Rojda Aydin  

 

ŞIRNEX - Rewşa tepişteyê nêweşan roj bi roje ver bi tehluke şina û dadîyê tepişteyan zî vengdayîşê hîsgêrî kerdî û vatî: "Zîndanan de zulm tepişteyan rê kenê û ganî şar nê çî qebûl nêkero."

 

Tecrîdê hemverê Rayberê PKKyî Abdullah Ocalanî her ke şino giran beno û tesîr serê heme zîndanan de keno. Keyeyê tepişteyan zî para xo nê tecrîdî ra gênê. Hemverê tecrîdî tepişteyî zere û keyeyî zî teber de xo ver danê. Demêk derg o rayaumumî serê tepişteyê nêweşan de vinderta û vengdayîşê hîsgêrî kena.

 

Nurullah Acet û Adnan Kuramî 6 serrî yo tepişte yê û nêweş ê. Dadîyê her di tepişteyan ajansê ma rê qisey kerdî û vengdayîşê hîsgêrî kerdî.

 

‘Hucreyê yew kesî de yeno tepiştiş'

 

Nurullah Acet temmuza 2016 de ameyo tepiştiş û cezaya muebetê girankerde ameya dayîş. Dadîya ey Gulsume, dîyar kerd ke Nurullah surgunê Zîndanê Wanî ameyo kerdiş û vat: "Lajê mi vernê de Zîndanê Şirnexî de bi û dima ra ey şawitî Wan. Dimayê ke ceza ci rê ameye birnayîş, ey kerdî hucreyê yew kesî. Ma vera nê vejîyayî la bê feyde mend. Sewbîna lajê mi hîrê mengan de çalakîya grevê vêşanîye ya bêdem û bêdor de mend."

 

‘Teda û zordarî tutanê ma rê kenê'

 

Gulsume, qiseykerdişê xo wina dewam kerd: "Her hewte gardiyanan eştêne serê qawişe înan û cigêrayîş kerdêne. Demê cigêrayîşî de zî heme hacetê înan ameyî vilakerdiş. Mektuban çend mengî dima danê tepişteyan. Ma cil û belgê ke gênê erey danê înan. Sewbîna tutê ma zîndanan de yenê tehdîdkerdiş. Seba vîrûsî dimayê çend serrî dima pêvînayîşo akerde dest pêkerd. Labelê tena kesê keyeyî eşkenê şêrê pêvînayîş. Hewte ra reyke zî 10 deqîqe bi telefon ma pêvînayîş kenê."

 

'Wa tepişteyê nêweşî serbest bêrê veradayîş'

 

Gulsume, tewr peyîn wina vat: "Sere de tepişteyê nêweşî û heme tepişteyî bêrê veradayîş. Ma nêwazenê zulm bi tutanê ma bikerê. Wa tutanê ma vera bidê. Ma nêwazenê çîyêk bi tutanê ma bibo."

 

43 serrî ceza Adnan Kuramî dayî

 

Dadîya Adnan Kuramî, Nerduş Kuramî zî dîyar kerd ke lajê ci sibata 2016in de ameyo tepiştiş û 43 serrî ceza ci rê ameya dayîş û wina dîyar kerd: "Lajê mi gurçikanê xo ra nêweş o û pêwa rewşa tehluke nîno tahlîyekerdiş. Sewbîna tena lajê mi rê ney, pêro tepişteyan rê teda kenê. Lajê mi demê qedexeyê tebervejîyayîşê kuçeyan ê Cizîrî de ame tepiştiş. Demo ke ame destbendkerdiş, xeylêk îşkence bi ci kerdî. Lajê mi nika zîndanê Şirnexî de yo. Dimayê ke ame tepiştiş, nê nêweşî ci de peyda bî. Seba tedawîya ci tîya nîna kerdiş, ey berdî zîndanê Amedî. Hîrê mengî yo o uca de yo û seba nêweşîye tedawî vîneno. Nika rewşa ci zêde baş nîya. Gurcikê ey werêminê. Bi çend rojîî yo ez paweya lajê xo ya ke mi bigêro, la hema nêgêrayo."

 

‘Hukmatî goş û çimanê xo pada yo'

 

Nerduşe, dewam de wina vat: "Zîndan de werdê înan weş nîyo. Kantînê zîndanî de çî xeylêk vay ê û tepişteyî nêeşkenê dayîş û girewtiş bikerê. Hewte ra reyke saetêke awa germe akenê, seba ke tepişteyî sereyê xo bişûyê. Labelê seba ke xeylêk tepişteyî estê, awe qîm nêkenaç Seba nê bi awa serdêne sereyê xo şonê. Gardiyanî hewte ra reyke erzenê serê qawişanê înan. Hacetê ke ma înan rê şawenê, nêdanê înan."

 

'Wa heme tepişteyî bêrê veradayîş'

 

Nerduşe, tewr peyîn wina vat: "Vengdayîşê ma hukmatî ra oyo ke nê zulmî peynî bikerê. Labelê hukmat çim û goşanê xo pada yo. Wa şar wurzo serê lingan. Seba teda û zilmê zîndanan tepişteyî dinyaya xo bedilnenê. Wa pêro nêweşî bêrê veradayîş. Wa êdî zerrîya dadîyan nêveşo."