Dîlan Babat

 

ANQARA - Vervatoxe ya Meclîsê Cinîyan ê HDPyî Ayşe Acar Başarane derheqê kombîyayîşê Meclîsê Cinî de qisey kerd û vat, ganî HDP sey merkezê rayîro hîrêyîn bêro qebûlkerdiş. Ayşeye bale ante serê hêrişê Tirkîyayî yê hemverê mintiqayê Federalê Kurdistanî û vat, wazenê Kurdan her cayî de bê statu verdê. 

 

Meclîsê Cinîyan ê HDPyî 16ê Nîsane de kombîyayîşê xo ardî ca û tesîrê polîtîkayê şerî, krîzê ekonomîyê serê cinîyan de, binpaykerdişê ke zîndanan de yê, dewaya padayîşê partîya înan, xebatê kongreya pîlî ya partîya înan û tecrîd munaqaşe kerd. 

 

Vervatoxe ya Meclîsê Cinîyan ê HDPyî Ayşe Acar Başarane, averfînayîşê kombîyayîşî û hêrişê Tirkîyayî yê hemverê mintiqayê Federalê Kurdistanî de yê erjna.

 

'Erjnayîşê 8ê Adare û Newroze'

 

Ayşeye da zanayene ke kombîyayîşê têdima yê ke seke hemserekan, ê Meclîsê Cinîyan, ê MYK û PMyî ardê ca û vat bi startê ke Meclîsê Cinîyan ê HDPyî û TJAyî dayî 8ê Adare û Newroze bi coşî ameyê pîrozkerdiş. Ayşeye wina vat: "Dimayê nînan de ma kombîyayîşî ardî ca û fersendo ke ma Newroze û 8ê Adare de bierjnê virazîya. Ma rojê zametan de derbas benê. Hetêke de şerê Rusya-Ukraynayî heto bîn ra zî munaqaşeyê şerî wextêke yo derg o Kurdistan û Rojhelato Mîyanîn de yeno kerdiş ame munaqaşekerdiş. Sewbîna ame parekerdiş ke hewldayîşê îşxalkerdoxanê hemverê Vaşurî de zî ameyê destpêkerdiş."

 

Tecrîd û Zîndan 

 

Ayşe dîyar kerd ke wextêke derg o AKP û MHP xo serê neyarîya hemverê cinîyan û Kurdan de bîyaye kenê û bi ferasetê neyarîyî hêrişê statuyê Kurdan kenê û wina ard ziwan: "Hêrişê hemverê Efrînî, Grê Spî û Serêkanîyî fînakê. Yew rojeve ya ma ya sereyîn ra polîtîkayê şerî yê AKP û MHPyî bî. Ma no hem bi meclîsê cinîyan dir hem bi PMyî dir munaqaşe kerd. Tesîrê şerî yê serê bedenê cinî de ame munaqaşekerdiş. Faturayê şerî û krîzî cinîyan ra yenê vetiş. Ma no di şerê Rusya û Ûkraynayî de vîna. Tewr zêdeyêrî cinî hîs kenê. Sewbîna yew rojeve ra tewr sereyîne ya, amî munaqaşekerdiş ke zî tecrîd û munaqaşekerdişê heqî yê Îmralî de yê û heme zîndanan de yê bî. Vera pandemîyî ma kongreyê merkezî û qezayan nêkerdbî. Seba kongreya pîle ma xebatan kenê. Ma do rojê ameyî de tarîxê kongreya pîle bidê."

 

'HDP eşkeno sey merkezê rayîro hîrêyîn bêro qebûlkerdiş'

 

Ayşeye vat ke derheqê dewaya padayîşê partîyî de zî munaqaşeyî ameyê kerdiş û vat DDB di çerçewayê hukmî de qerar nêdano û hukm bîyo hecetê îqtîdarî û wina qal kerd: " Ma do HDPyî û perspektîfê ci bipawê. Metnê pawitişî yê ma de pawitişêke huqûqî yo ke ma kerdbî, la tena eywanê dadgehe de nê, 8ê Adare de, Newroze de û do 1ê Gulane de zî coşo ke vejîyo, do bimojno ra ke ma fikrê HDPyî meydanan de pawenê. Girsebîyayîşê meydanan de û kombîyayîşê ma de vejîyayî meydan ke verperso tewr pîl bî. Ma do heme alternatîfê xo bipawê. Ma pawitişî de eşkera kerdbî. HDP fikro. Hetê rayaumûmî yê Tirkîyayî ra ameyo qebûlkerdiş. HDP bi xo projeyo rayîro hîrêyîn o. HDP eşkeno sey merkezê rayîrê hîrêyînî bêro qebûlkerdiş."

 

'Wazenê alternatîfan padê'

 

Ayşeye bale ante serê pawitişê meclîsê cinîyan ê derheqê dewaya padayîşî de hadre kerdê û wina ard ziwan: "Yew sebebê hêrişê hemverê HDPyî ra no yo ke, HDP Tirkîya de bîyo umîd û organîzegêreyo rayîro hîrêyîn o. HDP partîya cinîyan o. Temsîlkarê seyyewbînî yenê ca û mintiqan ra heta merkezî cinî her mekanîzmayî de ca gênê. HDP partîyêke ya tecrûbeyê têkoşîna cinîyan ê verî ra mîras girewto. Alternatîfêke pîl o. BDP ra, hereketê cinîyê Kurdan ra mîras girewto. Vera nê zî wazenê nê alternatîfî padê."

 

'PDK mîyanê şaşîyêka tarîxî de ya'

 

Ayşeye bale ante serê hêrişê Tirkîyayî yê bi hetkarîya PDKyî hemverê mintiqayê Federal ê Kurdistanî anê ca û nê erjnayîşî kerdî: "Xeylêk sebebê operasyonî estê. Yew nînan ra zî neyarîya hemverê Kurdan de ya. 2015î ra heta nika heme gamê sîyasî yê îqtîdarîyî de neyarîya hemverê Kurdan de esta. Na neyarî heta manîkerdişê pêvînayîşê Birêz Ocalanî dir bigîro, heta polîtîkayê lejkerdişan, bipeynîkerdişê prosesê çareserîye, rijnayîşê şaristanan, tayînkerdişê qeyûman, tasfîyekerdişê sîyasetê demokratîkî, heqê çinîkerdişê weçînayîşî şîyê. PDK çi heyf ke nika hêrişan rê asasan hadre keno û di xetêka hetkarî de yo. PDK di şaşîyêka pîl a tarîxî de yo."

 

'Statuyê Vaşurî hedef gênê'

 

Ayşeye wina peynî ro qiseyanê xo ard: "Nê hêrişî hemverê statuyê Vaşurî de yê. Çend rojî verî Suleyman Soylû di malûmatê xo de vat 'Ma do İraq û Sûrîyeyî zî sey Vaşurê Rojhelatî bikerê cayêke, eşkenê ciwîyê ke ci de bibo.' Wexto merdim ewneno nê asasî ra, vîneno ke Sûrîye û İraqî zî sey perçeyêke xo vînenê û wazenê weyra de serdest bê. Coka nê zî nê hêrişî statuyê Vaşurî hedef gênê. Hetêke bîn ra zî no hêriş rewşa krîz o ke AKP û MHP kewto ci zî mojneno ra. AKP Tirkîya de êdî komele ra beranberîyî nêgîno. Coka nê zî tena neyarîya Kurdan sey qozî xebetneno. Ganî Kurdî heme bizanê ke no hêriş hemverê destqezencê Kurdan de û statuyê Kurdan de yo."