ÎZMÎR - Kênaya Mehmet Sevinço tepişteyo ke bi hawayêke bi guman dinyaya xo bedilnaye, Bêrivan Sevinç dîyar kerd ke îdarekarîya zîndanî xeylêk erey xebera daya înan û vat: "Pîyê mi ame kiştiş. Wa her kes seba na rewşe vengê xo vejo."

 

Mehmet Sevinç ke Zîndanê Tîpê Tyê Manisayî de ameyîne tepiştiş, 3yê Nîsane de seba ke gonî şî serê mezgê ey, wedarnayî nêweşxane û uca de dinyaya xo bedilnaye. Cenazeya Mehmetî ke bi hawayêke guman dinyaya xo bedilna, ardî Sazgehê Tipê Edlî yê Îzmîrî (ATK). Dimayê otopsî teslîmê keyeyî ame kerdiş. Do cenazaya Mehmetî qezaya Darica ya Kocaeliyî de bêro definkerdiş.

 

Verê berê ATKyî de keye û xeylêk sazgeh, desgeh û welatijî bi saetan vindertî. Kênaya Mehmet Sevinçî, Bêrîvan Sevinçe qisey kerd û vatû gardîyanan derheqê merdişê pîyê ci de îfadeyê bi nakok dayê û pîyê ci erey berdê nêweşxane. Sewbîna Bêrîvane dîyar kerd ke saetê merdişê pîyê ci bi guman o û vat, zanayîş nêdayê înan.

 

'Weşîya pîyê mi baş bî'

 

Bêrîvane dîyar kerd ke weşîye pîyê ci baş bîya û o zîndanan de ameyo kiştiş û vat: "Weşîya pîyê mi baş bî. Goreyê ez nêweşxane ra musaya, gonî tewr zêde şîya serê mezgê ey. Zîndan de goş nêdayî pîyê mi. Ey kiştî. Cenazeya ey dayî destê ma. Bi 3 rojî yo ma verê nêweşxane de yê. Pîyê mi merd o, la sey formalîte ma tîya vindarnayî. Ez veng dana her kesî. Wa ma rê bibê veng. Pîyê mi 28 serre xo da. O şehîd kewt. Wa her kes seba na rewşe vengê xo vejo."

 

'Erey berdê nêweşxane'

 

Bêrîvane vat, îdarekarê zîndanî pîyê ci erey berdo nêweşxane û vat: "Pîyê mi ameyo emelîyatkerdiş, dima ra ma gêrenê û vanê, 'Şima wazenê, bêrê.' Heta ma ameyî saete bî 17.00 gonî şîbî serê mezgê ey labelê kesêk xebere nêda ma. Demo ke ma ameyî nêweşxane, nêverdayî ma pîyê xo bivînê. Oda de nêzdîyê 10 cenderme û gardîyanî estbî. Her kesî milê ma ra ma girewt û ma vet. Xebere nêdayî ma. 7 saetan pîyê mi dayê vindernayîş. Çira 7 saetan dayî vindernayîş?"

 

Îfadeyê bi guman

 

Bêrîvane vat, xebere dayê înan ke  bi ambulans pîyê ci berdê nêweşxane û vat: "Wina vanê la zuran kenê. Yew vano, 'demo ke seba werdî ma şî ver, ser ranzayî de viritib û hişê ci şibi.' Ti saete çendine de werd danê? 06:00 yan zî 07:00. O wext çira saete 03:50ine de qeydê dekewtişê acîlî aseno. Pîyê mi uca de tepiştê seba bimiro. Wa heme Tirkîya vengê mi bieşnawo."

 

'Mîyanê embazanê xo de bibayîne do rewşa ey bi ameyîne zanayîş'

 

Bêrîvane vat, dimayê ke berdê nêweşxane hucreyê yewkesî de tepiştê û vat: "Hucreyêke de ey bi tena sereyê xo verdayê. Kesêk çi ra nêşi sehtê ci nêkerd? Eke qawişe de mîyanê embazanê xo de bibayîne, do rewşa ci biameyîne zanayîş."