AMED - Avûkate Berfîn Polate derheqê roniştena dewaya Denîz Poyraze de venga wayîrvetişî kerd û da zanayene ke, Denîze vera ke tena cenîya nê,  coka ke Kurde bî ameya qetilkerdiş û no asasî de qirkerdişêk bî. 

 

17ê Hezîrane ya 2021î de, hemverê HDPyî yê Îzmîrî de, hêrişêke çekdarî ame ca û verguman Onûr Gencer xebatkara partîye Denîz Poyraze qetil kerdbi. Dewaya ke verguman ci ra yeno muhakemekerdişî, a hîrêyîne do 29ê Nîsane de 6in Dadgeha Cezaya Girane ya Îzmîrî de  bêro vînayîş. 

 

Endama Heyetê Îdarekarîya Komeleya Cinîyan ê Rosa, avûkate Berfîn Polate derheqê roniştene de erjnayîş kerd. 

 

'Cipersayîş bi tewirêke tesîr nêame kerdiş' 

 

Berfîne ramojnayîş kerd ke, hêrişê nîjadperestî yê hemverê Denîze de, merkezê Îzmîrî de, awanîya HDPyê Îzmîrî de ame ciwîyayîş û binê muşahîdîya polîsan de ame ca. Pêwa nê asasî, cipersayîş duştê mevzûatê neteweyî de û mîyanneteweyî de ame kerdiş. Hêzê asayîşî miqatê  vergumanî bî ke karê xo biqedêno.  Têkilîya torre ya înan vejîya meydan. Derheqê vergumanî de verîyê serebûtî de ke kamî dir kewto îrtîbatî, kamî dir  têkilîya ey esto nêame tesbîtkerdiş û cigêrayîşkerdiş. Verguman otelê luksî de mendbî la na babete de cigêrayîşêk  nêame kerdiş. Reyna kesê ke paştdayîşê lojîstîkî dabîyî nêameyî tesbîtkerdiş. Wexto ma ewnenê, vînenê ke cipersayîşî bi tesîr nêameyê kerdiş." 

 

'Wurdî roniştişê bînî normalî nêbî' 

 

Berfîne malûmat da ke Komeleya Cinîyan ê Rosa, xeylêk pawitoxê heqî, STKyî, serekê baroyan û sazgehî tewirê roniştena yewine bîyê û wina qisey kerd: "Seba no cînayeto sîyasî yo ke organîzekerde û zîhnîyeto lîşin vejîyo meydan hetkarî û paştdayîşêk pîl bîbî. La qatil Onûr Gencer eywana edlîye de bi hereketê rehetî hereket kerd û cesaret girewt. Roniştena winayîn roniştenêka normale nêbî. Qatil bi quwetê asayîşî dir yarîyî kerdê û huwayêne. Heqaret ro birayê Denîz Poyraze kerd. Vêşêrî ke îfadeyê muştekîyan bêrê girewtene, vêşêrî ke waştişê tewirbîyayîşî bêrê girewtene roniştiş taloqê 24ê Çileyî kerdî. Roniştena diyîne de zî tewirbîyayîşêke pîl bîbî. La eywane qije bî û eywanêke bîn texsîs nêkerdî. Tena merdimê temsîlkarî girewtî eywane. Ma Komeleyê Cinîyan ê Rosa cayê xo uca de girewt. Ma waşt ke ma tewir bibê. La waştişê ma ame redkerdiş." 

 

'Planêke giranêr kerdbî' 

 

Berfîne dîyar kerd ke verguman poşmam nêbî û wina ard ziwan: "Vergumanî vat ke zirarêke hema pîlêr plan kerdbî û goreyê planê ey de serebûte aver nêkewtbî. Vat ke planêke hema zafêr giran plan kerdbî. Heyetê edlîyeyî  duştê nê vatişan de  zêde mudaxaleyêke nêkerd. Heme huqûqnasî û sazgehî na rewşe ra adiz bî. Dimayê qatil Onûr Gencerî, heqê qiseykerdişî dayî keyeyê Denîz Poyraze. Dadî û babîyê Denîze îfadeyê bi umîdî dayî, derheqê aştî de waştişê xo ardî ziwan û  vatî wa no welatî de tu cinîyêke nêro qetilkerdiş. Qiseykerdişê înan xeylêke muhîmî bî. Dadîyêke duştê qatilî de nê vatişî ardî ziwan. Bi rastî zî xeylêk tesîr ro merdiman kerd." 

 

'Venga hetkarîye' 

 

Berfîne peynîyê qiseyanê xo de wina vat: " Ma qîrkerdişan dir rî bi rî yê. Hukm ganî STKyî dir sey ma  bikewo hetkarîye. Her keso ke têkoşîna azadîyî dano tacizê hukmî dir yeno rî bi rî. Ma nê welatî de cinîyê ke ameyê qetilkerdiş, ma nêeşkenê  nasnameyê Kurdbîyayîşî  înan ra pakerê. Denîz Poyraze cinîyêke bî, la vera Kurdbîyayîşî ameye qetilkerdiş. No asasî de qirkerdişêk bî. Bi amancê hetkarî û paştdayîşî ganî ma 29ê Nîsane de Edlîyeyê Îzmîrî de bê."