Medya Uren - Derya Ren

 

AMED - Hemsereka Pêroyî ya DBPyî Salîha Aydenîz, dîyar kerd ke şîrîkîyê PDKyî yê bi Tirkîya dir serê berjewendiyê Şarê Kurdî nîyo û vat: "Ma tarîx ra bîyê şahidê polîtîkayê dewleta Tirkîye, Îran, Sûrîye, Iraq û dewletê hegomonik. Ma nê polîtîkayan nas kenê labelê ma yewîya PDKyî înan dir qebûl nêkenê.”

 

Dimayê pêvînayîşê mabêne Anqara û Hewlêr, Anqara û Bexdayî, hemverê Zap, Avaşîn û Metînayî de hêrişê hawa û bejayî, hemverê Şengalî de zî hêrişê Arteşa Iraqî dest pêkerd. Hemverê hêrişê ke ameyî kerdiş, nêrazîbîyayîş her ke şino zêde benê. Hemseraka Pêroyî ya Partiya Herêmanê Demokratîke (DBP) Salîha Aydenîz derheqê hêrişan de ajansê ma rê qisey kerd.

 

‘Ganî destkewtişî bêrê pawitiş'

 

Salîha destpêk de qalê hêrişê Tirkîya û amancê înan kerd û vat: "Hêrişê dewleta Tirkî tena bi prosesê îqtîdarê AKPyî û MHPyî dir sînordar o. Nê hêrişî demêk hîra yeno kerdiş. Bi polîtîkayêk şîdet û  kolonyalîst nêzdîyê kurdan benê. Demê peyîn de zî hêrişê Tirkîya serê başûrê Kurdistanî de yeno kerdiş rojeve de yo. Bi serrêke zî pêvînayîş û nêzdîbîyayîşê PDKyî bi Tirkîya dir germ ê. Yan zî 23yê nîsana 2021 de serê nameyê ’ê ve qedênayîşê PKKyî hêrişê xidarî hetê Tirkîya de yenê kerdiş. Coka amanc tena çinkerdişê PKKyî nîyo. No tena gamêke amancê înan o. Nê hêrişî de zî yeno waştiş, çinkerdişê statûyê Başûrî yo. Wazeno sey wîlayetêk girêdayê xo bikero. Îqtidarê AKPyî û hemkarê înan bi taybetî serê Kerkûkî de vatişê kerdêne, xora diyar kerdêne.. Kerkûk sey parçeyêk yê Tirkîya hesibnenê. Serranê 2017 de demo ke başûrê Kurdistanî waşt referandumê xo yê xoserî îlan bikero la Tirkîya hemverê nê vejîya. Ganî nê kerdişê tewr tay fehmê Tirkîya bêro wendiş. Dayîş û girewtişê ke yenê kerdiş nê esasî dir ê û lêşin ê. Başûrî bi bedelê pîl nê statu bidest kerdo. Labelê keyeyê Barzanî nêeşkeno sey milkê xo bixebitno û nêeşkeno ser de tîcaret bikero. Ganî nê destkewtişî bêrê pawitiş."

 

‘Êdî PDK bi eşkera paştdayîş dano hêrişan'

 

Salîha vat, îqtidar bi hêrişan sewîyeya dişminî nîşan dano û wina vat: "Bê guman nê hêriş û amancan de Tirkîya tena nîya. Dewletê herême û yê hegomonîk şîrîk ê. Tirkîya hêzê xo başûr de kom kerd la veng kesî ra nêvejîya. Bi taybetî zî bêvengîya PDKyî cayê munaqeşe yo. Xora bêvengî her çî vano. Vernîya nika zî no şîrîkatî estbi, serrê peyînan de zî bi hawayê eşkere kenê. Şîrîkatîyê PDKyî yê bi  Tirkîya dir serê berjewendîyê Şarê Kurdî de nîyo. Hemverê têkilîyê bîyaye destkewtişê Şarê Kurdî çin keno. Menga sibate de pêvînayîşê keyeyê Barzanî bi serekkomarê Tirkîya dir senîn bi ca ame, dimayê ci serê Mexmûr, Şengal û Dêrikî de hêriş ame kerdiş. Ewro reyna Mesrûr Barzanî bi serekkomar dir pêvînayîş kerd û serê Wareyê Pawitişê Medya hêriş kerd. Eynî wextî de zî wazenê bi destê PDKyî hêrişê provakatîf bikerê. Serebûtê Zînîwartê yeno vîrê ma. Bi eynî rengî bi desan serebûtê qewimyayî. Serrê 93ine de vakurê Kurdistanî de çi ame ciwîyayîş, ewro zî Başûr de yeno ciwîyayîş. Serrê 93ine de Vakur de bi hezaran dewî ameyî vengkerdiş û bi eynî hişmendiyê kolonyalist Başûr de zî dewî yenê vengkerdiş. Senîn ke xozaya Vakur, daristanê ci yenê talankerdiş, Başûr de zî eynî çî yenê ciwîyayîş. Waliyê Şirnex û waliyê Hewlêrî serê îşxalkerdişê Başûrî de pêvînayîşan kenê."

 

‘Hemkarîya PDKyî nîna qebûlkerdiş'

 

Salîha bale ant serê hêrişê serê Mexmûrî û vat: "Mexmûr wargehêk ke serranê 1998ine de binê pawitişê Neteweyê Yewbîyaye de yo. Coka bi hemkarîya hukmatî herême, hukmatê Hewlêr û Tirkîya mîyanê ambargoyî de yo. Eynî demî de zî rastê hêrişê hewayî yeno. Wazenê ke Mexmûr zî veng bikerê. La seba ke zanê vengkerdişê uca hende asan nîyo, hêrişê nêmerdimayî kenê. Hema Yewîya Netewî zî na babete de bêveng a. Bêvengîya înan nîna qebûlkerdiş. Eynî wextî de  pêkerdişê 9ê Teşrîna verêne seba Şengalî ameya îmzakerdiş zî yew nê babetan ra ya. Hemverê kurdan de heme kîştî bî yew. PDK zî mîyan de. Seba ke kesêk înan ra zî kurdêk azad nêwazeno. PDK zî yeno kaya înan. Ma tarîx ra bîyê şahidê polîtîkayê dewleta Tirkîya, Îran, Sûrîye, Iraq û dewletê hegomonik. Ma nê polîtîkayan nas kenê labelê ma yewîya PDKyî înan dir qebûl nêkenê.”

 

‘Ganî dîmenê pêvînayîşan baş bêrê wendiş'

 

Salîha dewam de wina vat: “Dîmenê ke koşka Dolma Bahçe de ameyê kerdiş, ganî baş bêrê şîrovekerdiş û wendiş. Ma zî normal vînenê ke pêvînayîşî bi welatê cîranan dir bêrê kerdiş. Bêguman ganî hetê dîplomasî de pêvînayîş bêrê kerdiş. Labelê ê dîmenî de zî tu cayê xo bizanê. Ti serekwezîrê herêma Kurdistanî yê. Cor de serekkomarê Tirkîya kîşte de Mesrûr Barzanî û vernîya ci de zî serekê MÎTî Hakan Fîdan ronişto. Tehemul nêkerdî ke ala Herêma Federal ya Kurdistanî uca de ronê. Nê dîmenê xo sey xurtkerdişê bazirganiyê her welatî pênase kenê. Raşt o şima bazirganî kenê, labelê ê bazirganîyê seba şerî bî ma netîceyê ci zî vînenê."

 

‘Hemverê berjewendîyê kurdan têgêrenê'

 

Salîha bale ant serê berjewendî û vat: “Ma vînenê Tirkîya de îdareyêk bi krîzî esto. Başûr zî eynî îdarekarî esto. Seba ke hişmendî eynî yo. Hukmatê  Başûrî mîyanê krîzêk wina de yo ke nêeşkeno meaşê karmendanê xo bido. Coka serwetê keyeyê Barzanî yê welatê bînan de kom kerdo eşkera bi. n din komkiriye eşkere bû. No zî dîyar keno ke tena berjwendiyê keyeyê xo têgêreno."

 

‘Lazimîyê kurdan înan dir çin o'

 

Salîha tewr peyîn wina vat: “Bêguman hêrişê dewleta Tirkî ya hemverê rêxistina azadîye de PDK paştdayîş dano û no hêriş zî tesîrêk pîl serê yewîya netewî ya kurdan keno. Labelê ganî ma binê ci xêz bikerê ke kurdî bê PDKyî yewîya xo bi ca ardê. Newroze zî nimûne ya. Şarê Kurdî êdî baş nas keno û aya bîyo. Zanê ke kam seba berjewendîyê înan bedel danê. Seba nê zî do hewldayîşê înan veng vejîyê. Lazimîyê kurdan zî êdî bi înan nîyo. Do kurdî yewîya xo zî û destkewtişê xo zî hemverê keyeyê  Barzaniyan bipawê."