RIHA - Çalakiya Nobeta Edaletî de keyeyê Şenyaşarî nê mesajî parve kerd: “Kesê ke nê bêhuqûqî kenê, rojêke do bêrê muhakemekerdiş.”

 

Merdim û pawitoxê parlamenterê AKPyî Îbrahîm Halîl Yildizî 14ê hezîrana serra 2018ine de Pirsûs de hêrişê dikanê keyeyê Şenyaşarî kerd. Hêriş de mêrde û di lajê Emîne Şenyaşare ameyî qetilkerdiş û lajê ci Ferît Şenyaşar zî bi birîndarî xelas bi. Seba muhakemekerdişê înan Emîne û lajê xo Ferît Şenyaşar 9ê Adara 2021 ra vernîya Edliyeyê Rihayî de dest bi Nobeta Edaletî kerdî. Çalakiya keyeyî ewro roja 402ine de dewam kena. Ferît Şenyaşar, seba ke şibi serdayîşê birayê xo Fadil Şenyaşar ke Zîndanê Xarpetî de yeno tepiştiş, çalakiya ewro de birayê ci Mehmet Şenyaşar verê dayika xo Emîne Şenyaşar de çalakiya Nobeta Edaletî dewam kerd. 

 

Keye saetê serê siba de Pirsûs ra ame verê berê Edliyeyê Rihayî û “Quncikê edaletî yê keyeyê Şenyaşarî” de dest bi nobete kerd. Çalakî de no pankart ame daliqnayîş: “Mêrde û 2 lajê mi nêweşxane de qetil kerdî la yew kes nêame tepiştiş! Lajê mi bi 4 serrî yo bi fermanê serdestan hucreyêk yewkesî de yeno tepiştiş. Wazena ke lajê mi bêro veradayîş. Edalet seba keyeyê Şenyaşarî û heme kesî.” 

 

Derheqê babete de keyeyî serê hesabê xo yê medyaya komelî de nê mesaj pare kerf: “Dinya, medyaya dîjîtale seba zewqî xebitnena. La ma seba ke merdim û selahîyetdaran ‘heq, huqûq, edalet’ biwazê xebitnenê. Bêguman do kesê ke nê bêhûquqî kenê rojêke bêrê muhakemekerdiş.”