Rojda Aydin

 

ŞIRNEX - Dimayê sereştişê, welatijê Cizîre vernîya HDPyî de dest bi nobete kerdî. Cinîyê ke tewrê nobete bî vatî: "Ma do heta peynî wayîrê partîya xo vejîyê. Xoverdayîşê ma do heta peynî dewam bikero.”

 

Vernîya di rojan saetê serê sibayî de eştî serê bînaya Partîya Demokratîke ya Şaran (HDP) ê Cizîre û demê sereştişî de berê bînaya partî û paca ameyî şikitiş û eşyayê zerî zî ameyî vilakerdiş. Eynî wextî de xeylêk taxan de eştî serê keyeyan û 9 kesî ameyî destbendkerdiş. Sewbîna mîyanê 4 mengan de di rey eştî serê HDPyî yê Cizîre û îdarekarê înan ameyî destbendkerdiş.

 

Hemverê sereştişê bînaya HDPyî û destbendkerdişan, HDPyî verê bînaya xo ya Cizîre de seba 3 rojan dest bi çalakîya nobete kerd. Çalakîya nobete bi tewrbîyayîşê bi desan kesan bi coş derbas beno. Welatijê ke tewrê çalakiya nobete bî, dîyar kerdî ke do wayîrê partîya xo vejîyê û hemverê zulmî qet sere nêtewênê.

 

‘Ma do hemverê hêrişan xo ver bidê’

 

Dayîka bi nameyê Kumrî Babet ke qezaya Hezexî ra ameya tewrê çalakîya nobete bîya û wina vat: "Bi hawayêke xof hêrişê partîya me kenê. Ma nê hêrişê ke yenê kerdiş, şermezar kenê. Heta ke ma sax bê, ma do fek partîya xo ra vera nêdê. Ma tu wext sereyê xo verê înan de nêtewênenê. Heta damleyêke gonîya ma biba ma do fek dewaya xo ra vera nêdê. Ma do her wext wayîrê partîya xo vejîyê. Heta hêrîşê serê partîya ma peynî bibê ma do çalakîyanê xo dewam bikerê. Seba partiya xo ma do her wext paştdayîşê yewbînan bikerê. Îqtîdar hêrişê partî, mal û welatê ma keno. Tutanê ma destbend keno û tepişneno. Bi nê hêrişan wazeno ke ma bitersê. Labelê ma nê hêrişan ra nêtersenê. Bi se serre yo ma xo ver danê û tîya ra tepya zî do xoverdayîşê ma dewam bikero. Hemverê nê hêrişan şarê ma bêveng nêmaneno û paştdayîşê yewbînan kenê. Kesê ke vanê ma wayîrê wîcdanî yê wa bêrê tîya wayîrê partiya xo vejîyê. Wa şarê ma yê  kurdî wurzo serê lingan. Demê hewnî nîyo.”

 

‘Bêvengî zulm pîl keno’

 

Hulya Dalmiş zî seba paştdayîşî ameya nobete wina qal kerd: “Saetê serê sibayî de eştî serê keyeyê vistewreyê mi zî û lajê vistewreyê mi destbend kerdî. Hemverê ma kurdan de nêheqî yena kerdiş û çîyê wina tu rey nînê qebulkerdiş. Serê ma kurdan de tim nêheqî yena kerdiş. La ma kurdî hemverê hêrişan sere nêtewênenê û wayîrê partîya xo vejênê. Dewe û bajaranê ma veşnayî, keyeyê ma talan kerdî, qedexeyî de heme keyeyê ma veşnayî. Ma azadî, aştî û demokrasî wazenê. Botan de her şewe erzenê serê keyeyan. Wexto ke bierzê serê cîrananê ma, sey eştê serê keyeyê ma. Heqê înan çin o nê zulmî serê ma kurdan de kenê. Wa şarê Kurdî wurzê serê lingan û wayîrê partîya xo vejîyê. Wa tu kes bêveng nêmano. Bêvengî zulm tewr pîl kena. Ma bi tepiştiş, destbendkerdiş û kiştiş xelas nêbenê. Her serre erzenê serê partîya ma. No zulmo ke serê partîya ma de yeno kerdiş, nîno qebûlkerdiş. Her çiqas embazê ma tîya roşê ma do zî tîya bê.”

 

‘Hemverê hêrişan ma yewbîyayîşê xo awan bikerê’ 

 

Delal Dalmiş zî dîyar kerd ke şarê kurdî tim xover dayo û vat: "Zilm ma kurdan û partîya ma kenê. Heta ke ma saxbê zî ma do wayîrê dewa û partîya xo vejîyê. Wa şarê ma bibo yew û yewbîyayîşê xo awan bikero. Eke yewbîyayîşê ma bibîyayîne, nê hêrişî çînî bîne. Ganî hemverê zilmî de ma yewîya xo awan bikerê. 7 serre ra heta 70 serre ma dewaya azadîye kenê. Ma dayîkî şer nêwazenê. Ma edalet û cuyêka têduşt wazenê. Ma kurd ê û heta peynî ma do wayîrê nasnameyê xo vejîyê. No hêrişê ke serê partîya ma de ame kerdiş, şermezar kenê. Partîya ma partiya heqîqet, edalet û demokrasî ya. Ma wazenê şarê Kurdî ça benê wa bibê wa wayîrê partîya xo vejîyê. Vengdayîşê mi heme şarê Botanî ra oyo ke bêrê ma destê xo bidê destê yewbînan û yewîya xo awan bikerê.”