ANQARA - Cinîyê ke tewrê Kongreya Merkezî ya Anqarayî ya HDPyî bî dîyar kerdî ke ganî tecrîdê serê Rayberê PKKyî Abdullah Ocalanî bêro wedaririş û tepişteyê nêweşî ganî bêrê veradayîş.

 

4ine Kongreya Asayî ya HDPyî ya Anqara de 10ê Nîsane de kerd. Xeylêk kesî tewrê kongre bî û kongre de rojevê tecrîdê serê Raberê PKKyî Abdullah Ocalanî û rewşa tepişteyê nêweşê giranî vejîya vernî. Cinîyê ke tewrê kongre bî serê di waştişî vejîya vernî, ercnayîş kerdî.

 

‘Aysel Tugluk çira nîna veradayîş?’

 

Endama Komîsyonê Cinîyan ê Rêxistina Tuzluçayirî ya Mamakî ya HDPyî Hasret Karaman tecrîdê serê şarê Kurdî, tepişteyan û komelî şermezar kerd û da zanayîş ke ganî tecrîdê serê tepişteyan ganî bêro wedaritiş. Hasrete wina bale ant serê tepişteyê nêweşan: “Ganî tepişteyê nêweşî yê giranî bêrê veradayîş. Aysel Tugluke rewşa ci giran a. Aye siyasetmedarêke ya. Aye parlamentera ma bî. Çira aye vera nêdanê? Çira destur nêdanê teber de bêro dermankerdiş? Serê tepişteyanê ma de tecrîd yeno kerdiş.”

 

‘Ma pîya eşkenê tecrîd bişikinê’

 

Hasrete dîyar kerd ke birayê ci zî 20 serrî yo tepişte yo û vat: “Birayê mi tepişte yo. Dûrî yo, ma nêeşkenê şêrê pêvînayîş. Demo ke ma şêrê zî reyke de ma gênê zere. Ma her yew 10 deqeyan eşkenê pêvînayîş bikerê. Serê tepişteyan de tecrîd esto. Ganî tecrîd bêro wedaritiş. Ganî serekê ma û heme tepişteyî bêrê veradayîş. Ez aştî û têduştî wazena. Serê şarê Kurdî ds tecrîd yeno kerdiş. No tesîr serê zîndanan de zî kerdo. Bi yewîye tecrîd eşkeno bêro şikinayîş.”

 

‘Ê zî bikerê ma do fek dewaya xo ra vera nêdê’

 

Îdarekara Turkozu ya Mamamî ya HDPyî Esmer Temel destpêkê qiseykerdişê xo de Rayberê PKKyî Abdullah Ocalan û heme tepişteyê sîyasî selam kerd û wina vat: “Ez tecrîdê zîndanan şermezar kena. Wa tecrîdê serê şarê Kurdî peynî bibo. Ma do nê tecrîdî qebûl nêkerê. Ê se kenê wa bikerê ma dewaya xo ra anêgerenê. Ê ma bitepişnê zî ma bikişê zî ma rayîrê serekê xo de şinê. Ma pey şarê xo û tepişteyn de yê. Ma fek nasname û ziwanê xo ra vera nêdanê.”

 

‘Wa zulm û teda peynî bo’ 

 

Esmere tewr peyîn wina vat: “Ganî tepişteyê nêweşî bêrê veradayîş. Wa na polîtîkaya teda û zulm peynî bibo. Ganî tecrîdê serê şarî wurzo. Sewbîna Aysel Tugluk ganî bêro veradayîş. No tedayê serê tepişteyan çîyo gelo? Birayê mi zî tepişte yo, cezaya muebetî ci ra ameya birnayîş. Dewlete tepişteyê nêweşan ra zî tersena. Seba nê vera nêdanê. Ê welatijê nê welatî yê. Çira vera nêdanê. Sere de  Aysel Tugluk ganî tepişteyê nêweşî bêrê veradayîş.”

 

‘Ganî tecrîd bêro wedaritiş’

 

Saadet Kayran zî wina vat: “Şarê ma û cinîyê ma tepişte yê. Nînê veradayîş. Tecrîd her ke şino giran beno û xo dano hîskerdiş. Ganî tecrîd bi hawayêke lez bêro wedaritiş û tepişteyê nêweşî bêrê veradayîş. Tepişteyê nêweşî bi bahaneyê kêfî nînê veradayîş. Ganî sere de Aysel Tugluk û heme tepişteyê bînî bêrê veradayîş.”

 

‘Zîndan nêweşan giran keno’

 

Wendekare Buşra Nur Metîn zî wina qal kerd: “Tacîz û tecawuz no het ra zêde bîyo. Cinî nêeşkenê vengê xo bidê eşnawitiş. Ganî tepişteyê nêweşî bêrê veradayîş. Yê ke vengê xo vejenê yenê tepiştiş. Zîndanan de nêweşî zêde benê. Seba nê ganî tepişteyê nêweşî bêrê veradayîş.”