Rojda Aydin

 

ŞIRNEX - Cinîyê Botanî vengdayîşê tewrbîyayîşê roniştişê dewaya Denîz Poyraz ke do 29ê nîsane de bêro kerdiş û vat: "Şexsê Denîze de hêrişê heme cinîyan ameyo kerdiş. Sewbîna îqtîdar zî kiştoxan paweno. Hemverê nê ganî ma wayîrê Denîze vejîyê.” 

 

17ê hezîrana 2021ine de hetê Onur Gencer ra hemverê bînaya Partiya Demokratîke ya Şaran (HDP) ya Îzmîrî de hêrişêk ame kerdiş. Netîceyê hêrişî de Denîz Poyraze ameye qetilkerdiş. Hîrên roniştişê dewaya kiştox Onur Gencer do 29ê nîsane de bêro vînayîş. Sazgeh û rêxistinê cinîyan seba tewrbîyayîşê roniştişî vengdayîş kenê. Cinîyê Botanî derheqê dewa de ajansê ma rê qisey kerdî û vengdayîşê tewrbîyayîşê roniştişî kerdî.

 

‘Denîze bi wehşet ameye qetilkerdiş’

 

Aktîvîsta Tevgerê Cinîyan ê Azadan (TJA) Meryem Eşkara, qetilkerdişê Denîz Poyraz şermezar kerd û wina vat: "Seba polîtîkayê ke yenê kerdiş, xeylêk cinî bi wehşet yenê qetilkerdiş. Denîz Poyraze zî nê cinîyan ra yew a. Qetilkerdişê Denîz Poyraze bi hawayêk wehşet bi. No kesê ke Denîz Poyraz qetil kerd, Rojawan de perwerde girewtibi û no çi vejîyabi werte. No kes zî bi destê îqtîdarê AKP û MHPyî ame  perwerdekerdiş. No kes bi zanebîyayîş ame partî û Denîz Poyraz qetil kerd.”

 

‘Qetilkerdişê cinîyan rê êdî bes o’

 

Meryeme, vat 29ê nîsane de roniştişê dewaya Denîz Poyraze yo û vat: "Ganî cinî wayîrê na dewa vejîyê. Wayîrvejîyayîşê dewaya Denîz Poyraze, wayîrvejîyayîşê erjê merdimayî û cinîyê kurdan o. Dewleta AKP û MHPyî wazdna şexsê Denîz Poyraz de veng û têkoşînê cinîyê kurdî bido vindarnayîş. La  bi qetilkerdişê Denîz Poyraze dir bi hezaran Denîzî vejîyayî vatî, ‘Ma Denîze yê û ma estê’. Ê do nêeşkê vernîya têkoşinê ma yê cinîyan padê. Hemverê qetilkerdişê cinîyan ma vanê êdî bes o.”

 

‘Cinî do bi têkoşîn serbikewê’

 

Meryeme, tewr peyîn wina vat: "Ez veng dana heme cinîyan ke roja roniştişî verê Edliyeyê Îzmîrî de bê. Na dewa dewaya ma hemine ya. Ganî wayîrvejîyayîşêk pîl bibo. Bawerîya ma bi edaletê AKP û MHPyî çin a. La ma bi xoverdayîşê xo wayîrê na dewa vejîyê. Do  têkoşînê cinî serbikewo. Şexsê Denîze de ma do têkoşînê xo pîl bikerê. Kes nêeşkeno vengê ma bibirno. Serkeftiş cinîyan ê kurd û şarê Kurdî yo.”

 

‘Ma do taqîbkerdoxê dewaya Denîz Poyraze bê’

 

Endama Meclîsê Dayîkanê Aştîye Hatîce Beytûr vengdayîşê caardişê edaletî kerd û vat: "Denîz Poyraze cinîyêke ciwan bî û bi zanebîyayîş ameye qetilkerdiş. Çira kiştoxê ci nînê cezakerdiş û yeno pawitiş. Ê ma bi kiştiş nêeşkenê xilas bikerê. Ma kurd ê û tu wext peyser game nêerzenê. Embaza ma bi hawayêke wehşî ameye qetilkerdiş. Ma nêwazenê êdî tu cinîyêk bîn bêro qetilkerdiş. Ma do taqîbkerdoxê dewaya Denîz Poyraze bê. Ma wazenê ke kiştoxê ci bêrê cezakerdiş û tu cinîyêk bîn nêro qetilkerdiş. Dewlete kiştoxê cinîyan pawena. Dewlete vera ke cinîyan bipawa, kiştoxan pawena. Dewlete ganî nê rayîrê şaşî ra abigêro û kiştoxan nêpawo.”

 

‘Kiştoxî nînê cezakerdiş’

 

Hatîce, tewr peyîn wina vat: “Seba nê polîtîkayan, camêrdê kiştoxî hêz gênê û vanê, ‘dewlete paşta mi de ya.’ Ê kiştoxî zanê ke wexto cinîyêke qetil bikerê, nêrê cezakerdiş. La qetilkerdişê Denîze bi wehşetî û plankerde ame kerdiş. Kiştoxî hêzê xo dewleta faşîst ra gênê. Bi serran o ma waştişê azadî, aştî û têduştî kenê. Labelê ê vanê şer. Seba nê qirkerdiş kenê. Ma nêwazenê zerrîya dayika Denîze biveşo. Seba nê zî ganî ma heme wayîrê dewa vejîyê.”