ŞIRNEX - Rêxistina HDPyî ya Cizîre, derheqê sereştişê bînaya partiya xo eşkerayîyek da û çalakiya roniştişî kerd. Çalakîye de Nuran Îmîr ya HDPyije vat, şar hemverê tedayan her tim xo ver dano, sere nêtewêneno û vat: “Ma tîya yê û ma vanê hodrî meydan.”

 

Polîsanê tîmê taybetî saetanê serê sibayî qezaya Cizîre ya Şirnexî de eşt banê HDPyî û taxanê Cûdî, Dagkapi, Nurî û dewa Dirseklî  ser. Sereştişan de Hemserekê HDPyî yê qeza Mesut Nart, Îdarekara HDPyî ya qeza û dayîka Yasemine Çikmaza ke bodrumanê Cizîre de ameye qetilkerdene, Esmer Çikmaz, Osman Kuçuk, Maruz Eriş, Şerif Elçioglu, Haci Dalmiş, Ahmet Benzer, Zelîha Yardak û Ali Ogun ameyî destbendkerdene.

 

Qeza seba ke 9 îdarekarê HDPyî ameyî destbendkerdene eşkerayîye ameye dayene. Wekîlê HDPyî yê Şirnexî Nurane Îmîr, Hasan Ozguneş û îdarekarê partîye yê bajar û qeza, Dayîkê Haştîye, aktîvîstê TJA, Hemserekê HDPyî yê Slipî zî tede xeylêk kesî tewrê eşkerayîye bîyî.

 

Hemserekê HDPyî yê Şirnexî Abdullah Gungenî ard ziwan ke hêrişê vera partîya înan rîyê bêtehamulîya 8ê Adare û Newroze ra ame kerdene û vat ê se kenê wa bikerê şarê Botanî û şarê kurdî do çirey vera polîtîkayanê înan ê leyminan de milê xo çewt nêkero.

 

‘Na polîtîkaya dişminîyî ya’

 

Wekîla HDPyî ya Şirnexî Nurane Îmîr ard ziwan ke ê pê her hêrişî dahîna hêzdar benê û vat: ''Na polîtîkaya dişmenîye ya vera kurdan a. Banê partîya ma serûbin kerdo. Yew şerî de wina texrîbat nêvejîyeno. Nê hêrişkarî  kam ê, hêzê dewlete yan çeteyê DAÎŞî yê?  Nê hêrişan ra şima do zirar bikerê. Îqtîdarê AKPyî do Botan de bêro qedînayene. Ma do tim bibê ters û xofê şima.''

 

Wekîlê HDPyî yê Şirnexî Hasan Ozguneşî zî hêrişî sey terorîzmî name kerdî û veng da selahîyetdaranê dewlete ke wa sebebê na bêehleqîye û bêhuqîye eşkera bikerê.

 

Badê qiseykerdişan bi sloganan paştî dîyaye HDPyî û mesajê xurtkerdişê têkoşînî ameyî dayene. Ewro badê fitarî do rêxistina HDPyî ya Cizîre de çalakîya roniştişî ya hîrê rojan bêro destpêkerdene.