Rojda Aydin 

 

ŞIRNEX - Rabîa Tatar ke dayîka 2 tutan û bi 700 TLyî hewl dana debara xo bikero, wina rewşa bîyaye qal kena: "Bi krîzê ekonomî dir cuya ma serûbin bî. Labelê sebebê serûbinbîyayîşê cuya ma zî hukmat bi xo yo.”

 

Tesîrê krîzê ekonomîye roj bi roje xo tewr zêde dana teber. Welatijê ke êdî nêeşkenê debara xo ya rojane bikerê gerreyê xo bi hawayê cîya anê ziwan. Pêwa vengdayîşê şarî hukmat bêvengîya xo paweno. Welatîya bi nameyê Rabîa Tatar ke 42 serrî ya û dayîka di tutan a û mecbûra ke bi 700 TLyî debara xo bikero.

 

‘Her roje eynî karî kena’

 

Rabîa, keyeyêk di oda û û mitfaxêke yeno meydan de ciwîyena, vernîya ke gerreyê xo derheqê krîzê ekonomî de bikero, ewilî qalê cuya xo ya rojane kerd: "Serê siba rew wurzena, tutanê xo amade kena û înan şawena mektebe. Dima ra ez yena keye kar û barê keyeyî kena. Seba ke menga remezanî de ma roce gênê û seba fitarî amadekariyan kena. Roja mi her roje bi eynî kar û barî dir derbaz beno. Hem weykerdişê tutan û hem zî karê keyeyî êdî îmkan nêdano ke ez seba debara xo teber de xebityena. Xeylêk kesî karê ramitişî dir eleqedar benê labelê seba ke erdê ma çin ê, ma nêeşkenê karê ramitişî zî bikerê.”

 

‘Ma bi 700 TL debara xo kenê’

 

Mêrdeyê Rabîa netîceyê qezayî de çokan ra bîyo û nêeşkeno bixebityo. Rabîa wina qal kerd: "Mêrdeyê mi nêeşkeno karêk giran de bixebityo. Keye de kesêk çin o nika bixebityo. Seba nêweşî 12 mengî yo 700 TL, pere danê ma. Ez bi 700 TL debara xo kena. Ez tewr zêde 200 TL seba mektebê tutan cîya kena. Seba krîzê ekonomî êdî qîmetê pere nêmendo û tesîr serê ma de keno. Bi rastî reyan werd çin o ez bidî tutanê xo. Ez dikan ra bi deyn çîyan gêna, labelê do heta key wina bo. 500 TLyo ke maneno zî ez dana  fature û deynan."

 

‘Cuye verê zî zehmet bî nika tewr zêde zehmet a’

 

Rabîa, dewam de wina qalê rewşe kerd: "Heme çî hende zêde vay nêbi. La dimayê ke no krîz kûr bi, cuya ma serûbin bî. Ewro 4 kîlo rûn bîyo 150 TL, torbeyê ardanî bîyo 380 TL û heme çîyê werdî vay bîyê. Cuye zehmet bî labelê nika tewr zehmet bîya. Ma nêzanê ke ez o 700 TL bidî çi, pê çi bigîrî?”

 

‘Erdogan şino hetkarîya welatanê bînan…’

 

Rabîa vat, sebebê krîzê ekonomî hukmat û polîtîkayê hukmatî yê şerî yê û wina vat: "Sebebê krîzê ekonomî Erdogan û hukmatê ci yo. Eke no şer çinîbibayîne, no krîz çî çin bîne. Ma kesê feqîrî sey her wextî bî qurbanê şerî. Erdogan hetkarîya welatijanê xo nêkeno, şino hetkarîya welatê bînan keno. Ma nê çî  qebûl nêkenê. Ma wazenê no şer peynî bibo ke krîzê ekonomî werte ra bêro wedaritiş."

 

Rabîa tewr peyîn wina qedêna: "Ez wazena ke peynîya nê krîzî bêro. Seba ke rewşa welatijan baş nîya. Wa gamê çareserî bierzê. Ma êdî cuyêka bi hizûr û azad wazenê.”