Rozerîn Gultekîn

 

STENBOL - Dayîka Agît Îpeko HPGyîj ke cenazeya ey bi kargo amebî şawitiş, Halîse Aksoy reaksîyon vera hêrişê bi hemkarîya TSK û PDKyî hemverê Metîna, Zap û Avaşîn de ameyî kerdiş, ramojna û vat: "Ewro ti bi Tirkîya dir hemkarî kenê la demo ke karê to înan rê biqedîyo, do to nîmeyê rayîrî de verdê. Wa hişê to sereyê to de bo. Kîşte wayê û birayê xo de ca bigîre."

 

Hêrişê bi hemkarîya Hêzê Çekdarî yê Tirkî (TSK) û Partîya Demokratîke ya Kurdistanî (PDK) dir hemverê Herêma Federal a Kurdistanî ameyî destpêkerdiş, roja 11ine de dewam keno. Herême bi teyareyê şerî û obusan yena bombevarankerdiş û TSK bi hêzê taybetî yê PDKyî dir hewl dano bejayî de zî aver şêro. La heta nika xoverdayîşê ke ameyo ramojnayîş, averşîyayîşêk nêvirazyayo û çalakîyê hemverê hêrişan roj bi roje dewam kenê.

 

Dayîka Agît Îpeko HPGyîj ke cenazeya ey bi kargo amebî şawitiş, Halîse Aksoy û îdarekara HDPyî ya Esenlerî Emîne Arsalan derheqê hêrişan de reaksîyonê xo ramojna û vatî, ganî her kes hemverê hêrişan wurzo serê lingan.

 

'Bêrê serê rayîrê rastî'

 

Halîse Aksoy dîyar kerd ke dayîkî şer nêwazenê û reaksîyon vera  hemkarîya Barzanî ya bi Tirkîya ra ramojna û wina vat: "Gelo tutê ke yenê qetilkerdiş, ti nêvînenê? To dişminî dir uca de şer dayo destpêkerdiş. La ti çi zî bikerê PKK nêqedêno. Ewro tu bi Tirkîya dir hemkarî kenê la demo ke karê to biqedîyo, do to zî nîmeyê rayîrî de verdo. Wa hişê to sereyê to de bo. Kîşte wayê û biranê xo de ca bigîre.  Cenaze yenê parçekerdiş. Kenê paketan û şawenê. Ma yew zî bimanê ma na rewşe qebul nêkenê. Dişmin nika to ra vano dost la bi hawayêke xaîn dorê to de gêreno."

 

‘Tirkîya û Barzanî aştîye ra tersenê'

 

Halîse bale ant serê şerê taybetî yê dewlete kena û vat, beşêk ciwanê kurdî tewrê PKKyî benê û beşêk zî hetê dewlete ra yenê xapênayîş û hemverê kurdan yenê xebitnayîş. Halîse nê vat: "Ez veng dana ciwanê kurdan. Wa dişminê xo nas bikerê. Feydeyê dişminî seba ma çin o. Ma rê nêbeno dost. Heta ke ma bibê, do no dişmiinî bibo. Dişmin serê paşta ma de karê xo çareser kena. Tirkîya û Barzanî aştîye ra tersenê. Mesrur Barzanî vano ke ez bi Erdoganî dir azad bena û ey dana planê peynî. La aştî û azadî girêdayê PKK û Rayber Apo yê. Mifteyê lêşin destê Erdogan de yo. Xora peynîya dewleta tirkî ameya. Do nê şerî dir  peynîya Mesrur Barzanî zî bêro."

 

'Xo ra dûr mevînê'

 

Halîse tewr peyîn veng da her kesî û vat: “Cenazeyan bivînê. Xo ra dûr mevînê. Ewro cenazeya ma yena do siba ê şima zî bêro. Wa kes nêvajo ke tutê mi tewrê çîyêk nêbenê. No rayîr vernîya her kesî de yo. Ganî her kes vengê xo berz bikero."

 

‘Na dewlete tu wext nêbena dostê Barzanî’

 

Emîne Arslan zî dîyar kerd ke Mesut û Mesrur Barzanî hewl danê ke herême de serdest bê û vat: "Wa Barzanî nê bizano, dewlete tu wext ci rê nêbena dost. Senîn ke ewro ma rê zalimî kena, roje bêro do înan rê zî bikero. Dişmin qet nêbeno dost. Seba PKKyî biqedêno xayîntî kena. La PKK tu wext nêqedêno. Ê çend hêriş kenê, PKK hende pîl beno. Ma do serbikewê. Barzanî sîstemê axatî wazeno. Seba nê bi Tirkîya dir hemkarî keno. Her tim dişminî keno. Erdoganî dir hemkarî keno la do rojêke bikewo. Ma do nê rojan bivînê. Wa kezeba tu dayîke nêveşo. Seba nê dayîkî wurzê serê lingan."