Medya Uren 

 

MERKEZÊ XEBERAN - Hemsereke ya KNKyî Zeynep Mûrat têkilîyê hêrişê Tirkîyayî û hetkarîya PDKyî yê Tirkîya dir ê behs kerd û vat: "No hêrişê Tirkîya helqaya peynîyê projeyê îşxalkerdişê Kurdistanî yo. Îqtîdarê AKPyî zî û PDKyî zî baş zanenê ke şar îdarekarîya înan ê bi krîzî êdî qebûl nêkenê. Duştê rijyayîşê îqtîdarîya xo de mîyanê hewldayîşan de yê. Seba projeyê înan ser de nêkewê zî ganî ma hetkarîye bidê têkoşîna gerîllayî û seferber bibê!"

 

Dewlete ya Tirkî bi hetkarîya PDKyî û Hukmatê Kazimî roja 17ê Nîsane de duştê Vaşurê Kurdistanî de dest bi hêrişan kerdî. 15ê Nîsane de Serekwezîrê Hukmatê Mintiqayê Federalê Kurdistanî Mesrûr Berzanî Anqara de bi serekkomarê Tirkîyayî Erdoganî û Musteşarê MÎTî Hakan Fîdanî dir ronişt. Dimayê pêvînayîşî mintiqayê Zapî, Metînayî û Avaşînî de hêrişê hewayî û bejîyî dest pêkerdî. Têkilîyê hêrişê TSKyî û hetkarîya PDKyî, Hemsereke ya Kongreya Neteweyî yê Kurdistanî (KNK) Zeynep Mûrat persê ma verpersnayî.

 

'Tirkîya mîyanê krîzan de menfîetê xo fikirêna'

 

Zeynepe destpêkerdişê qiseyanê xo de serê raverşîyayîşê sewîyeyê dinyayî de aver kewenê û hewldayîşê Tirkîya de qisey kerd. Zeynepe wina proses erjna: "Tirkîya serranê 1980yî ra roj bi roje hêrişan giranêr dewam kena. Hêrişê înan ê peynî yenê ca zî xusûsîyêke xo yê cîya estê. Wazenê roja ewroyîne de hêrişêke bi serrano danê rayrayîş biresnê netîceyî. Nika di mîyanberê Rusyayî û Ûkraynayî de zî şer esto. Dinya di mîyanê şerêke îstîsnayî dir derbas bena. Yeno asênayîş ke projeyêke vurînayîşê dinyayî esto. Bi xusûsî projeyê nê welatan serê Rojhelatê Mîyanînî de yê. Tirkîya zî wazena no krîz û teşqeleyê bîyayeyî seke fersendî bixebetno. Xo ra hewnêke înan ê tarîxî bîbî û nika zî seba aye kewenê mîyanê hewldanî. Bêşik zî do heme polîtîkayê xo zî serê Kurdan de bidê kerdiş. Wazenê Şarê Kurdî bê îradeyî verdê û înan çinî bikerê. Serê ê asasî de zî projeyê newekerdişê sînorê dinyayî de para xo pîl bikerê. Tirkîya wazena sînorê Mîsakî Mîlî dorkerde bikero destê xo."

 

'Wazenê bi hêrişê serê PKKyî Kurdistan îşxal bikerê' 

 

Zeynepe qal kerd ke hêrişkerdoxî wazenê bi çinîkerdişê bîyayîşê Kurdî dir xeyalê xo zî bîyarê ca û wina dewam kerd: "Tirkîya di Pêkerdişê Lozanî de xo seke mexdûr da mojnayîşkerdiş. Vera ke sînorê Mîsakî Mîlî ameybî wedaritiş. Nika zî seba bidestgirewtişê nê herdî hêrişêke verhîrayî ke heme hêzê xo yê dayîyî, dayo destpêkerdiş. Medyayê xo de vanê ma seba çinîkerdişê PKKyî hêriş kenê û propagandayan bi nê rengî kenê. La rastî wina nîya. Bêşik PKK seba înan manîyo û tersêke pîl o ke yewin amancê înan o(PKK) yo. Labelê bi çinîkerdişê PKKyî dir wazenê Kurdistanê Vaşurî zî îşxal bikerê. Amanc çinîkerdişê heme Kurdan o. Propagandayê Tirkîyayî yê bi hêrişî serê her hetê Kurdistanî de dayo kerdiş bi xo zî werte de yo ke êdî cayê bawerî nîyo. Şarê Kurdî ganî amancê înan weş biwano."

 

'Hinî partîyê Kurdî rastîya Tirkîyayî nêwanenê'

 

Zeynepe da zanayene ke hinî partîyê Kurdî rastîya Tirkîyayî nêwanenê û vat: "Ma heme zî baş eşkenê rastîya Tirkîyayî biwanê û bivînê. Ma pratîkê înan zî baş zanenê. Neyarîya dewlete ya Tirkî ke hemverê Şarê Kurdî de dana kerdiş tarîxî ya. Yan ney, bi tu tewirêke heta nika dewlete ya Tirkî tehamûlê serkewtişê Kurdan nêkerdo û seba Kurdî nêbê wayîrê statuyî kewtê mîyanê her tewir hewldayîşî. Bêşik no seba Vaşurê Kurdistanî zî derbasdar o. La çi heyf ke hinî hêzî û bi xusûsî zî hinî partîyê Kurdî na rastîye nêwanenê. Têkilîyê nê partîyan ê bi Erdoganî dir zî, no dano motiş. Nê partîyî wazenê amancê dewlete ya Tirkî meşrû bidê motiş û bi tewirêke akerde zî êdî paştdayîş danê dewlete ya Tirkî. Pêvînayîşê dîplomasîyê meşrû yê, la çi heyf ke pêvînayîşê partîyê Kurdî Erdoganî dir kenê, serê çi asasî de yê ma pê nêzanenê. Nê vîyarteyê rêze ra yê. Ma pabe nîyê ke hêzê teverî ra hetê Kurdistanî de hêsgir bê. Vera ke her yew hetê xo ra, ro dimayê menfîetê xo gêrenê. Do bêşik çimê xo hêrişê qilêrinî ra zî padê. Labelê ganî nizdîyîya PDKyî bi eynî rengî nêbo."

 

'Talûke tena serê Şarê Kurdî de nîyo'

 

Zeynepe da zanayene ke talûke tena serê Şarê Kurdî de nîyo û wina ci de şî: "No hêriş helqaya projeyo peynîyê Tirkîya û îqtîdarîya AKPyî yo. No serrêke yo Avaşîn, Zap û Metînayî de hêrişêke xedar û verhîra yeno rayrayîş. Nê hêrişî de dewlete ya Tirkî heme hêzê xo yê ekonomîkî û teknîkî seferber kerdê. Yanê NATO zî kewto dewre. Netîceyê şerî yê serrêke de averfînayîş bidest nêfîna. Duştê nê mexlûbîyan de bi pratîkêke bîn vejênê vernîyê ma. Êdî polîtîkayê qirkerdişê Kurdan, bi destê Kurdan danê rayrayîş. PDKyî fînayî dewre. Labelê vêşêrê ey zî ma rojanê komunîkasyonan de vînenê ke dewlete ya Tirkî her roje mexlûbîyî ciwîyena. Ma organîzeyê azadîyî ra zî bawer ê ke do ser de bikewê. Koyan de şoreşêke pîl û xoverdayîşêk pîl esto. Labelê ganî nê dir sînordar nêmano! Wezîfe û verpersîyarêk pîl keweno serê kiftanê şarî zî. Ganî tena koyan de ney, şaristanan de zî xoverdayîşê ma bibê! Bêşik ganî şarê bînî zî hetkarîyî bidê nê xoverdayîşî! Vera ke goreyê sînorê Mîsakî Mîlî do Tirkîya sînorê Kurdistanî zî derbas bikero. Çirê her roje qalê Musûl û Kerkukî kenê? Vanê yê ma yo, ma ra girewto. No talûke tena serê Şarê Kurdî de nîyo. Serê şarê mintiqa heme de û bi xusûsî zî serê Şarê Erebî de zî esto. Ganî Şarê Erebî nê xoverdayîşê ma de, ma dir bibê yew!"

 

'Têkoşîne ya hemverê Tirkîyayî de têkoşîna rûmetî ya'

 

Zeynepe dîyar kerd ke her mintiqayî de, Ereb û Kurdî zî razînêbîyayîşê xo bimojnê ra û wina ci de şî: "Ma heme zî ferq de yê labelê hema ma hêzê xo û qeneatê xo hemverê dewlete ya îşxalkerdoxe de nêkerdo yew. Ma vanê ma prosesêke hêsgirî dir derbas benê. Her wextî zêdeyêrî ra lazimîya ma bi yewîyî û hetkarîya yewbînan esta. La çi heyf ke PDK seba menfîetê xo yo ferdîyî, keyeyî yan zî hîzbî mîyanê hewldayîşî de yê. Ganî lezkî fek nê fikran ra veradê û seba menfîetê heme şarî bikerê! Çiqas ke her çar hetê ma mîyanê şerî û krîzan de bê zî vernîyê ma de îmkanê pîlî zî estê. Ma do bieşkê bi nê îmkanan şarê xo bipawê û destqezencîyê xo zî bipawê. Yanê Vaşurê Kurdistanî yew destqezencîyî ra pîlê Kurdan o. Bi gonîya hezar şehîdan ameya awdayîş. Ganî serê gonîya înan de xîyanet nêro kerdiş! Ganî qeneatê ma yê hemverê Tirkîya de eynî bê! Têkoşîna hemverê dewlete ya îşxalkerdox Tirkîyayî de yena dayîş, têkoşînêka bi rûmet a. Wezîfeyêke neteweyî yo. Vera nê zî ganî ma wayir ro ci vejîyê û paştdayîş bikerê! Ma heme gerîllayan rê silam kenê û bi serfîrazî verê ma ro înan o. Têkoşîna înan verê Kurdistanî de yo."

 

'AKP bi sayiya PDKyî xo serê payan de vindarneno'

 

Zeynepe dîyar kerd ke girêdayîşê PDKyî û Tirkîyayî resayo ê sewîyeyî ke bê yewbînan nêeşkenê. Zeynepe wina dewam kerd: "Nika îqtîdarîya AKPyî bi sayîya PDKyî xo serê nigan de vindarneno. Hetê ekonomî de, bi xusûsî zî hetê petrolî de Vaşur çimeyê ey yo muhîm o. PDK zî herdê Kurdistanî keno qirrika Erdoganî û Tirkîyayî. Tirkî zî seba hêrişan meşrû bikerê, veng ro îdarekarê Kurdan kenê. Ê îdarekaran ronenê hemverê xo û înan reyde fotografan ancenê. Tewr peynî zî Mesrûr Berzanî serdayîşê Anqarayî kerd. Dîyayîşkîyê uca de vejîyayê vernî, çi heyf ke ma xemgîn kenê. Mesrûr Berzanî seke temsîlkarêke zî nêhesibna. Eywane de Ala Kurdistanî zî çinî bî. Mesrûr hemverê Musteşarê MÎTî de ronişto. No fotograf xeylêk çîyan vano, kesêke nêeşkeno serê nê pado. Şarê Kurdî hende hame qirkerdiş la tu reyî sereyê xo verê îşxalkerdoxan de nêtewêna. Xo ra şarê Vaşurî zî reaksîyon mojna risîyayîya keyeyê Berzanî."

 

'Menfîetê şarî di fikrê înan de nîyê'

 

Zeynepe bale ante serê şeklê îdarekarîya PDKyî û vat: "Her ke şino ma vînenê hetê fikrî de zî ê şibenê yewbînan. PDK zî şarê Vaşurî mîyanê krîzî de rayîr de beno. Pey xo de bi tonan pere kom kerd ê. Ê pereyî, Tirkîyayî de û welatanê bînan de seba keyeyê xo kom kerdê pereyê nê şarî heminan ê. Meaşê mamosteyanê xo nêdanê. Bi mengan o meaş nêşino keyeyê înan. Pêwa ci zî cayêke seke Vaşurî petrol çinî yo û ceryan çinî yo. No zî mojneno ke menfîetê şarî di fikrê înan de nîyê. Ê zî baş zanenê ke êdî nêeşkenê bi nê rengî şarî rayîr de berê. Coka ê yewî zî tedbîrê xo gênê. No bi eynî rengî seba hukmatê AKPyî zî derbasdar o. AKP verê çinîbîyayîşî yo û seba rojêke bîn zî serê îqtîdarî de vindero heme hêzê xo seferber keno. Tedbîrê xo gêno."

 

'Ganî ma seferber bibê'

 

Zeynepe tewr peynî zî bi nê vatişan peynî ro qiseyanê xo ard: "Ma derheqê hêrişê ke yenê ca de partîyê sîyasî dir pêvînayîşê xo ardî ca. Bi rastî reaksîyonê înan estê la qîm nêkenê. Hinî hîzbê seke Goranî, Zehmet Kêşan ê sosyalîstî û îslamî qeneatê xo eşkera kerdî. La nê qîm nêkenê. Ganî ma heme têreyde seferber bibê! Ganî reaksîyonêke sîyasî bibê! Şarê Vaşurî zî qeneatê xo mojnenê ra. Yewîyîya ma seba aramîya Vaşurî zî muhîm a."