Yara Kendeş

 

KOBANÊ - Resame Hêlîn Ehmed Ebas, dîyar kerd tutê ke şer ra tesîr bîyê, bi xêzkerdişê resiman hîs û fikrê xo anê ziwan û vat: "Tutî hem bi xêzkerdiş tesîrê şerî anê ziwan û hem zî hewn û xeyalê xo anê ziwan."

 

Rojawan de xebatê kultur û hunerî dewam kenê. Bi taybetî zî seba tutê ke şer ra bi tesîr bîyê, xebatî yenê kerdiş. Tutî bi xebatanê kultur û hunerî hîs û fehmê xo anê ziwan û pey hewn û xeyelanê xo de şinê. Resame Hêlîn Ehmed Ebas, Merkezê Kultur û Hunerê Baqî Xidoyî yê Kantonê Kobanê xebityena. Hêlîna ke mamostetîya tutan kena hîs û ramanê xo ajansê ma rê ard ziwan.

 

‘Tutî wexto ke qeleme gênê destê xo hîkayeyêke qal kenê'

 

Hêlîne destpêkê qiseykerdişê xo de bale ant serê girîngîyê xêzkerdişî û vat: "Bi 4 serrî yo ez Merkezê Kultur û Hunerê Baqî Xidoyî de beşê  xêzkerdişî de kar kena. Eynî wextî de dimayê serrêke mi dest bi perwerdeyê tutan kerd. Hûmara tutanê ke ez perwerde kena resana 70 tutan. Ez di beşan de perwerde dana tutan. Şer tesîr serê tutan de keno, seba nê zî her tutêk/e qeleme gêno/a destê xo hîkayeyêke qal keno/a."

 

‘Şer tesîr serê fikrê tutan de keno'

 

Hêlîne, wina dîyar kerd: "Ez bi rayîrê resimanê ke tutî xêz kerdê, eşkena hîs û fikrê înan biwanî. La ez vînena ke xeylêk dej û zor cuyayê. Bi rastî hewn û xeyalê înan xêzê înan de vejenê werte. Resimanê xo de cuyêka zaf weş vejenê werte. Tutî ameyox de wazenê bibê;  mamoste, muhendis, doktor û sewbîna. Nê çî xêzê înan de vejênê werte. Elbet tesîrê şerî zî serê fikrê tutan de esto. Seba ke temamê dinya zehmetî, dej û ezîyetê ke tîya ameyî ciwîyayîş dîyî."

 

‘Hêvîyanê xo mekişê'

 

Hêlîne tewr peyîn vat, do heta peynî hewn û xeyalê tutan laver bero û wina qedêna: "Bi rayîrê resimêk merdim eşkeno, tarîxêk gane bikero. Xoverdayîşê ke şar keno, bi rayîrê qelema tutan asena. Ez veng dana her cinîyêke, ciwan û tutêke ke wayîrê kulturê xo vejîyê û hêvîyanê xo nêkişiê."