Sema Çaglak

 

DÎLOK - Endama Meclîsê Cinîyan ê  HDPyî ya Dîlokî Sûzan Uzpak, dîyar kerd ke tecrîdê serê Rayberê PKKyî Abdullah Ocalanî her ke şino komel de vila beno û vat ke ganî hemverê tecrîdî de kurdî bibê yew û peynîya tecrîdî bîyarê.

 

Rayberê PKKyî Abdullah Ocalanî 15ê Sibata 1999 ra heta nika zîndanê Îmraliyî de yeno tepiştiş. 25ê Adara 2021 ra heta nika bi tu hawa xebere Ocalanî ra nîna girewtiş. Reyna Omer Konar, Hamîlî Yildirim û Veysî Aktaşî ra zî xebere nîna girewtiş. Sewbîna waştişê Avûkatanê Buroyê Hûqûqî yê Asrînî zî pêvînayîşê bi miwekîlê xo dir hetê  Dadgerîyê Înfazî yê Bursa ra yenê redkerdiş.

 

Hetêk bîn ra zî seba şikinayîşê tecrîd û azadîya fîzîkî ya Abdullah Ocalanî eşkerayîye yenê dayîş û çalakî yenê kerdiş. Newroza emsarî de zî tewr zêde mesajê; şikinayîşê tecrîdî, azadîya Abdullah Ocalanî û azadîya tepişteyanê sîyasî bi.

 

Endama Meclîsê Cinîyan ê Partîya Demokratîke ya Şaran (HDP) ya Dîlokî Sûzan Uzpak derheqê babete de qisey kerd.

 

‘Tecrîd heme wareyê cuye de xo dano teber'

 

Suzane dîyar kerd ke bi tîfaqîyê AKP-MHPyî her ke şino tecrîd mîyanê komelî de zî vila beno û vat: "Îqtîdarê AKP-MHPyî her îmkanî de komel tecrîd kerd. Tecrîd mudaxeleyê cuye yo. Nê prosesê pandemî de zî bi mehnaya îzolasyonî şar cuye ra ame dûrfistiş û komel ame tecrîdkerdiş. Polîtîkayêke bi nameyê yê 'ma ra nîyê' komelî rê ferz kerdî. Nê prosesê pandemî de zî bi kongre û çalakîyanê AKPyî xo dabi teber. Hetêk bîn ra zî tecrîd tewr zêde zîndanan de û serê cinîyan de xo da teber. Şexsê Aysel Tûglûke de hemverê tepişteyanê nêweşan tecrîdêk girankerde yeno kerdiş." 

 

‘Ganî hemverê tecrîdî kurdî bibê yew'

 

Suzane, dewam de wina vat: “Heqê heme tepişteyan esto ke bi keye û avûkatan dir pêvînayîş bikerê. La heqê Abdullah Ocalanî no het ra yeno binpaykerdiş. Nê dir wazenê mesajêke bidê. Her ke têkoşînê azadîya şarê Kurdî pîl beno, ê zî tecrîd giran kenê. Bi girankerdişê tecrîdî dir hemverê sîyasetê kurdî polîtîkayê taybetî yenê kerdiş. Hemverê nê caardişan eke kurdî bibê yew do hem bieşkê tecrîd peynî bikerê û hem zî polîtîkayê taybetî yê hemverê sîyasetê kurdî pûç bikerê. Kurdî ganî mesajê ke hemverê tecrîdî yenê dayîş raşt biwanê ke bibê cewab. Bêvengîya dewletanê netew, sazgeh û rêxistinê ewropa yê hemverê tecrîdî nîna qebûlkerdiş."

 

‘Mesajê Newroze de waştişê aştîye estbi'

 

Suzane tewr peyîn wina vat: "Coşê 8ê Adare xo resna Newroze û Newroze bi hawayêke somut coş û mesajê 8ê Adare resnayî cayê lazimî. Newroza emsar nê wareyî de bî wayîrê taybetmendîyêke. Mesajê Newroze hemverê îqtîdarî bî. Bi taybetî mesajî seba peynîkerdişê tecrîd û azadîya tepişteyê sîyasîyan bi. Şar nêrazîbîyayîşê xo eşkera ard ziwan. Waştişê Şarê Kurdî yê wareyê peynîkerdişê tecrîdî û azadîya Abdullah Ocalanî wareyê Newroze de somut bi. Sewbîna hemverê şerî prosesê aştîye bi.  Amadekerdişê şert û mercê aştîye zî azadiya Abdullah Ocalan û tepişteyê sîyasîyan ra derbaz bena. Nê mesajê ke ameyî dayîş wayîrê taybetmendîyêk girîng bî."