Habîbe Eren

 

MERKEZÊ XEBERAN - Goreyê çeteleyê ke ajansê ma her menge amade kerdo, menga Adare de 25 cinî ameyê qetilkerdiş û 18 cinî zî bi guman merdê. Menga Adare de 5 cinî balqone yan zî cayê berzî ra kewtî û cuya xo bedilnayî. Yew nuqtayêke bîn ê bale anceno oyo ke 4 cinî hewl dayê vernîya kiştişî bigîrê, hetê gumanbarî ra rastê hewldayîşê qetilkerdişî ameyî.  

 

Şîdet, tacîz, tecawuz û qetilkerdişê hemverê cinîyan vernî nîno girewtiş, roj bi roje zêde beno û na tablo resaya ‘qirkerdişê cinsî.' Heto bîn ra çar hetê Tirkîya de kiştişî ameyî ciwîyayîş de hîkayeyê cinîyê cîya bê zî bi eynî bahane û hacetan ameyî qetilkerdiş. Çekgirewtişê şexsî bi lez zêde beno, gumanbarî metodê sey yewbînan xebitnenê û merdişê bi guman bi hawayêke sîstematîk zêde benê. Sebebê nê zî pawitişê gumanbarî û bêcezaverdayîşî yo.

 

25 cinî ameyî qetilkerdiş

 

Goreyê dayeyê ajansê ma menga sibate de 24 cinî ameyî qetilkerdiş û 26î zî bi guman merdê. Menga adare de zî 25 cinî ameyê qetilkerdiş û û 18 zî biguman dinyaya xo bedilnayê. Nê dayeyan de netîceyê ke vejêno vernîya ma zî demo ke gumanbarî cinîyan qetil kenê, cinîyê ke hewl danê vernî bigîrê zî rastê hewldayîşê qetilkerdişî yenê.

 

5 cinî cayê berzî ra kewtî

 

Reyna mergê biguman sey balkonan ra kewtiş bi. Goreyê dayeyê KCDPyî 2021 ra heta nika 55 cinî cayê berzî ra kewtê û dinyaya xo bedilnayê. Se ra 20ê nê merdişê bi guman bi ca ameyê. Hukm serê nê merdişan de nêşino û reyna na menge de 5 cinî balkone yan zî cayê berzî ra biguman kewtî.

 

Nîgde de cinîya bi nameyê Serap Başer ke 16 serrî verê vînî bî û o wext 24 serrî bî, vejîya werte ke camêrdê aye dir zewicnaye Alî Başer ke di serrî dimayê serebûtî qezaya trafîkî de merdo, ameya qetilkerdiş. Esteyê Serape çala serê erdê gumanbarî de ameyî vînayîş. No serebût ramojneno ke serê kiştişê cinîyan de nêşinê û serê kiştişan yeno nimitiş. Heto bîn ra zî polîtîkayê îqtîdarî zî şîdet her ca de zêde keno. Bursa de Midûrê Mektebê Mîyanên Haydar Akin nuşte şawito mamosteyan rê û vato wa kêna û lajî cîya roşê û coka bi cipersayîş wezîfe ra amebi dûrvistiş. La 5 rojî dima reyna wezîfeyê ci teslîm kerdî.

 

Seba pawitişê cewherî berat

 

Balikesîr de Rumeysa Aydin ke hemverê camêrdê bi nameyê Murat Yildiz pawitişê cewherî kerd, dewaya ameyîne muhakemekerdiş berat kerd.

 

Tewr zêde Stenbol û Konya

 

Bajarê ke tewr zêde cinî  ameyê qetilkerdiş Stenbol û Konya bi. Goreyê dayeyê ma Stenbol de 6, Konya de 3, Bursa de 2, Edene de 2, Denîzlî de 1, Sakarya de 1, Kîlîs de 1, Qeyserî de 1, Antalya de 1, Ordu de 1, Kirşehîr de 1, Isparta û Edîrne de 1, Kocaelî de 1, Tekîrdag de 1 û Îzmîr de zî 1 ameya qetilkerdiş.

 

Gumanbar nêzdîyê înan o

 

Menga adare de 25 cinîyê ke ameyê qetilkerdiş 11 hebî hetê camêrdê ke înan dir zewicnayebî, 4 hebî hetê camêrdê ke înan dir ciwîyayîne, 2 heb hetê merdimanê xo ra, 2 heb hetê camêrdê ke înan dir ciwîyayîne, 2 heb hetê camêrdê ke înan dir zewicnayeyê, 1 hetê pîyê xo, 1 hetê kesê ke nas nêkerdêne û yew zî hetê camêrdo ke aye bi israr taqîb kerdêne ameye qetilkerdiş.

 

Xeylê xo bi çek ameyî qetilkerdiş

 

Cinî yê ke na menga de ameyî qetilkerdiş 11 hebî bi çek, 9 hebî bi kardî ameyî qetilkerdiş. 5 cinî zî metodê cîya ameyî qetilkerdiş.

 

Hewldayîşê qetilkerdiş, tacîz û tecawizî

 

10 cinî bi hewldayîşê qetilkerdişî dir ameyî rî bi rî. 8 cinî şîdet dî, cinîyêke ameye desteserkerdiş, di hebî ameyî tecawuzkerdiş.

 

3 tutî ameyî qetilkerdiş

 

Goreyê dayeyê ma, menga adare de 3 tutî ameyî qetilkerdiş di heb bi guman dinyaya xo bedilnayî. 5 tutî zî ameyî tacîzkerdiş, 3 tutî ameyî tecawuzkerdiş, yew zî Kursê Kuranî de şîdet dî.

 

8ê Adare de cinî ameyî qetilkerdiş

 

Menga adare de hêrişê dewlete û muhakemeyê hemverê cinîyan dewam kerd û merkezê ci Amed 16ê Adare de polîsan eşt serê keyeyê endamê Komeleya cinîyan ê Rosa, aktîvîstê TJA, hemserekê HDP û sendîkayîyan. 24 cinî ameyî destbendkerdiş û 11 hebî ameyî tepiştiş. Bahaneyê tepişteyê cinîyan zî tewrbîyayîşê 25ê Adare, 8ê Adare û çalakîya Pêkerdişê Stenbolî bi. Gumanbarê wendekare Gulistan Doku ke di serrî yo vînî ya, Zaînal Abarakov Alanya de ameye destbendkerdiş la dozgerî serbest vera da.

 

Newroze de 74 cinî ameyî destbendkerdiş

 

Bajaranê Tirkîya û herême pîrozbayîyê Newrozan de xeylêk binpaykerdişî ameyî ciwîyayîş. Cinî seba cil û belgan ameyî astengkerdiş, cigêrayîşê viran ame ferzkerdiş û bi saetan nuqteyê cigêrayîşî de ameyî vindarnayîş. Nuqteyê kontrolî de 74 ci ra tutî 298 kesî ameyî destbendkerdiş. Bismil de zî di tutê 5 serrî yê wayê yewbînan bî bi bahaneyê reng û sembolê serê cil û belgê înan demê kewtişê meydanê Newroze de ameyî destbendkerdiş û rêça engiştanê înan ameye girewtiş.