MERKEZÊ XEBERAN - Artêşa Iraqî hêrîşê nuqtaya YBŞ û YJŞî yê Şengalî ke kewena mabenê Gelîyê Şîlo û dewa Sikênîyî kerde.

 

Artêşa Iraqî ke hewl dana Şengalî dagir bikera, vizêr Şengal de hêrîşê Asayîşê Êzîdxanî kerde. Leşkerê Iraqî hêrîşê hemwelatîyanê Şengalî yê ke waştî vernîya hêrîşan bigêrî zî kerd. Badê nê hewldayîşanê xo Artêşa Iraqî, Şengal de hêrîşê nuqtaya Yewîya Xoverdayîşê Şengalî (YBŞ) û Yewîya Cinîyanê Şengalî (YJŞ) ke kewena mabenê Gelîyê Şîlo û dewa Sikênîyî kerde. Şero ke badê hêrîşan vejîya pêroyê şewe dewam kerd.

 

Goreyê malumatê çimeyanê herêmî Artêşa Iraqî bado ke şer qewimîya heme hetê ke binê kontrolê YBŞ-YJŞî de yî, de dest bi sewqîyatê leşkerî kerde. Goreyê xebera ke ajansê Rojnewsî derbaz kerd, Artêşa Iraqî vera Şengalî de hadreyîya hêrîşêko gird kena.

 

Iraq û Tirkîya ra hemwext hêriş

 

Zaf balkêşo ke wexto Tirkîya PDKyî reyde hêrîşê herêmanê Zap, Metîna û Avaşînî yê Herêma Kurdistanî kena de Artêşa Iraqî hêrîşê Şengalî kena.