîye (OHD) Ebru Demirtepe wina vat: "Versûc Kazimî vat, 'Tu cinî kêfî ra nîna kiştiş.' Yanî waşt ke vajo, 'Cinî merg heq kenê.' No vatiş hetê dadgehe ra esas ame girewtiş û dadgehe waştişê ma yê mudahilikî qebûl nêkerd. Dadgehe bî hemkarê nê zîhnîyetî. Eynî wextî de ma fikiryenê ke Fatma bi qerraê mîyanê keyeyî de zî ameya kiştiş. Delîlê dosya de nê ramojneno. Coka ganî komel wayîrê na dewa vejîyo. Seba ma nê zihnîyetî vindarnê, ganî ma eywana roniştişî de bê."